ဌာန်ပရိုၚ်ဗၠးၜးမန် – မဒးထေၚ်ခယျကေတ် တၠတဲ ဂစိုတ်လဝ်မၞိဟ် ပ္ဍဲအရာပ် ၄၊ ဍုၚ်ကျာ်ပိဂှ် နူတနေံ ပ္ဍဲဂိတုဒဳဇြေမ်ပါ ၁၆ ဏံ ရပ်ဂွံလဝ်ယျရောၚ် ညးမစုက်လုက်ကဵု ဗဒိုပ်ဗၠာဲသၟိၚ် ဍုၚ်ကျာ်ပိတံ ဟီုအိုတ်ရ။
ဂွံဆဵုကေတ် ပရေၚ်ဟွံညိၚ်ဝတ် လတူဍုၚ်ကျာ်ပိ
“မၞိဟ်ဂစိုတ်လဝ် မာံလွေန်နံၚ်နံၚ်ဂှ် ဃောဍေံဂြိပ် သီုဗြဴဍေံ စိုပ်အာကွာန်ယျေဝ်တဂေါန်ဂှ် ဒပ်ပၞာန် KPF ဖျေံလဝ်သဇိုၚ် ပ္ဍဲကွာန်ဂှ် ရပ်ဂွံအာ” သာ်ဝွံ ညးမစုက်လုက်ကဵု ဒပ်ဗၠာဲသၟိၚ်မွဲတၠ ဟီုရ။
တၠတဲ ဂစိုတ်လဝ်မၞိဟ်ရောၚ် မဒးဒှ်သံသယဂှ် လၟုဟ်အပ်ဏာကဵု ဗဒိုပ်ဗၠာဲသၟိၚ် ဍုၚ်ဇြပ်ဗုယျရောၚ်ဂှ်လေဝ် ညးမစုက်လုက်ကဵု ဗဒိုပ်ဗၠာဲသၟိၚ်ဂှ် ဟီုရ။
ပ္ဍဲဒဳဇြေမ်ပါ ၁၅ အခိၚ်တ္ၚဲစေၚ်ဂှ် မာံလွေန်နံၚ်နံၚ် ကေုာံ မာံလေန်လေန်တံ နကဵုကွဳလိုန်ဓါတ် ဂေတ်ကြေဝ် လပါ်ဍုၚ်ကျာ်ပိ အရာပ် ၄၊ ကၟာဥဒံၚ်တုဲ ပ္ဍဲဒဳဇြေမ်ပါ ၁၆ အခိၚ်နူဂယးပြဟ်ဂှ် ဂွံဆဵုကေတ်ဇွ မာံလွေန်နံၚ်နံၚ် သီုပၞေတ်ဝပ် ထပက်လဝ်ၜုန် သီုကွဳလိုန်ဓါတ်ရောၚ် ကောန်အရာပ်တံ ဟီုအိုတ်ရ။
ညးၜါဂှ်ဝွံ သ္ပဒတဴဒၟံၚ် ပ္ဍဲဍုၚ်ကျာ်ပိ သြၚ်သေံတုဲ ကၠောန်ဒၟံၚ်ကမၠောန် ပ္ဍဲရုၚ်စက်ဇိၚ်ဒၞပ် မွဲစွံရ။
ဇွမာံလွေန်နံၚ်နံၚ်ဂှ် မိညး ကေတ်လျိုၚ်တုဲ ပ္ဍဲဒဳဇြေမ်ပါ ၁၆ အခိၚ်တ္ၚဲစေၚ်ဂှ် ဖျေံစံၚ်ထောံ ပ္ဍဲသုဿာန် ဍုၚ်ကျာ်ပိတုဲရောၚ် ဂွံတီကေတ်ရ။
“ဍေံတံညးၜါဂှ် သကအ်ရဲရဏောၚ်။ ကၠောန်မံၚ် ကမၠောန်လေဝ် မွဲရုၚ်ရဏောၚ်။ အာသုၚ်အရက် ပ္ဍဲဍုၚ်ကျာ်ပိ သြၚ်မန်ဗၟာဏောၚ် ဟီုတုဲ ဍေံတံညးၜါ တိတ်အာဂှ် လွေန်နံၚ်နံၚ် ဒးဒုၚ်ဂစိုတ်ထောံဟဂှ်ရ” သာ်ဝွံ ညးမဍုက်ကေဝ်ကဵု မာံလွေန်နံၚ်နံၚ် ဟီုရ။
ပ္ဍဲအရာပ် ၄ (အရာပ်ကၟာဥဒံၚ်) ဍုၚ်ကျာ်ပိဂှ်မ္ဂး ပံက်လဝ် ဝိုၚ်ဝေၚ်နာနာ၊ ဆေၚ်ဗြဴစရာဲဍုၚ်တံတုဲ ဒှ်ဒၟံၚ်ဒၞာဲသွံရာန်ဂဥုဲၜူမာဲ မပ္တံကဵုဂဥုဲချေံတံရောၚ် ကောန်ဍုၚ်ကျာ်ပိတံ ဟီုရ။
