ခတ္တာနန် – မွဲဟာန်ကေုာံ ပိုဒ်ပကၚ်ရၚ် “မၞးဟွံပါမ္ဂး ဟွံဂွံပရေၚ်ၜိုဟ်လလမ်” ပ္ဍဲဂိတုနဝ်ဝေမ်ပါ ၁၉ ဏံ ဂကောံဗတောန်ကမၠောန် ညးဗြဴဗၟာ Alternative ASEAN Network on Burma တံ ပါ်ဒၞာဲၜါဒၞာဲတုဲ သ္ပပေဲါသောၚ်ကလးပရိုၚ် ကုသၟာကမၠောန်ဆုဲပြံၚ်ဗၟာ ပ္ဍဲဍုၚ်ၜၚ်ကံက်၊ ဍုၚ်သေံရ။

ပ္ဍဲဂတဵုမုက် (ပဝ်သတာ) ဂှ်မ္ဂး “မၞးဟွံပါမ္ဂး ဟွံဂွံပရေၚ်ၜိုဟ်လလမ်၊ ပ္ဍဲလၟေၚ်ကမၠောန် ပရေၚ်ၜိုဟ်လလမ်ဂှ် သၟာကမၠောန်ဆုဲပြံၚ်တံ ဒးပါလုပ်ဏောဝ်” ဆဝ်မ္ၚုဟ်လဝ် နကဵုရမျာၚ်ကရေဲရ။

“ပ္ဍဲကာလပြံၚ်လှာဲ ဍုၚ်ဗၟာလၟုဟ်ဏံဂှ် အလဵုအသဳတံ ဝိုတ်စမံၚ် ပရေၚ်သၟာကမၠောန်ဆုဲပြံၚ်တံရ၊ ပ္ဍဲလၟေၚ်ကမၠောန် ပရေၚ်ၜိုဟ်လလမ်ဂှ် သၟာကမၠောန်ဆုဲပြံၚ်တံလေဝ် ဒးနွံအခေါၚ်ပါလုပ်သဳ ကၠဳချဳဒရာၚ်တုဲ ဂွံဟီုဂးကၠုၚ် ဂံၚ်ဂံၚ်သကာသကာမာန်ဂှ် ပိုဲရန်တၟံလဝ်” သာ်ဝွံ မိမောဝ်ဆာန် ညးမဒှ်ကောန်ဂကောံ ပရေၚ်ချဳဒရာၚ်ဏံဂှ် ဟီုရ။

ပေဲါသောၚ်ကလးဏံဂှ် ကၠောန်ဗဒှ်ဏာ ပ္ဍဲဘာဗ္တောန်လိက် သၟာကမၠောန်ဆုဲပြံၚ်ဗၟာ Migrant Center မပံက်လဝ် ပ္ဍဲဍုၚ်ၜၚ်ကံက် ကေုာံ ပ္ဍဲဘာလကျာ် ၜါန်ကပိ ရ။

ပရးဏာ လိက်စၠောံတဲ ကေုာံ ပဝ်သတာ “မၞးဟွံပါမ္ဂး ဟွံဂွံပရေၚ်ၜိုဟ်လလမ်” တံတုဲ သောၚ်ကလး ဟီုတွံဏာ ပရေၚ်ပဋိပက္ခ တွဵုရးယခေၚ်၊ ပရေၚ်ပေဲါပၞာန်ကချေၚ်၊ ပရေၚ်သိုၚ်ခၞံကၟိုန်ဍာ် ကေုာံ ပရေၚ်သီတိဍာ်ကၠအ်သွဝ်တံရောၚ် ဂွံတီကေတ်ရ။

“စိုပ်တရဴ ဂၠိုၚ်နူပိုဲစၟဳကေတ်လဝ်ဏီ၊ မွဲတ္ၚဲတှေ် ဆိၚ်လဝ် ဆဵုကဵုသၟာကမၠောန် ၜိုတ် ၃၅၀ ရကီုလေဝ် လၟုဟ်ဂွံဆဵုကဵု သၟာကမၠောန် ၜိုတ် ၆၀၀ ပြၚ်မွဲတဲ” သာ်ဝွံ မိမောဝ်ဆာန် ဟီုရ။

ပ္ဍဲတ္ၚဲအဒိုတ်ဂတဏံလေဝ် ဆက်ကၠောန်သ္ပအာ ပရေၚ်ချဳဒရာၚ်သာ်ဂှ်ကီုတုဲ သွက်ဂွံဆက်ကၠောန်အာ ပ္ဍဲဒေသဇၚ်မာဲ၊ မာဲဆံက် ကေုာံ ဒေသပယျဵုတံလေဝ် နွံရောၚ်ဂှ် ဂွံတီကေတ်ရ။

ပ္ဍဲဂကောံဗ္တောန်ကမၠောန် ညးဗြဴဗၟာဂှ် သမဂ္ဂညးဗြဴဗၟာ (BWU)၊ ဂကောံသၟဝ်ပအိုဝ် (PYO)၊ ဂကောံ ညးဗြဴကယျာန် (KyWO)၊ ဇြဟတ်သၟဝ်သေံ (SYP)၊ ဂကောံညးဗြဴကချေၚ် (KWAT) ကေုာံ အစဳအဇန် ညးဗြဴကေုာံ ကောန်ၚာ် (WCRP) တံ ပါလုပ်အိုတ်ရ။

ပ္ဍဲဍုၚ်သေံဂှ် သၟာကမၠောန်ဆုဲပြံၚ် ကောန်ဍုၚ်ဗၟာ မၞုံၜိုတ် ၃.၅ ပြကောဋိကိုဋ်ရောၚ်ဂှ် Federation of Thai Industries (FTI) ဆိၚ်ဆလဝ်ရ။