အဇာတာ – ပ္ဍဲကွာန် မၞုံပ္ဍဲဒေသခရိုၚ်ထဝဲါ တိဍာ်ဗော်ဍုၚ်မန်တၟိ ထိၚ်ဒဝ်လဝ်ဂှ် ဂကောံရပ်လွဟ် က္ဍိုပ်နာဲလောန်၊ နာဲသိုၚ်တံ ဗက်ဒၟံၚ်အကံက်တုဲ ကတဵုဒှ်ပေဲါဗတိုက်ကဵု ဒပ်ပၞာန်ဗၠးၜးကောန်ဂကူမန် ဗော်ဍုၚ်မန်တၟိ ပ္ဍဲဂိတုဒဳဇြေမ်ပါ ၂၈ တေံဂှ်ရ သၟတ်မွဲတၠ ဒးလွဟ်တုဲ မဒးစုတိအာရောၚ်ဂှ် ဂွံတီကေတ် နူညးဒေသတံရ။

“ကောန်ၚာ်တြုံ ချိုတ်အာဂှ် ဃောအာပလံၚ် အကံက်သြန် ဒးဒုၚ်ပန်တုဲ ဒးပတိုန်ဏာ ရုၚ်ဂဥုဲဇၞော် ဍုၚ်မတ်မလီု။ ဃောဝဳမံၚ်ဂှ် စုတိအာ ပ္ဍဲရုၚ်ဂဥုဲ” သာ်ဝွံ ညးဒေသမွဲတၠ ဟီုရ။

သၟတ်မဒးစုတိအာဂှ် မၞုံယၟု မာံအံၚ်ဍုၚ်၊ မၞုံအာယုက် ၁၇ သၞာံ၊ မဒှ်ကောန် နာဲညိၚ်၊ မိမိမိဝေန်၊ မဒှ်ကောန်ကွာန်ဌာန်ဇၞူ ပွိုၚ်ဍုၚ်ဍာ်ဗု၊ ရးတၞၚ်သြဳရ။

မာံအံၚ်ဍုၚ်ဝွံ ဃောအာပလံၚ်သြန်အကံက်ဂှ် ဂကောံရပ်လွဟ်ဗက်အကံက်ကဵု ဒပ်ပၞာန်ဗော်ဍုၚ်မန်တၟိတံ ဒှ်ပေဲါဗတိုက်တုဲ ဒးအာဝပ်ဂှ်ရ ပ္ဍဲဂိတုဂျာန္နဝါရဳ ၃ ဏံဂှ် စုတိအာ ပ္ဍဲရုၚ်ဂဥုဲမတ်မလီုရောၚ်။

ပ္ဍဲဂိတုဒဳဇြေမ်ပါ ၂၉၊ သၞာံ ၂၀၁၂ အခိၚ်နူဂယးဂှ်လေဝ် ကောန်ဂကောံ က္ဍိုပ်နာဲလောန်၊ နာဲသိုၚ် လၟိဟ်ၜိုတ် ၁၀ တၠ ကေုာံ ကောန်သ္ဂံၚ် ခရိုၚ်ထဝဲါ ဗော်ဍုၚ်မန်တၟိ ၁၃ တၠတံ ကတဵုဒှ်ပေဲါဗတိုက် ၜါဝါကီုရောၚ်ဂှ် ကမ္မတဳခရိုၚ်ထဝဲါ ဗော်ဍုၚ်မန်တၟိ မွဲတၠ ဟီုရ။

စပ်ကဵုကိစ္စ သၟတ်မစုတိအာဏံဂှ် လပါ်ဗော်ဍုၚ်မန်တၟိ ဆက်လ္ၚတ်မံၚ်ဖိုဟ်တုဲ လတူသၟတ်ဏံ စုတိအာဂှ် နူကဵုဗော်ဍုၚ်မန်တၟိ သွက်ဂွံကဵုအာၚုဟ်လေဲလမျီု ဗွဲမထေက်ကြိုက်မာန် ခြာဟွံလအ် ဖျေံအာသ္ဂုတ်သွာတ်ရောၚ် သာ်ဝွံ နာဲဗညာလဴ မဒှ်ဥက္ကဋ္ဌ ခရိုၚ်ထဝဲါ ဗော်ဍုၚ်မန်တၟိ ဟီုရ။