အဇာတာ – ဂျာနေဝ်သြၚ်လောန်တာၚ်(မ်) ဝွံ ဟိုတ်နူပရေၚ်ခက်ခုဲသြန်တုဲ ဇူလဝ်မွဲခဏကီုလေဝ် ပ္ဍဲဂိတုဂျာန္နဝါရဳ ၁၀ ဏံ ဆက်ပ္တိတ်အာ အတိုၚ်တြေံပၠန်တုဲ ယဝ်ရအကာဲအရာ ကဵုကၠုၚ်မ္ဂး သီုတၞးအပဵု ဘာသာမန်လေဝ် ပ္တိတ်အာကီုဏောၚ် သာ်ဝွံ ဂကောံညးဒါန်လိက် နာဲမေန်မေန်နဲ ဟီုရ။
ဂျာနေဝ်သြၚ်လောန်တာၚ်(မ်)
“ဂိတုဏံ စၟတ်တ္ၚဲ ၁၀ ဂှ်တှေ် ဆက်ပ္တိတ်အာ အတိုၚ်တြေံပၠန်ဏောၚ်။ ပြဟ်ဟ်ဏံ ပရိုၚ်နူရးတနၚ်သဳ၊ တွဵုရးဍုၚ်မန် ကေုာံ တွဵုရးဍုၚ်ကရေၚ်တံ ချူဒၟံၚ်တုဲ ညံၚ်ဂွံပ္တိတ်ကဵု ဘာသာဗၟာကီုဂှ် ပုရိသာတ်တံ အာတ်မိက်ကၠုၚ်လဝ် နွံ။ ဂွိၚ်ဖေက် ဂျာနေဝ်သြၚ်လောန်တာၚ်(မ်) ပ္တိတ်ဟွံမာန် ဒေံါအာဂှ် ညးဗှ်လိက်တံ ဒှ်မံၚ်ဓဝိၚ်ဏောၚ်” သာ်ဝွံ နာဲမေန်မေန်နဲ ဟီုရ။
ဂျာနေဝ်သြၚ်လောန်တာၚ်(မ်) ဝွံ အဓိက သ္ပသ္ဇိုၚ်ကဵု ပရိုၚ်ရးတနၚ်သဳ၊ တွဵုရးမန် ကေုာံ တွဵုရးကရေၚ်တုဲ ပရိုၚ်ဒေသတံ ညံၚ်ဂွံပ္တိတ် ဘာသာမန်မာန်ဂှ် စဳဇန်ဒၟံၚ်ရောၚ် ညးဆက်ဟီုရ။
နူသၞာံ ၂၀၁၂ ဂိတုဒဳဇြေမ်ဗာ ၂၈ ဂှ် ညံၚ်ဂွံပ္တိတ် ဘာသာမန်မာန် နူဌာနဝန်ဇၞော် လလောၚ်ပရိုၚ်ကၟိန်ဍုၚ် ကဵုကၠုၚ်အခေါၚ်တုဲ နူမပ္တိတ်ဒၟံၚ်ဗတ်ဗၟာ မွဲဘာသာဓဝ်ဂှ် ဆက်ပ္တိတ်အာ သီုဘာသာမန်ကီုရောၚ် ဂွံတီကေတ်ရ။
“ပြဟ်ဟ်ဏံ ဂွံလဝ်အခေါၚ်ပ္တိတ် ဘာသာဗၟာ မွဲဟေၚ်တုဲ ညံၚ်ဂွံပ္တိတ် သီုမန်၊ ဗၟာ ၜါဘာသာမာန်ဂှ် ပိုဲတံ ဆက်ပ္တိုန်ထ္ၜးမံၚ်ဏီ။ သီုမန်သီုဗၟာတှေ် လၟိဟ်အုပ်ဂှ် ဒးဂလိုၚ်ပ္တိုန် ၜိုတ် ၂၀၀၀ ဏောၚ်” သာ်ဝွံ နာဲမေန်မေန်နဲ ဟီုရ။
