မာံသုတ – ပေဲါဗှ်လိက်ခၞံ ဂကူပျူ ကေုာံ ဍုၚ်ပျူ ဟွံပေၚ်ကဵု အထံက်သာဓက သုတေသနဝၚ်ဂှ် ဇီုကပိုက်ကဵု ပရေၚ်ကောန်ဍုၚ်အရၚ် ညဳသာသၟဟ်သၟန်ရောၚ်တုဲ ပရေၚ်ကမၠောန်ဏံဂှ် စဵုဒၞာထေက် ဟွံထေက် နကဵုက္ဍိုပ်လိက်ဂှ် ဒံက်တာဗညာအံၚ်မောဝ် သၟာန်ဏာ ပ္ဍဲကောံဓရီု ကၠတ်ထဝ်ကောန်ဂကူ ပ္ဍဲဂိတုနဝ်ဝေမ်ပါ ၂၃ ဏံရ။
ပေါဲဗှ်လိက်စံၚ် သုဝဏ္ဏဘုံ
ပ္ဍဲပေဲါဗှ်လိက်ခၞံသုတေသန “ဂကူပျူ ကေုာံ ဍုၚ်ပျူ” ဝွံ ဍုၚ်သုဝဏ္ဏဘုံဂှ် ဒှ်ဍုၚ်ပျူရောၚ် ကၠောန်ဗဒှ်ကေတ် အထံက်သာဓကနာနာတုဲ ညံၚ်သ္ဂောံကလိဂွံ တၚ်တုပ်စိုတ်ဂှ် ဖန်ဗဒှ်မံၚ်ရောၚ်ဂှ် တၠပညာဝၚ်မန်တံ ထံက်ထ္ၜးအိုတ်ရ။
“ပျူကဵု ဗၟာတံဂှ် ဒှ်ကောန်ဂကူမွဲဓဝ်ရတှေ် မုဟိုတ်ပ္ဍဲလက်ထက်ဗကာံတေံ သၟိၚ်ဗၟာတံ ဟွံသုၚ်စောဲလိက်ပျူမွဲသာ် ဒးဒုၚ်သုၚ်စောဲကၠုၚ်လိက်မန် ပ္ဍဲဝၚ်နန်ရော။ သ္ပသုတေသန ဝၚ်မန်၊ ဝၚ်ကောန်ဍုၚ်အရၚ်တံ ဍိုက်ပေၚ်ရုမ်ဂပ်ယျဟာဂှ် သၟာန်ဏာ နူကၠတ်ထဝ်မွဲကဆံၚ်ရ” သာ်ဝွံ ဒံက်တာဗညာအံၚ်မောဝ် မဒှ်ညးစၞးကၠတ်ကောန်ဂကူ ဒေသဆန္ဒမာဲ စၟတ် (၇) ပွိုၚ်ဍုၚ်ရေဝ်ဂှ် ဟီုရ။
ဟိုတ်နူဖျေံသ္ဂုတ်သွာတ် ဗီုဇကုနွံပၟိက် အတိုၚ်လညာတ်ပရေၚ်ဍုၚ်ကွာန်၊ ပရေၚ်ကောန်ဂကူ နကဵုသုတေသနဝၚ် ဟွံဍိုက်ပေၚ်ဂှ် ဇီုကပိုက်ကဵု သၞောဝ်သဇိုၚ်ဍုၚ် ပိုဒ်ဇၞော် ၃၆၅ ကီု၊ ဇီုကပိုက်ကဵု ပရေၚ်ရှေ်သှေ်လျုၚ်ပတှေ်ကီု၊ ဇီုကပိုက်ကဵု ပရေၚ်ကောန်ဍုၚ်အရၚ် ညဳသာသၟဟ်သၟန်ကီုတုဲ သာ်လဵုဂွံဒၞာတာရော၊ ဇီုကပိုက်ကဵု သၞောဝ်သဇိုၚ်ဍုၚ် ၃၆၄ မ္ဂး သာ်လဵုကဵုဒုဟ်ဒဏ်မာန်ရောဂှ် မိက်ဂွံတီရောၚ် သာ်ဝွံလေဝ် သၟာန်သၟုက်ဏာရောၚ်ဂှ် ညးဆက်ဟီုပၠန်ရ။
