မာံသုတ – စနူတ္ၚဲအဒိုတ်ဏံတုဲ ပ္ဍဲဍုၚ်မတ်မလီု စရပ်ကွဳစက်ကာ ကေုာံ ကွဳလိုန်ဓါတ် လာၚ်ဇြေန်ဟွံမွဲတံရောၚ် ဂွံတီကေတ်ရ။
ပ္ဍဲဂိတုနဝ်ဝေမ်ပါ ၁၁ ဂှ် ကၠောန်ဗဒှ်ကောံဓရီု ဆေၚ်စပ်ကဵု ပရူကွဳစက်ယာန် လာၚ်ဇြေန်ဟွံမွဲ ပ္ဍဲၝောံဗဒမ်ယှိုဲမျာၚ်၊ မၞုံပ္ဍဲဌာနဍိုက်က္ဍိုပ် ပရေၚ်အုပ်ဓုပ်နာနာ ပွိုၚ်ဍုၚ်မတ်မလီုတုဲ သကိုပ်ဒပ်ဗၠာဲသၟိၚ် ခရိုၚ်မတ်မလီု၊ သကိုပ်အုပ်ဓုပ် ပွိုၚ်ဍုၚ်မတ်မလီု ကေုာံ သကိုပ်ဗဒိုပ်ဗၠာဲသၟိၚ်ဂမၠိုၚ်၊ သကိုပ်အုပ်ဓုပ် အရာပ်၊ ကွာန်ဂမၠိုၚ် ကေုာံ သၟာပရိုၚ်ဂမၠိုၚ် တိုန်စိုပ်အိုတ်ရောၚ်ဂှ် သၟာပရိုၚ် ဒေသမတ်မလီုမွဲတၠ ဟီုရ။
“ကွဳစက်ကာ၊ ကွဳလိုန်ဓါတ် လာၚ်ဇြေန်ဟွံမွဲ ပ္ဍဲဒေသဇကုတံဂှ် နူသကိုပ်အုပ်ဓုပ် အရာပ်၊ ကွာန် မွဲကဆံၚ် ညံၚ်ဂွံဂတာပ်အခိၚ် ဒးပလံၚ်ပရိုၚ်ကဵု ဗၠာဲသၟိၚ်တုဲ ရပ်အာဏောၚ်။ တုဲပၠန် ကမၠောန်ဟွံကိတ်ညဳကဵုသၞောဝ်တံဂှ်လေဝ် ၝောံမၞိဟ်ကွာန်၊ ၝောံမၞိဟ်အရာပ်တံ ပံၚ်ကောံတုဲ ဓမံက်ပတိတ်အာဏောၚ်” သာ်ဝွံ သၟာပရိုၚ်ဂှ် ဟီုရ။
ဗီုကောံဓရီု ဆေၚ်စပ်ကဵု ပရူကွဳစက်ယာန် လာၚ်ဇြေန်ဟွံမွဲ ပ္ဍဲၝောံဗဒမ်ယှိုဲမျာၚ်(Internet)
ကိုန်စဳဇန် ကၠောန်ကဵုလာၚ်ဇြေန် ပွိုၚ် ၅ ဂိတု ကုကွဳလိုန်ဓါတ် လာၚ်ဇြေန်ဟွံမွဲတံဂှ်လေဝ် ပ္ဍဲဂိတုနဝ်ဝေမ်ပါ ၄ ဏံဂှ် တုဲဒှ်ကၠုၚ်ရ။
သအာၚ်နူဏံပၠန် သကိုပ်အုပ်ဓုပ် ပွိုၚ်ဍုၚ်မတ်မလီုဂှ် ကဵုလဝ်စၞောန်ကဵု သကိုပ်အုပ်ဒုပ်အရာပ်၊ ကွာန်တံ ပ္ဍဲဂိတုနဝ်ဝေမ်ပါ ၁၈ ဏံ ညံၚ်သ္ဂောံလလောၚ်တြးကဵု ကောန်ကွာန်၊ ကောန်အရာပ်တံ ညံၚ်သ္ဂောံတီကေတ် ပရူရပ်ကွဳလိုန်ဓါတ် လာၚ်ဇြေန်ဟွံမွဲတံဂှ်ကီုရ။
“ညံၚ်ရဴသၞာံ ၂၀၀၄ တေံ ရပ်ကွဳစက်ပၠန်ဏောၚ် ဟီုမံၚ်အိုတ်ရ။ မွဲပၠန်ဂှ် ဒးဒုၚ်ဒဏ်သြန်အခေါၚ်လေဝ် ဟီုမံၚ်ကီုရ။ ဒးဟီုချိုတ်ချိုတ်ပၠိုတ်ပၠိုတ်တှေ် ရပ်ဂှ် ချိုတ်ပၠိုတ်အာယျ။ ဆဂး ဟွံဒးအခိုက်တှေ် ဒးဒုၚ်ကေတ်အရေဝ် နကဵုသၞောဝ် ကပေါတ်ပလံၚ်ပတိတ်ဏောၚ်” သာ်ဝွံ ညးမကူသာန်သွံရာန်ကွဳစက်ကာ နူဍုၚ်မတ်မလီု နာဲဇြဝ်ဇြဝ် ဟီုရ။
ပ္ဍဲဂိတုအံက်တဝ်ပါ ၃၁ ဂှ် နူဗဒိုပ်ဗၠာဲသၟိၚ်ကျာ်ထဝ် ရပ်ဂွံကွဳစက်ကာ လာၚ်ဇြေန်ဟွံမွဲ ၃ ဖ္ဍိုက်တုဲ ကေတ်လဝ်အရေဝ် ကုညးဒဳကွဳစက်ကာ နကဵုသၞောဝ် ပလံၚ်ပတိတ်ကပေါတ်ဗၞိက် ပိုဒ်ဇၞော် ၈ /၁ဝ ရောၚ်ဂှ် ဓမံက်ထ္ၜးလဝ် ပ္ဍဲလိက်ပရိုၚ်မျဝတဳ (မြဝတီ) ရ။
သွက်ဂွံကေတ်အရေဝ် ကွဳစက်ယာန် လာၚ်ဇြေန်ဟွံမွဲဂှ်တုဲ ပ္ဍဲဂကောံစၟဳစၟတ်ဂှ် ညးတာလျိုၚ် နူဌာနအကံက်အခေါန်၊ ဌာနကညန၊ သၟာပရိုၚ်တံလေဝ် ဒးပါလုပ်ရောၚ် ဂွံတီကေတ်ရ။
လၟုဟ်မ္ဂး ကွဳစက်ကာ ၜိုတ်မွဲဠက်ဖ္ဍိုက် လုပ်ကၠုၚ်အပ္ဍဲဍုၚ်ဗၟာ နနဲဟွံလုပ်သၞောဝ်ရောၚ်ဂှ် ဂွံမိၚ်ကေတ် နူညးသွံရာန်ကွဳစက် မၞုံပ္ဍဲဒေသပယျဵုတံရ။
