Dawei Watch – သကိုပ်ဝန်ဇၞော် ရးတၞၚ်သဳကေုာံ ဂကောံဂှ် အာလ္ၚတ်သၞေဟ်ဍာ်ဒမျိုဟ်ကေုာံ ဇြုၚ်ပရေၚ်စက် မၞုံပ္ဍဲဍုၚ်သေံရောၚ်ဂှ် နူဥူအေဟာန် မဒှ်ဒု- ညးအုပ်ကာ ဂကောံအလဵုအသဳ ရးတၞၚ်သဳရ။

တရဴဝွံ နူဂိတုဂျာန္နဝါရဳ ရ စဵု ၁၂ လအ်ပွိုၚ်မသုန်တ္ၚဲတုဲ အာလ္ၚတ်ဇြုၚ်ပရေၚ်စက်လဵု၊ အာဒၞာဲလဵု မပ္တံကဵုလၟေၚ်တရဴညးတံ ချိုတ်ချိုတ်ပၠိုတ်ပၠိုတ်ဂှ် ဟွံတီဏီရောၚ် ဥူအေဟာန် ဟီုရ။

“ကုမ္ပဏဳ အဳတာလျာန်-ထာဲ စဳဇန်လဝ်ဏောၚ်။ ပြဟ်ပြဟ်ဏံ အာဇြုၚ်ပရေၚ်စက်လဵုရောဂှ် ဟွံတီဏီပုဟ်” သာ်ဝွံ ဥူအေဟာန် သောၚ်ထ္ၜးရ။

ပ္ဍဲဒေသထဝဲါဂှ် ကမၠောန်လဵု ဓမံက်ရုပ်ရဴထေက်ရော သွက်သ္ဂောံကဵုကသပ်သဳကၠဳဂှ် မ္ဒးအာလ္ၚတ်တရဴဏံရောၚ် သာ်ဝွံ ညးဒေသထဝဲါ ဥူကျဝ်ဥူ မဒှ်တၠကမၠောန်ပရေၚ်ပိုန်ဒြပ် မပါဗက် ကရောံသကိုပ်ဝန်ဇၞော်ဂှ် ဟီုရ။

ပ္ဍဲလၟေၚ်တရဴဝွံ ဒုဝန်ဇၞော် ၃ တၠ နူဌာနဝန်ဇၞော် ဒုၚ်ကာပရေၚ်မၞိဟ် ကေုာံ ကလေၚ်ဖျေံဒၞာဲဝါ၊ ဂကောံအလဵုအသဳ ရးတၞၚ်သဳ ကေုာံ တၠကမၠောန်ပရေၚ်ပိုန်ဒြပ် ဒေသတံလေဝ် ပါလုပ်ကီုရ။

“အဓိက သွက်ဒေသဇကု မုကၠောန်တှေ် ကိတ်ညဳရောဂှ် ပိုဲအာလ္ၚတ်ဏောၚ်” သာ်ဝွံ ဥူကျဝ်ဥူ ဟီုရ။

သအာၚ်နူဏံပၠန် အာဒၞာဲဍုၚ်မဟ္ၚာဲ ဒၞာဲသၟာကမၠောန် ကောန်ထဝဲါတံ နွံဂၠိုၚ်ဂှ်တုဲ ညံၚ်ရဴဗဒိုပ်ဗျူလၟောၚ် မကၠောန်မာန် ဇရေၚ်ဍုၚ်မေတ္တာ ကေုာံ ဒေသဒဵုပိမတံဂှ်လေဝ် အာလ္ၚတ်ကီုရောၚ်ဂှ် ဥူကျဝ်ဥူ ဟီုရ။

ကုမ္ပဏဳ အဳတာလျာန်-ထာဲဝွံ ပ္ဍဲဂိတုသေပ်တေမ်ပါ သၞာံ ၂၀၁၂ ဂှ် ဖအောန်ဖျေံရှေဝ်ယာညးတံ နူ ၅၁ တၟံကၠံ စဵု ၂၅ တၟံကၠံရ။

ကုမ္ပဏဳ အဳတာလျာန်-ထာဲဝွံ ကာလစဓမံက်ရုပ်ရဴ ကိုန်စဳဇန်ထဝဲါဂှ် ပါလုပ်ကၠုၚ် နဒဒှ်ညးဓမံက်ရုပ်ရဴကီုလေဝ် ဟိုတ်နူအခက်အခုဲပရေၚ်ဘဏ္ဍာ ကေုာံ အခက်အခုဲနာနာတုဲ ပြံၚ်လှာဲထောံ နဒဒှ်ကိုန်စဳဇန် အလဵုအသဳသေံကေုာံ အလဵုအသဳဗၟာ ဆက်စၠောံကၠောန်ဗဒှ်ရ။