ဌာန်ပရိုၚ်ဗၠးၜးမန် – စပ်ကဵုကိုန်စဳဇန်ဗရိုတ် ဒဵု (လက်ပံတောၚ်း) တုဲ အလဵုအသဳကၟိန်ဍုၚ်ဂှ် ပ္ဍဲစၟတ်တ္ၚဲ ၂၉-၁၁-၂၀၁၂ အခိၚ်နူဂယး ပကီုပရာပ် လၞိန်ဗပိန်ကၠေံ ကုညးထ္ၜးဆန္ဒ မပ္တံကဵု ခမဳသၚ်၊ ညးဍုၚ်ကွာန်တံ ကြာန်ကြာန်ဓဇန်ဓဇန်တုဲ ပါ်ပရးကၠေံမၞိဟ်ဂှ် အောန်စိုတ်ဗွဲမလောန်ရောၚ် ဗော်ဒဳမဝ်ကရေသဳမန် လလောၚ်တြးဏာ လိက်လစွံစိုတ် ဗော်ညးတံ မွဲတၞးရ။
“စပ်ကဵုကိုန်စဳဇန် ဒဵု (လက်ပံတောၚ်း) ဏံတုဲ ပါ်ပရးကၠေံ ခမဳသၚ် ညးဍုၚ်ကွာန် ကြာန်ကြာန်ဓဇန်ဓဇန်သာ်ဏံဂှ် ဒစဵုဒစးကဵု ဒဳမဝ်ကရေသဳ သမတ ဥူတိၚ်သိၚ် ပၠမံၚ်ဇိုၚ်ဂှ်ဏောၚ်။ ဟိုတ်ဂှ်ရ ဗွဲကြဴ ညံၚ်ဂွံဒှ်ဗီုဏံ ကြာန်ကြာန်ဓဇန်ဓဇန်တုဲ ယေန်သၞာၚ်တက်ကျာပ္ညဳပ္ညပ်သဳကၠဳ ညံၚ်ဂွံမံက်ကၠုၚ် ရန်တၟံတုဲ ပိုဲပတိတ်ဏာ လိက်လလောၚ်တြးဏံ” သာ်ဝွံ ညးအုပ်ကာနာနာ ဗော်ဒဳမဝ်ကရေသဳမန် ဒံက်တာမေန်သဵုလေန် ဟီုရ။
ပွသာ်ဏံဂှ် ပလီုပလာ်မံၚ် ဒဳမဝ်ကရေဇြဳကဵု အခေါၚ်အရာမၞိဟ်ရောၚ်၊ သွက်သ္ဂောံသောၚ်ကလး ကိစ္စပရေၚ်ကောန်ဂကူ ကတဵုဒှ်မံၚ် အပ္ဍ္ဍဲဍုၚ် မပ္တံကဵု ပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်မၞိဟ်၊ ပရေၚ်ၜိုဟ်လလမ်တံဂှ် နကဵုညးမွဲ ဂကောံမွဲ ကၠောန်ဗဒှ်ကေတ် ဟွံမာန်တုဲ သွက်ပရေၚ်ဆာန်ကၟိန် ကောန်ဂကူဂှ် နကဵုပရေၚ်တက်ကျာသဳကၠဳ ဂၠာဲသွဟ် နကဵုဇြဟတ် အလုံညးဍုၚ်ကွာန်တံ ထေက်ရောၚ်ဂှ် ချူဓမံက်လဝ် ပ္ဍဲလိက်လလောၚ်တြး လစွံစိုတ်ညးတံရ။
ပ္ဍဲဂိတုဒဳဇြေမ်ပါ ၃၊ သၞာံ ၂၀၁၂ နကဵုလၟေၚ်အမိၚ် ရုၚ်သမ္မတ ၉၅/၂၀၁၂ ဂှ် သမ္မတ ဥူတိၚ်သိၚ် ဒက်ပ္တန်ကဵုလဝ် ကမ္မတဳစၟဳစၟတ်ဂၠိုက်ဂၠာဲ မွဲဂကောံ ဒဝ်အံၚ်သာန်သုကျဳ ဍိုက်က္ဍိုပ်တုဲ ပါလုပ်မၞိဟ် ၁၆ တၠရ။
ဂကောံဝွံဂှ် ဟွံဗက်စ အဂတိတုဲ ရေၚ်တၠုၚ်ကဵု သွက်ကၟိန်ဍုၚ် သွက်ညးဍုၚ်ကွာန်ရောၚ်ဂှ် စှေ်စိုတ်တုဲ အလဵုအသဳ သမ္မတ ဥူတိၚ်သိၚ်ဂှ် ပရေၚ်ပကီုပရာပ်အိုဿီု ဝေၚ်ပဲါတုဲ ပ္ညဳပ္ညပ်သဳကၠဳကဵု သောၚ်သောၚ်ကလးကလးညိဂှ်လေဝ် ဗတိုက်ဖအောဝ်လဝ်ကီုရ။
အလဵုအသဳလၟုဟ် ကေုာံ ဂကောံပြဝါညးတံဂှ် စပ္တံနူသီအဝဵု သၞာံ ၁၉၈၈ တုဲ ပ္ဍဲသၞာံ ၂၀၀၇ ဂှ် ပကီုပရာပ်ကၠုၚ် ခမဳသၚ်တံကီု၊ လၟုဟ်လေဝ် အခိုက်ဟွံလီု ဆက်ဓဇန်ကြမ်ကြ သုၚ်စောဲဗမ်ပၟတ်တုဲ လၞိန်ဗပိန်မံၚ်ကီုရောၚ်ဂှ် ပတိုန်လဝ်ဒုဟ် အလဵုအသဳ ချူဓမံက်လဝ် ပ္ဍဲလိက်လလောၚ်တြး ညးတံကီုရ။
ဗော်ဒဳမဝ်ကရေသဳမန် MDP ဝွံ ပ္ဍဲဂိတုဂျူလာၚ် ၁၀ ဂှ် ဗွဲမဗဗွဲကဵု သၞောဝ်ဥပဒေ ဗော်ပရေၚ်ဍုၚ်ကွာန် ပိုဒ်ဇၞော် ၉ ကဝ်မရှေန် ပေဲါရုဲမာဲကၟိန်ဍုၚ် ဖျေံကဵုလဝ် အခေါၚ်ပတန်ဗော်လုပ်သၞောဝ်ရ။
ဗော်ညးတံဝွံ နကဵုယၟု ဂကောံဒဳမဝ်ကရေသဳ ကောန်ဂကူမန် MNDF စဒက်ပ္တန်ကၠုၚ် ပ္ဍဲဂိတုအံက်တဝ်ပါ ၁၁၊ သၞာံ ၁၉၈၈ တုဲ ပ္ဍဲပေဲါရုဲမာဲ ၁၉၉၀ ဂှ် လုပ်ပြိုၚ်ညးစၞး ၁၉ တုဲ ဇၞးကၠုၚ် ၅ ဒၞာဲရ။
