ဌာန်ပရိုၚ်ဗၠးၜးမန် – ပ္ဍဲအခိၚ်တ္ၚဲစေၚ် (ဒဳဇြေမ်ပါ ၄) ဂှ် စံၚ်ဏာဇွ ဥူတိၚ်မျေတ် (ကော်) ဥူတာၚာ မၞုံအာယုက် (၄၇) သၞာံ မစုတိအာ ဃောဗဒိုပ်ဗၠာဲသၟိၚ် ဍုၚ်ကျာ်ပိတံ ရပ်လဝ်ဂှ်ရောၚ် ဂွံတီကေတ် နူမသကလောကောဒေံဂမၠိုၚ်ရ။
ဂွံဆဵုကေတ် ပရေၚ်ဟွံညိၚ်ဝတ် လတူဍုၚ်ကျာ်ပိ
“အခိၚ်ရပ်ဏာဂှ် ပရေၚ်ထတ်ယုက်ညး ခိုဟ်ခိုဟ်ရဏောၚ်။ ချိုတ်အာတုဲမှ ကၠုၚ်ပအပ်ကဵုပိုဲ။ ဗၠာဲသၟိၚ်တံလေဝ် ဟွံကေတ်တာလျိုၚ်မွဲသာ်ပုဟ်။ ဟိုတ်နူဗၠာဲသၟိၚ်တံ ၜုၚ်တက်တုဲ ချိုတ်အာရဏောၚ် အဲစှေ်စိုတ်” သာ်ဝွံ ဥူဇြာန်တေန် ဟီုရ။
အခိၚ်ကော်ရပ်ဏာ ဥူတာၚာဂှ် မသကောဒေံ၊ ကောန်အရာပ်တံကီု ၝောံမၞိဟ်အရာပ်တံကီု ဟွံတီမွဲသာ်ရောၚ် ဥူဇြာန်တေန် ဟီုရ။
ဥူတာၚာဝွံ ကၠောန်ဒၟံၚ်ကမၠောန် ကိတ်ညဳနာနာတုဲ ပ္ဍဲဇြပ်သဘၚ်ဓဝ် မျတိၚ်တာန် အရာပ် (၁) ဂှ်လေဝ် ဒှ်ဒၟံၚ်ညးမၚ်ဗ္တမ်မွဲကီုရ။
“လ္ၚဵုတံဂှ် ဇွစိုပ်ကၠုၚ်ရုၚ်ဂဥုဲတုဲ သမူလဝ်ကဵု သကဝ်ဂှ် ဂွံမိၚ်ကေတ်တုဲ ကောန်ဍုၚ်ကျာ်ပိဏံ ဟွံပြေစိုတ်တၟာဂလိုၚ်၊ ဒှ်အာစဵုကဵုကဆံၚ်ထ္ၜးဆန္ဒဏီ” သာ်ဝွံ ညးဒုၚ်ကာအလဵုအသဳ လတူဍုၚ်ကျာ်ပိမွဲတၠ ဟီုရ။
နူဗော် NLD ဍုၚ်ကျာ်ပိတံဂှ် ဟိုတ်နူပရေၚ်စုတိ ဟွံသၚ်္ကာဏံတုဲ နူတနေံတေံ ပကောံပကေဝ်မံၚ်မၞိဟ် နွံကီုလေဝ် ဟွံဒှ်ကဆံၚ်ထ္ၜးဆန္ဒရ။
“တာၚာဂှ် ချိုတ်အာ ဓမ္မတာမွဲ ဟွံသေၚ်ပုဟ်။ မုဟိုတ်ရောတှေ် ပ္ဍဲတဲ၊ ဒဳ၊ က္ၜံၚ်တံဂှ် ဂွံဆဵုကေတ်မံၚ် ပၞေတ်လမ္စံက်။ တုဲတှေ် ညံၚ်ကဵုပၞေတ်တူပၟတ်လေဝ် ဂွံဆဵုမံၚ်ကီု။ သဝ်ဝန်တံဂှ် ချိုတ်အာကဵု ယဲဆီၜေတ်ဏောၚ် ညးတံဂးဟဂှ်” သာ်ဝွံ ဥူဇြာန်တေန် ဆက်ဟီုရ။
စပ်ကဵုပရေၚ်မၞိဟ်ချိုတ် ဃောမရပ်ချုက်လဝ်ဏံတုဲ နူကဵုဂကောံပရေၚ်စၟဳစၟတ်ဂၠိုက်ဂၠာဲကေုာံ ရုၚ်ဂဗုတ် နူရုၚ်ဂအုပ်ဗဒိုပ်ဗၠာဲသၟိၚ် ပွိုၚ်ဍုၚ်လှာဒကှ်ဂှ် နူတနေံတေံ ကၠုၚ်စၟဳစၟတ်လဝ် ဇွဥူတာၚာ ပ္ဍဲရုၚ်ဂဥုဲကျာ်ပိရောၚ် ဂွံတီကေတ်ရ။
ၜိုန်ဂှ်လေဝ် စပ်ကဵုပရေၚ်ဥူတာၚာ စုတိချိုတ်အာဏံဂှ်တုဲ နူဂကောံစၟဳစၟတ်ဂှ် ဟွံလလောၚ်ပ္တိတ် သ္ဂုတ်သွာတ်ညးတံဏီရ။
