မာံတဵုလွဳ – ဆေၚ်စပ်ကဵု ဟွံစကာသုၚ်စောဲကောန်ၚာ် အပ္ဍဲပဋိပက္ခရပ်လွဟ်ဂှ်တုဲ အတိုၚ်ဝတ်တာလျိုၚ် ဒးဒ္ဂေတ်ဗက် အပ္ဍဲလိက်ကသုက် မချုက်လဝ်ကဵု Geneva Call ဂှ် ကၠောန်ဗဒှ်ပေဲါသဳကၠဳ လှာဲဂတးလညာတ် ပ္ဍဲဍုၚ်သၚ်ခလပူရဳ၊ ဍုၚ်သေံ ပ္ဍဲဂိတုဂျာန္နဝါရဳ ၁၂-၁၃ ဏံရ။
ပေါဲသဳကၠဳ လှာဲဂတးလညာတ် Geneva Call(IMNA)
“သွက်ဂွံစဵုဒၞာကောန်ၚာ် အပ္ဍဲပေဲါပၞာန်ရပ်လွဟ်မာန်ဂှ် အတိုၚ်ဗော်ဍုၚ်မန်တၟိ ချုက်လဝ်လိက်ကဵု ဂကောံ Geneva Call ဝတ်တာလျိုၚ်ဒးဒ္ဂေတ်ဗက်တံဂှ် သဳကၠဳလှာဲဂတးလညာတ်ရ” သာ်ဝွံ ညးမတိုန်စိုပ် ပေဲါလှာဲဂတးလညာတ် နာဲထောန် ဟီုရ။
ပ္ဍဲပေဲါလှာဲဂတးလညာတ်ဝွံ သောၚ်ကလးဏာ ၚုဟ်မးမဆေၚ်စပ်ကဵု ပရေၚ်ဗစာရဏာမၞိဟ် ဍုၚ်ဂလိုၚ်၊ စက်ယန်မၚ်လ္ၚတ်ရံၚ်စံၚ် ကတိကဝတ် ကေုာံ ဓမံက်ရုပ်ရဴဂမၠိုၚ်၊ တၚ်စၞောန် မၚ်လ္ၚတ်ရံၚ်စံၚ်ဂမၠိုၚ်ရ။
“အတိုၚ်ပိုဲချုက်လဝ်လိက်ကဵု ဂကောံ GenevaCall ဂှ် ပိုဲဆက်ထိၚ်ဒဝ်မၚ်မွဲအာဏောၚ်။ ဥပမာ ကိစ္စကောန်ပၞာန်ကောန်ၚာ်ေတှေ် နူသၞာံ ၁၉၇၁ တေံရ ဗော်ပိုဲ ဒၞာတာလဝ်နကဵုသၞောဝ်တုဲယျ” သာ်ဝွံ ညးလျိုၚ်ဆက်ဆောံဍုၚ်သအာၚ် ဗော်ဍုၚ်မန်တၟိ နာဲဟံသာဗိုန်ခိုၚ် ဟီုရ။
စပ်ကဵုပရေၚ်ဒၞာတာ စကာသုၚ်စောဲကောန်ၚာ် အပ္ဍဲပေဲါပၞာန်ဂှ်တုဲ ဗော်ဍုၚ်မန်တၟိ ကေုာံ ဗော်တဴတက်ကရေၚ်ဍာဲ (KNPP) တံဂှ် ပ္ဍဲဂိတုအဝ်ဂါတ် ၂၊ သၞာံ ၂၀၁၂ တေံ ထပက်စၟတ်တဲ တၚ်တုပ်စိုတ် ပ္ဍဲဍုၚ်ဂျဳနဳပါ၊ ကၟိန်ဍုၚ်သွေတ်သာလာန်တုဲရ။
ပ္ဍဲကာလချုက်လိက်ကသုက် Deep of Commitment – DoC ကေုာံ ဥက္ကဌ Geneva Call မၞုံယၟု E. Decrey Warner ဂှ်မ္ဂး စပ်ကဵု ပရေၚ်စဵုဒၞာ ကောန်ၚာ်သၟတ် မဒးဒုၚ်ဒဝ် ပ္ဍဲအရာပဋိပက္ခရပ်လွဟ် ပါလုပ် ၁၆ တၚ်ရ။
ပ္ဍဲလိက်ကသုက်ဂှ်မ္ဂး ဘာဗ္တောန်လိက် ဟွံသေၚ် ဌာန်ဒၞာဲကောန်ၚာ်တံ ရပ်စပ်သုၚ်စောဲမံၚ်မွဲမွဲဂှ် မဒးဝေၚ်ပဲါ နူပွမစကာပရေၚ်ပၞာန်တုဲ ပွမဒးဝေၚ်ပဲါ ကောန်ၚာ်တံ ပ္ဍဲပေဲါပၞာန်၊ ဇြုၚ်ပၞာန်၊ ပရေၚ်ဝေၚ်ပၞာန် ကေုာံ ကောန်ၚာ်တံ ဒးဒုၚ်ရပ်ထိၚ်လဝ်မ္ဂး ဒးဆက်ဆောံအတိုၚ်ပွဒ္ဂေတ်မၞိဟ်မွဲတုဲ ညံၚ်ဟွံကဵုဒး အမိၚ်ဂစိုတ် မပ္တံသာ်ဝွံ ပါလုပ်ရ။
ဗွဲတၟေၚ် တြုံ၊ ဗြဴ ဟွံပေၚ် အာယုက် ၁၈ သၞာံ သီုဖအိုတ်တံဂှ် စၟတ်သမ္တီ ကော်ခဴစကောန်ၚာ်တုဲ ပွမပကောံပကေဝ် (ဟွံသေၚ်) ပွမကဵုလုပ်ချဳဒရာၚ် ပ္ဍဲဒပ်ပၞာန် ကုကောန်ၚာ်သၟတ် ဟွံပေၚ်အာယုက် ၁၅ ဏီမ္ဂး သၞောဝ်ရုၚ်သၞောဝ်ဓဝ်ရာဇဝတ် ကၟိန်ဍုၚ်ဂလိုၚ်တံဂှ် ခုတ်ခဴစၟတ်သမ္တီလဝ် အမှုရာဇဝတ်ရ။
ထပက်စၟတ်တဲတုဲမ္ဂး အတိုၚ်တၚ်တုပ်စိုတ်ဂှ် ဒ္ဂေတ်ဗက် ဟွံဒ္ဂေတ်ဗက် နူဂကောံ Geneva Call လုပ်တိဍာ် ဂကောံမထပက်လဝ် စၟတ်တဲတံဂှ်တုဲ အခေါၚ်ကၠုၚ်စၟဳစၟတ်တိုက်ရိုက် မၞုံရ။
ပ္ဍဲအရာပရေၚ်စဵုဒၞာကောန်ၚာ်၊ ပရေၚ်ဂီုကၠီုဘဝညးဗြဴ၊ ဟွံစကာသုၚ်စောဲမာၚ်တိုပ်တိတံဂှ် ဂကောံရပ်လွဟ် ဟွံသေၚ်ကဵုအလဵုအသဳ နူဍုၚ်နာနာကေုာံ ဂကောံ Geneva Call မၞုံအာယုက် ၄၀ သၞာံပြၚ်တံ ထပက်ကၠုၚ်စၟတ်တဲတုဲ ဖျေံသဇိုၚ် ပ္ဍဲဍုၚ်ဂျဳနဳပါ၊ ကၟိန်ဍုၚ်သွေတ်သာလာန်ရ။
