စၠန်ထဝ် – ပ္ဍဲတွဵုရးဍုၚ်မန်၊ ပွိုၚ်ဍုၚ်ဗွဲမဂၠိုၚ်တံ အခိၚ်လၟုဟ်ဟိုတ်နူသြောံဒှ်စၟဂၠိုၚ်မံၚ်တုဲ သၟာဗ္ၚတံ ဇီုကပိုက်ဒၟံၚ်ကဵု အခက် အခုဲအိုတ်ရ။
ဗီုသြောံဒးလဝ်စၟ(IMNA)
“ပ္ဍဲကွာန်ကၟာဝက်ပိုဲဂှ် ရဲတိ ဇိုၚ်ၚ်ၜဳဂှ်တှေ် ဒးစၟးဖအိုတ်ရ၊ တိပိုဲ (၂၀) ဨကပိုဲဟွံရတ်ရပုဟ်၊ ညးဂှ် မိက်ဂွံရတ်တှေ် ရတ်ကေတ်ရ” သာ်ဝွံ သၟာဗ္ၚနူကွာန်ကၟာဝက်မွဲတၠ ဟီုရ။
ဟိုတ်နူသြောံဒးအာစၟဗီုဗီုဏံဂှ် သၟာဗ္ၚတံ ဟီုလဴကဵု ညးအုပ်ဓုပ်ကွာန် ဥက္ကဌကွာန်တံကီုလေဝ် မွဲသာ်လေဝ်ပရေၚ်ကဵုအရီုဗၚ်ဟၟဲဂှ် သၟာဗ္ၚတံ ဟီုရ။
တဵုလဝ်သြောံ (၁၀) ဨကဂှ် ၜိုတ် (၇) ဨက ဒးအာစၟတုဲ ပရေၚ်တဵုသြောံသၞာံဏံဂှ် မ္ဒးဟောံအာ တၟာကလိုၚ်ရောၚ် သၟာဗ္ၚ နာဲမံၚ်လေဝ် နူကဵုပွိုၚ်ဍုၚ်ၜါသွာၚ်(တ္ကအ်ခၟိုၚ်)မွဲတၠ ဟီုရ။
“သြောံဒှ်ဒၟံၚ်စၟလၟုဟ်ဂှ် ဗဵုဟွံမိပ်ဟဂှ်ရ၊ ပိုဲတံမွဲဓဝ်ဟွံသေၚ်ပုဟ် ပ္ဍဲကွာန်ပိုဲ ၜိုတ် (၇ – ၈) တၠဒးဘဲစၟ၊ တိလ္ၚဵုဂှ် ဒးစၟအတိုၚ်မွဲဝါလေဝ်နွံမံၚ်ဏောဝ်” သာ်ဝွံ ညးဟီုရ။
ပ္ဍဲပွိုၚ်ဍုၚ်ၜါသွာၚ် မပ္တံကဵုကွာန်ကလအ်၊ ကွာန်ယိုက်၊ ကွာန်ခဍာ၊ ကွာန်ဝါဍောတ်၊ ကွာန်ဒဵုကြောဝ်၊ ကွာန်ကလွဳတံဂှ် သြောံဒှ်စၟဂၠိုၚ်မံၚ်ကီုရောၚ် ဂွံတီကေတ်ရ။
ဆဂှ်သၟးဟွံက ပွိုၚ်ဍုၚ်တၞဟ်ဟ်တံလေဝ် သၟာဗ္ၚလ္ၚဵုတံ ဒးဇီုကပိုက်ဒၟံၚ်ကဵု ပရေၚ်သြောံဒးစၟတံကီုရ။
သၟာဗ္ၚနူကဵုပွိုၚ်ဍုၚ်မုဟ်ဍုၚ် ကွာန်ယံၚ်ဒံၚ် အယုက်ၜိုတ် ၈၀ ပြၚ်မွဲတၠ ဟီုဂှ် “ပိုဲလေဝ် ဒးအာစၟညိညကီု၊ ဇကုဒးတှေ် ဇကုဒုၚ်ကေတ်ရ၊ အာဟီုကဵု ဥက္ကဌကွာန်လေဝ် မွဲသာ်ဟွံတၟေၚ်ကၠုၚ်ပုဟ်” သာ်ဝွံ ဟီုရ။
အပ္ဍဲတွဵုရးဍုၚ်မန်ဂှ် သၟာဗ္ၚတံယဝ်ခါရ အခိၚ်သြောံက္ဍုဟ်ဏံ သြောံဒးအာစၟနွံမ္ဂး ၜိုတ်ဇကုကၠောန်ဂှ် မုစိဂအုံဒးအာစၟတံဂှ် နကဵုစရေၚ်ဒးအာပတိုန်ကဵု သ္ကိုပ်အုပ်ဓုပ်ကွာန်တံတုဲ မွဲကဆံၚ် ကဵုစရၚ်ကု ဝန်ဇၞော်ကိုန်အစဳဇန်ကေုာံ ပရေၚ်ပိုန်ဒြပ်ညိဂှ် အ္စာသဝ်မာံနဲသိုဝ် ဟီုလဝ်ရောၚ် ဂွံတီကေတ်ရ။
