အေမဳ – စပတမ်နူဂိတုဖေဖဝ်ဝါရဳ ၁၅ ဏံတုဲ အပ္ဍဲကၟိန်ဍုၚ်သေံ ဍုၚ်စှ်ဍုၚ်ဂှ် ကၠောန်ပတိတ်ကဵု တၞးလိက်တတ်ကၠောံဍုၚ်ယာယဳ ဗွဲမပြဟ်ပြေဟ်လောဲသွာ ဟွံဒးလဇတ္ၚဲ One-Stop-Service ကုကောန်ဍုၚ်မန်ဗၟာရောၚ် ဂွံတီကေတ်ရ။
အတိုၚ်လိက်လလောၚ်ပရိုၚ် ရုၚ်ကလုတ်ဗၟာ မၞုံပ္ဍဲဍုၚ်ၜၚ်ကံက် မလလောၚ်ပ္တိတ် ပ္ဍဲဂိတုဂျာန္နဝါရဳ ၁၈ ဂှ်မ္ဂး နူရုၚ်ပါတ်သပအ်တတ်ကၠောံဍုၚ်ယာယဳ မၞုံအပ္ဍဲဍုၚ်သမုတ်သာခန် Samut Sakhon, သမုတ်ပရာကာန် Samut Prakan, ဇၚ်မာဲ Chaing Mai, သူရာတ်ဌာနီ Surat Thani, ပထုမ်ဌာနီ Pathon Thani, ကာန်ချနပူရီ Kanchaniburi, ရယံၚ် Rayong, ဃောန်ခါန် Khon Kaen, သံၚ်ခလာ Songkhla, နခေါန်ရာတ်ချာဇြဳမာ Nakhon Ratchasima ၁၀ ဍုၚ်ဂှ် ပတိတ်ကဵုစၟတ်တဲရောၚ် ဂွံတီကေတ်ရ၊
လိခ်လလောၚ်တြးရုၚ်ကလုတ်ဗၟာ(IMNA)
သအာၚ်နူဂှ်ပၠန် သွက်ကောန်ဇာတ် ညးမဗ္ဒဗ္ဒဲါ မၞုံသၟဝ်အာယုက် ၁၅ သၞာံတံဂှ်လေဝ် ပတိတ်ကဵုလိက်သက်သဳ Certificate of Identity ကီုရောၚ်ဂှ် ချူဓမံက်လဝ် ပ္ဍဲလိက်လလောၚ်ပရိုၚ် ရုၚ်ကလုတ်ဗၟာဂှ်ရ။
နကဵုအလဵုအသဳသေံတံလေဝ် နူဂိတုဖေဖဝ်ဝါရဳ ၁၅ စဵုစိုပ်ဂိတုမေ ၁၅ ပွိုၚ် ၁၂၀ တ္ၚဲ ပ္တိတ်ကဵု ဗဳသာအခေါၚ်မံၚ်စံၚ် ကေုာံ စၟတ်တဲအခေါၚ်ကၠောန်ကမၠောန် Work Permit ဟွံဒးလဇတ္ၚဲ One-Stop-Service ပ္ဍဲဗဒိုပ်ပ္တိတ်ကဵု လိက်တၞးတတ်ကၠောံဍုၚ်ယာယဳ ၁၀ ဒၞာဲဂှ်ရောၚ် ဂွံတီကေတ်ရ။
ညံၚ်သ္ဂောံကၠောန်သာ်ဝွံမာန်ဂှ် ကဆံၚ်ပထမ နူဂိတုဂျာန္နဝါရဳ ၁၅ စဵုစိုပ်ဖေဖဝ်ဝါရဳ ၁၅ မဒးပတိုန်စရၚ်လုပ်အဝေါၚ်သၞောဝ် ပ္ဍဲဌာနသၟာကမၠောန်သေံ မကြပ်ညောန်ကဵုဇကု နူတၠကမၠောန်ဇကုမွဲကဆံၚ်ရ။
နကဵုအလဵုအသဳဗၟာ ညံၚ်သ္ဂောံပ္တိတ်ကဵု လိက်တၞးတတ်ကၠောံဍုၚ်ယာယဳ အပ္ဍဲဍုၚ်သေံဏံမာန်ဂှ် ပ္ဍဲဂိတုဂျာန္နဝါရဳ ၁၅ ဏံ သ္ပဒတန်ကၠုၚ် ပ္ဍဲကောံဓရီုအလဵုအသဳဍုၚ်သေံရောၚ် ဂွံတီကေတ်ရ။
သွက်လိက်တၞးတတ်ကၠောံဍုၚ်ဏံဂှ် အိုတ်သြန်သေံ ၆၀၀၀ ၜါတ်တုဲ ကုညးစလိၚ်အကြာ ဟွံလုပ်ဗဗွဲသၞောဝ်တံဂှ်လေဝ် ကေတ်အာအရေဝ်ရောၚ်ဂှ် အမာတ်ကလုတ်ဗၟာ မၞုံပ္ဍဲဍုၚ်ၜၚ်ကံက် ဟီုလဴဏာကဵု သၟာပရိုၚ်ဂမၠိုၚ်ရ။
သၟာကမၠောန်ကောန်ဍုၚ်မန်ဗၟာ ၜိုတ် ၂ ပြကောဋိကိုဋ်တံဂှ် ကၠောန်ဒၟံၚ်ကမၠောန် ပ္ဍဲဍုၚ်သေံအိုတ်တုဲ အတိုၚ်စရၚ် ဌာနဝန်ဇၞော်သၟာကမၠောန်ဍုၚ်ဗၟာမ္ဂး လၟိဟ်မၞိဟ် ၜိုတ်မွဲပြကောဋိကိုဋ်ဘာ်ဟေၚ် ရပ်လဝ်လိက်တၞးတတ်ကၠောံဍုၚ်ရောၚ် ဂွံတီကေတ်ရ။
0 Comments