မာံသုတ – ၜိုန်ရဂကောံကမ္မတဳ ဓမံက်ပတိုန် ပရေၚ်ၜိုဟ်လလမ် အလဵုအသဳဗၟာ ကေုာံ ညးစၞးကံၚ်ဇြဳ ဖက်ဒရေဝ် ဂကူကောန်ဍုၚ်အရၚ် ညဳသၟဟ် UNFC တံ တုပ်လဝ်စိုတ် သွက်သ္ဂောံသဳကၠဳ ပရေၚ်ဍုၚ်ကွာန်ကီုလေဝ် ဟိုတ်နူထပက်ဒၟံၚ်ပၞာန် ဒေသကချေၚ်တုဲ ဂွံသဳကၠဳ ပရေၚ်ဍုၚ်ကွာန် လဇုဲလဇမာန်မံၚ်ရောၚ်ဂှ် ညးအုပ်ကာနာနာ UNFC နာဲဟံသာ ဟီုရ။

“ဟိုတ်နူဒှ်မံၚ်ပေဲါဗတိုက်ကဵုကချေၚ် သကာတ်မြဟ်မံၚ်ဂှ်ရ ဂွံသဳကၠဳပရေၚ်ဍုၚ်ကွာန်ဂှ် လဇုဲလဇမာန်ဏောၚ်။ ဂွံသဳကၠဳ အပ္ဍဲဍုၚ်ဟာ၊ မ္ၚးဍုၚ်ဟာဂှ်လေဝ် ဂွံကဵုသွဟ်ဝါတ်မံၚ်၊ သီုၜါလပါ် တုပ်စိုတ်သွက်ဂွံသဳကၠဳကီုလေဝ် ထပက်မံၚ်ပၞာန် သကာတ်သကာတ်မြဟ်မြဟ်ဂှ် နကဵုအလဵုအသဳ လဟီုမွဲဗီု ကမၠောန်မွဲဗီု ဟွံယျဵုလဂူပုဟ်ဂှ် ထ္ၜးမံၚ်သက်သဳဏောၚ်” သာ်ဝွံ နာဲဟံသာ ဟီုရ။

ညးစၞး အလဵုအသဳဗၟာ ဥူအံၚ်မေန် ဍိုက်က္ဍိုပ်ကေုာံ ညးစၞး UNFC နာဲဟံသာ ဍိုက်က္ဍိုပ်တံဂှ် ပ္ဍဲဂိတုနဝ်ဝေမ်ပါ ၉၊ သၞာံ ၂၀၁၂ တေံ ဆဵုဂဗ ပ္ဍဲဍုၚ်ဇၚ်မာဲ ဗွဲပလးတုဲ ပြသၞာပရေၚ်ဍုၚ်ကွာန်ဂှ် နနဲပရေၚ်ဍုၚ်ကွာန် သွက်သ္ဂောံသဳကၠဳအာ၊ သွက်သ္ဂောံဒေံါပန်ပှော် အလုံကၟိန်ဍုၚ်၊ သွက်ဂကောံဒှ်ဒၟံၚ် ပဋိပက္ခရပ်လွဟ် မပ္တံကဵုကချေၚ်တံဂှ် နကဵု UNFC သွက်သ္ဂောံပါလုပ်သဳကၠဳပ္ညဳပ္ညပ်ဂှ် တုပ်လဝ်စိုတ်ရောၚ် နာဲဟံသာ ဟီုရ။

ပ္ဍဲဂိတုဒဳဇြေမ်ပါ သတ္တဟ လက္ကရဴအိုတ်ဂှ် ဒပ်ပၞာန်အလဵုအသဳဗၟာတံ စသၠုၚ်ပတိုန် ပရေၚ်ထပက်ပၞာန် ဒေသကချေၚ် နကဵုက္ၜၚ်ကျာဗတိုက်ပၞာန်၊ လွဟ်က္ၜၚ်ကျာ၊ လွဟ်စက်နာနာ၊ သီုဂြာတ်ဖျေံဗမ်ဂှ်တုဲ ပရေၚ်ဏံဂှ် နကဵု UNFC ဒစဵုဒစး သကာတ်သကာတ်မြဟ်မြဟ်ရောၚ်ဂှ် ပ္ဍဲဂိတု ဂျာန္နဝါရဳ ၁ ဏံ ပတိတ်ကၠုၚ် လိက်လလောၚ်တြးရ။

ဂကောံ UNFC ဂှ် ဒက်ပ္တန်လဝ် နကဵုဂကောံရပ်လွဟ် ကောန်ဍုၚ်အရၚ် ၁၁ ဂကောံ ပ္ဍဲဂိတုဖေဖဝ်ဝါရီ ၁၆၊ သၞာံ ၂၀၁၁ ရ။

