ဌာန်ပရိုၚ်ဗၠးၜးမန် – နကဵုအမှုဖျေံဂုဏ်သိက္ခာ ညးဒးဒုၚ်ဖျေံလဝ်ထံၚ် ၆ ဂိတု နာဲသဵုတိၚ် ဂွံကလေၚ်ဗၠးကၠုၚ်ဂှ် နူတနေံဏံ ကောန်ကွာန်ဓမ္မသ ရ၀၀ ပြၚ် အာထ္ၜးဆန္ဒ ဂတမုက်ရုၚ်သၞောဝ်ဓဝ် ခရိုၚ်မတ်မလီု အခိၚ်စၟဳစၟတ်အမှုရ။
ဃောစဳရေၚ်မံၚ်ဂဗုတ် အခေါၚ်ပတိုန်ခၠေဝ်သှ်ဂှ်ဟေၚ် ကောန်ကွာန်ဓမ္မသတံ ကၠုၚ်ထ္ၜးဆန္ဒအိုတ်ရောၚ်။
ဗီုကောန်ကွာန်ဓမ္မသတ်တံ ထ္ၜးမံၚ်ဆန္ဒ
ပေဲါထ္ၜးဆန္ဒဂှ် စနူအခိၚ်ဒေါဝ်တ္ၚဲ ၁၂ နာဍဳတုဲ လအ်ပွိုၚ် ၄၅ မိနေတ်ရောၚ် ဂွံတီကေတ် နူညးမဆဵုနမတ်တံ ဟီုရ။
“အမှု နာဲသဵုတိၚ်ဂှ် တ္ၚဲဏံ ဖျေံအမိၚ်ဏောၚ် ဟီုလဝ်။ ဆဂး ထပ်ချိၚ်ထောံ စၟတ်တ္ၚဲ ၈ တေံပၠန်ရ” သာ်ဝွံ နူတနေံဏံ နာဲမေန်သဵုမျေတ် ဟီုရ။
ၜိုန်ရဟွံအာတ်လဝ်အခေါၚ်ထ္ၜးဆန္ဒ ပ္ဍဲဌာနမဆေၚ်စပ်တံကီုလေဝ် ညးတာလျိုၚ်တံ ဟွံတာဒၞာ ပရေၚ်ထ္ၜးဆန္ဒဏံရောၚ် ဂွံတီကေတ်ရ။
“ကညာၚ်ကရေဲ ဂတမုက်ရုၚ်သၞောဝ်ဓဝ်တုဲ ဇက်အာလပါ်ထံၚ်မတ်မလီုတုဲ ထပ်ကညာၚ်ကရေဲပၠန်။ ဂေတ်ဍုၚ် နကဵုကွဳစက်တုဲ ကလေၚ်စဴအာ လပါ်ကွာန်” သာ်ဝွံ နာဲမေန်မေန်နဲ မဒှ်အေဝ်ဒဳတာ ဂျာနေဝ်သြၚ်လောန်တာၚ်မ်ဂှ် ဟီုရ။
တုပ်တဴသာ်ဂှ်ကီု နာဲသဵုတိၚ် ဂွံဗၠးနူထံၚ်ဂှ် နူဂိတုအံက်တဝ်ပါအိုတ်ဏံ ကောန်ကွာန်တံ အာတ်လဝ်အခေါၚ်ထ္ၜးဆန္ဒ ဂတမုက်ရုၚ်သၞောဝ်ဓဝ် ပွိုၚ်ဍုၚ်ကျာ်မြဟ်ကီုလေဝ် ဗဒိုပ်ဗၠာဲသၟိၚ် ပွိုၚ်ဍုၚ်ကျာ်မြဟ်တံ ဟွံကဵုအခေါၚ်ရ။
ပရေၚ်တေၚ်လဝ်အမှု ဥက္ကဋ္ဌတြေံ ကွာန်ဓမ္မသ သွံစဂအာၚ်တိဂှ် ဟိုတ်ဍေံဟွံခိုဟ်ကၠိုက်ရောၚ် ရုၚ်သၞောဝ်ဓဝ် ပွိုၚ်ဍုၚ်ကျာ်မြဟ် သ္ဂုတ်သွာတ်တုဲ ဖျေံထောံထံၚ် ၆ ဂိတု ကုနာဲသဵုတိၚ် နကဵုအမှုပလီုပလာ်သိက္ခာ သၞောဝ်ဥပဒေပိုဒ်ဇၞော် ၅၀၀ ပ္ဍဲဂိတုအံက်တဝ်ပါ ၂ တေံရ။
ဟိုတ်နူနာဲသဵုတိၚ် ဒးဒုၚ်ဖျေံထံၚ်ဂှ်တုဲ ကောန်ကွာန်ဓမ္မသတံ ဟွံပြေစိုတ်ဂှ်ရ အမှုဍာံ ညံၚ်သ္ဂောံမံက်ဂှ် ထ္ၜးဆန္ဒအိုတ်ရောၚ် ဂွံတီကေတ် နူတၠခန္ဓတံ ဟီုရ။
ပြသၞာၜါလပါ် ဂွံသ္ၚဳလလမ်အာဂှ် ပ္ဍဲတ္ၚဲသ္ၚိသဝ် တုဲကၠုၚ်ဏံ ဥက္ကဋ္ဌကွာန်တြေံ နာဲထောန်လေန် ကေုာံ နာဲမေန်သဵုမျေတ်တံ မွဲလပါ် ညးမသုန်တၠ ဆဵုဂဗပ္ညဳပ္ညပ် ပ္ဍဲဟဵုတေဝ်ဂၠံၚ်ဇိုၚ်ၜဳ ဍုၚ်မတ်မလီုကီုလေဝ် ဟွံအံၚ်ဇၞးကၠုၚ်ရ။