ပုရိသာတ် ဗှ်လိက်တံဝွံ ပရောပရာ မက္တဵုဒှ်ဒၟံၚ် ပ္ဍဲဒေသဇကုဂှ် ဂွံဗှ်တီကေတ် နူဂျာနေဝ်သြၚ်လောန်တာၚ်(မ်) ဂှ်ရ ဒးဂၞပ်စိုတ်တုဲ စပ်ကဵုပရိုၚ်ကေုာံ လညာတ်တံဂှ် ဟိုတ်နူနှဴရဴဒၟံၚ်ဂှ်ရ ပ္ဍဲအရာချူဆန် ဍိုန်လျဒၟံၚ်ညိညရောၚ် သာ်ဝွံ ပုရိသာတ် ဗှ်လိက် ဂျာနေဝ်သြၚ်လောန်တာၚ်(မ်) မွဲတၠ နာဲမၚ်မွဲ ဟီုရ။
“တၚ်ခိုဟ်တံဂှ် ဟိုတ်နူချူလဝ် ဗတ်ဗၟာတုဲ သွက်မၞိဟ်ဗှ်လိက်မန် ဟွံဂွံတံလေဝ် ဂွံတီကၠုၚ် ပရောမန်ဇကုကီု၊ မၞိဟ်ဗှ်လိက်တံလေဝ် ပရောဇကု ပါကၠုၚ် ပ္ဍဲဂျာနေဝ်သြၚ်လောန်တာၚ်(မ်) တှေ် မိပ်စိုတ်ရဒှ်။ ဆဂး ဗှ်အာပရိုၚ်တံဂှ်တှေ် လညာတ်သၟာပရိုၚ်ဂှ် ဂၠိုၚ်နူပရိုၚ်ဏီတုဲ သွက်မၞိဟ်ဗှ်လိက်တံ ဇီုကပိုက်ကၠုၚ်ကဵု ဓဝ်ပတှေ်လ္တူပရိုၚ်ညးတံရ” သာ်ဝွံ ညးဆက်ဟီုရ။
ပ္ဍဲသၞာံ ၂၀၁၂ ဂိတု၊ ဒဳဇြေမ်ဗာ ၃၀ ဂှ် နူဂျာနေဝ်သြၚ်လောန်တာၚ်(မ်) ကၠောန်ဗဒှ် ပေဲါကောံဓရီုမွဲ သောၚ်ကလး သြန်လုပ်/တိတ်၊ ပါ်ပရအ်ရှေဝ်ယာတုဲ သဳကၠဳအာ လၟေၚ်ပရေၚ်ကမၠောန်ဂတတေံကီုရ။
တၚ်သ္ဂုတ်သွာတ် မဂွံနူပေဲါကောံဓရီုတံဂှ် မၞိဟ်လုပ်ရှေဝ်ယာတၟိတံ ဟွံပါလုပ်ဏီကီုလေဝ် နကဵုဇြဟတ်သြန် အတိုၚ်ရှေဝ်တြေံဟေၚ် ဆက်ပ္တိတ်အာတုဲ သီုဘာသာမန် ညံၚ်ဂွံပ္တိတ်အာဂှ် ဂွံကၠုၚ်တၚ်တုပ်စိုတ်ရောၚ် သာ်ဝွံ နာဲမေန်မေန်နဲ ဟီုရ။
ဂျာနေဝ်သြၚ်လောန်တာၚ်(မ်) ဝွံ နူသၞာံ ၂၀၁၂ ဂိတုမေ ရ တေံ မွဲဂိတုမွဲဝါ၊ လက္ကရဴဂှ် မွဲဂိတုၜါဝါ ပ္တိတ်ကၠုၚ်တုဲ သၞာံ ၂၀၁၂ ဂိတုဒဳဇြေမ်ဗာ ၁၂ ဒှ်အလန်လက္ကရဴအိုတ် လၟိဟ် (၁) ကၞပ် (၁၂) ဂှ် ဒေံါဇူအာ မွဲချိုန်ခဏတုဲ သွက်လၟိဟ် (၂) ကၞပ် (၁) ဂှ် လၟုဟ်ဆက်ပ္တိတ်အာပၠန်ရောၚ်။