ပရေၚ်ဗတိုက် နကဵုဂၠံၚ်ကျာဂှ် ကိုပ်ကၠာတေံ ညးတာလျိုၚ် အလဵုအသဳတံ ကယျာန်တးပဲါဒၟံၚ်ကီုလေဝ် ခြာတ္ၚဲဟွံလအ်ဏံ ဗတိုက်ကဵုက္ၜၚ်ကျာဂျက် ဗ္တောန်ဒဳရောၚ်ဂှ် ညးမၞုံအခေါၚ်ဟီုဂး အလဵုအသဳတံ ဒုၚ်ဝန်ဟီုဂးကၠုၚ်ရောၚ်ဂှ် ပ္ဍဲဌာန်ပရိုၚ်တံ ဓမံက်ထ္ၜးကၠုၚ်အိုတ်ရ။

ကြဴနူညးမၞုံအခေါၚ်ဟီုဂး အလဵုအသဳတံ ဒုၚ်ဝန်ဟီုဂးကၠုၚ် ပရေၚ်ထပက်ပၞာန်ဂၠံၚ်ကျာတုဲ ပရေၚ်ထပက်ပၞာန် ဂၠံၚ်ကျာဏံဂှ် စိုတ်လီုဗွဲမလောန်ရောၚ် ကၟိန်ဍုၚ်အမေရိကာန် ဟီုဓမံက်ကၠုၚ်ရ။

ပရေၚ်ဒပ်ပၞာန်အလဵုအသဳတံ ထပက်ပၞာန်ကျာ ကုဒပ်ပၞာန်ရပ်လွဟ် ကောန်ဍုၚ်အရၚ်ကချေၚ်ဂှ် ဂွိၚ်တဴဒၟံၚ်ရောၚ်၊ သွက်သ္ဂောံဒေံါပေဲါပၞာန်ကေုာံ ဂၠာဲနဲကဲခိုဟ်ခိုဟ်တုဲ သွက်သ္ဂောံဆဵုဂဗသဳကၠဳအာ၊ နူဂှ်မွဲကဆံၚ် ပရေၚ်ဟွံတုပ်သၟဟ်တံဂှ် သွက်သ္ဂောံပ္ညဳပ္ညပ်သဳကၠဳအာဂှ် ပ္ဍဲဂိတုဂျာန္နဝါရဳ ၂ ဏံ ကုလသမဂ္ဂ ဗတိုက်ဖအောဝ်လဝ်ကီုရ။

“အပ္ဍဲပေဲါပၞာန်အပ္ဍဲပွိုၚ် ၆၀ သၞာံဂှ် သုၚ်စောဲဇြဟတ်မၞိဟ် ဇြဟတ်သြန် ဗွဲဂၠိုၚ်တုဲ မပ္တံကဵု အစဳအဇန် ပလီုပန်ပလီု၊ ကၟာတ်ဂေတ်ပူကၠောံတံဂှ် ဗတိုက်ကၠုၚ် ဂကောံပၠန်ဂတး ကောန်ဍုၚ်အရၚ်တံကီုလေဝ် ဂကောံလဵုလေဝ် လီုလာ်သရိုဟ်အာ ဟွံမွဲပုဟ်။ အဆက်ဖဵုဏံဂှ် ညးဍုၚ်ကွာန်တံဟေၚ် အေၚ်ကၠောဝ်တုဲ ကၟိန်ဍုၚ်ဇကု ဒးလဇုဲလဇကၠုၚ်ခေတ်ဂှ် ထေက်ကဵုဒးကေတ်ခဏ်လ္ၚတ်ရ။ က္ဍိုပ်သကိုပ်ဂွံလဝ်အဝဵုတံ ယဝ်ရဆက်သောၚ်အာမံၚ် နကဵုလွဟ်ဏီတှေ် ညးတံဂှ် မွဲတ္ၚဲ ဒးက္ဍိုပ်အမှုညးဍုၚ်ကွာန်တံဏောၚ်” သာ်ဝွံ နာဲဟံသာ ဆက်ဟီုရ။

ကၟိန်ဍုၚ်ဗၟာဂှ် စပ္တံနူဂွံဗၠးၜး သၞာံ ၁၉၄၈ တေံတုဲ ဟွံသက်ဂတာပ်လအ်ကဵုဂိတုဂှ်ဟေၚ် မပ္တံကဵုကောန်ဍုၚ်အရၚ် မန်၊ ကရေၚ်တံ ပၠန်ဂတးကၠုၚ် နကဵုလွဟ်တုဲ ကတဵုဒှ်ကၠုၚ် ပေဲါပၞာန်အပ္ဍဲဍုၚ် စဵုကဵုလၟုဟ်ရောၚ်ဂှ် ဂွံဆဵုကေတ်ရ။