အတိုၚ်သၞောဝ်သဇိုၚ်ဍုၚ် ၂၀၀၈ မ္ဂး “သွက်ပရေၚ်ဍုၚ်ကွာန်ဂှ် သုၚ်စောဲဘာသာသာသနာ ဗၠေတ်ဗၠေတ်ဗၠေၚ်ဗၠေၚ်ဟွံဂွံရောၚ်။ သအာၚ်နူဂှ်ပၠန် ဟိုတ်နူပရေၚ်ကောန်ဂကူ၊ ပရေၚ်ဘာသာတုဲ မွဲလပါ်ကဵုမွဲလပါ်၊ မွဲဂိုဏ်ကဵုမွဲဂိုဏ် ရန်ကဵုဂွံက္ဍုဟ်၊ ဂွံဒက်သၞဝဲ၊ စိုတ်ဂွံပါ်ဒကး ကၠောန်သ္ပမ္ဂး ဒစဵုဒစးကဵု သၞောဝ်သဇိုၚ်ဍုၚ်ရောၚ်။ သွက်မကၠောန်သ္ပသာ်ဝွံတုဲ ဂွံကဵုဒုဟ်ဒဏ်ဂှ် စၞောန်ပျးသၞောဝ်မာန်ရောၚ်” သာ်ဝွံ ဓမံက်ထ္ၜးလဝ်ရ။
“အဲပတိုန်သၟာန်တုဲဗက်ဂှ် ဒုသကိုပ်သၟိၚ်နာဲဗစာ၊ ဒုဝန်ဇၞော် ကာအပ္ဍဲဍုၚ်၊ ဒုဝန်ဇၞော် ဌာနယေန်သၞာၚ် ကလေၚ်သှ်ကဵုရ။ ဆက်ကၠောန်ကမၠောန်သုတေသနရောၚ်၊ ဌာနဝန်ဇၞော် ကာအပ္ဍဲဍုၚ်ဂှ် သွက်ဂွံကေတ်အရေဝ် ကိစ္စဏံမာန် ဒးချူဓဇက်သၞောဝ်ဏောၚ် ညးကလေၚ်သှ်ကဵု” သာ်ဝွံ ဒံက်တာဗညာအံၚ်မောဝ် ဟီုရ။
စပ်ကဵုပေဲါဗှ်လိက်ခၞံ “ဂကူပျူ ကေုာံ ဍုၚ်ပျူ” တုဲ နူဂကောံသုတေသနဝၚ်မန် ချူပလံၚ်ဗစိုပ်လဝ် လိက်ဒစဵုဒစး ကုသမတ၊ ကဵုသကိုပ်ဝန်ဇၞော် တွဵုရးမန် ဥူအုၚ်မျေတ် ကေုာံ ကုညးဍိုက်က္ဍိုပ်ကၠောန်ဗဒှ် ပေဲါဗှ်လိက်ခၞံပျူ ချေတ်ဇြာန်ဝေန်တံ တုဲရ။
“သွက်ဂွံထ္ၜးဆန္ဒ ပေဲါဗှ်လိက်ခၞံဏံဂှ် အာတ်လဝ်အခေါၚ် ပ္ဍဲဌာနမဆေၚ်စပ်တံ တုဲရ၊ ပ္ဍဲတ္ၚဲညးတံ ကၠောန်ဗဒှ်ဂှ် ထ္ၜးဆန္ဒ ပ္ဍဲဍုၚ်လ္ဂုၚ်၊ ပ္ဍဲဍုၚ်မတ်မလီုဏောၚ်” သာ်ဝွံ ညးမချဳဒရာၚ် ပရေၚ်ဂကူမွဲတၠ ဟီုရ။
ပ္ဍဲဂိတုနဝ်ဝေမ်ပါ ပထမသတ္တဟဏံဂှ် ကၠောန်ဗဒှ် ပေဲါဗှ်လိက်ခၞံ “သုဝဏ္ဏဘုံ” ပ္ဍဲဍုၚ်မတ်မလီုတုဲ လ္ၚတ်ကေတ် ကွက်ဇိုၚ်ကွတ်တဲယေန်သၞာၚ်တုဲ ဍုၚ်သုဝဏ္ဏဘုံဂှ် ဒှ်ဒေသသဓီု၊ တွဵုရးမန်ရောၚ် တၠပညာဝၚ်တံ ပတိုန်ဗှ်ထ္ၜးဏာ လိက်ကၞပ်နာနာအိုတ်ရ။
0 Comments