အဇာတာ – တ္ၚဲကဵုဒါန်ဆီ ဂကူမန် မရနုက်ကဵု ၃ ဝါဂှ် ကၠောန်ဗဒှ်ဏာ လ္တူဍုၚ်မတ်မလီု၊ ဍုၚ်မုဟ်ဍုၚ်ကေုာံ ဍုၚ်ဇြပ်ဗုတံပိဒၞဲါတုဲ ခမဳသၚ်၊ ဂကောံသၟတ်ကဵုကွးဘာတံကီု ကဵုလဝ်ဒါန်ဆီရ။
စၟတ်သမ္တီ တ္ၚဲကဵုဒါန်ဆီဂကူမန် မရနုက်ကဵု ၃ ဝါ
အသေအဟာန် ကဵုဒါန်ဆီလ္တူဍုၚ်မတ်မလီုဂှ် ကၠောန်ဗဒှ် ဒၞာဲဘာဇၞူတၠရတ် ပ္ဍဲစၟတ်တ္ၚဲ ၃ ဂိတု ဖေဖဝ်ဝါရဳဂှ်တုဲ ခမဳသၚ်မန် ၅၀ ဇကုကဵု ကွးဘာတက္ကသဵု ၁၅ တၠတံ အာကဵုဒါန်ဆီပ္ဍဲရုၚ်ဂဥုဲဇၞော်ဍုၚ်မတ်မလီုကေုာံ ရုၚ်ဂဥုဲ ၚိုဲမဵုဂှ် ညးက္ဍိုက်ပ်ဂကောံ ရာမညလောဟိတ တၠဂုဏ် ဥက္ကံသ(ကော်)ဇြဝ်လာတ် ဟီုမြော်ရ။
လ္တူဍုၚ်မုဟ်ဍုၚ်ဂှ် ခမဳသၚ်ပွိုၚ်ဍုၚ်မုဟ်ဍုၚ်အပံၚ် ၜိုတ် ရ၀ ဇကုကဵု သၟတ်ၜိုတ် ၂၀တၠ၊ လ္တူဍုၚ်ဇြပ်ဗုဂှ် ခမဳသၚ်မန် ကေုာံ သၟတ်တံ ၜိုတ် ၁၀၀ တၠ ကဵုလဝ်ဒါန်ဆီဂှ် တၠဂုဏ်က္ဍိုက်ပ်ဂကောံ ကဵုဒါန်ဆီ ရာမညလောဟိတ တၠဂုဏ် သုခဟံသာဟီုမြော်ရ။
ရန်တၟံကဵုဒါန်ဆီဏံဂှ် သွက်မၞိဟ်ဒိုက်ဝါတ်ယဲ သြန်ဟွံမွဲတံ အခိၚ်ဟွံရုဲသွက်ဂွံ သုၚ်စောဲဆီမာန်ကီု သွက်ဂွံဒှ်စရာဲဂုဏ်ဖဵု အလုံဂကူမန်တံကီုတုဲ ကဵုကၠုၚ်ဒါန်ဆီရောၚ်ဂှ် တၠဂုဏ် သုခဟံဟာဟီုရ။
သ္ပဟိုတ်နူကဵု တၠဂုဏ် ဥက္ကံသ(ကော်) တၠဂုဏ် ဇြဝ်လာတ် ဒးဒုၚ်ရပ် စုတ်ထံၚ် ပ္ဍဲဂိတု ဂျာန်နဝါရဳ (၇) ၂၀၁၀ သၞာံ (၁၃၆၈ ဂိတုပုဟ် ၈ စွေက်) ဂှ် စၟတ်သမ္တီကၠုၚ် တ္ၚဲကဵုဒါန်ဆီမန်ရောၚ် တၠဂုဏ် သုခဟံသာ ဟီုရ။
“တ္ၚဲဏံဂှ် စနူသၞာံ ၂၀၀၇ တေံ တၠဂုဏ် ဥက္ကံသ ချဳဒရာၚ်ကၠုၚ်လဝ်တုဲ ဗွဲကြဴဒးဒုၚ်ရပ်ကဵု အလဵုအသဳရ။ ဒုၚ်သ္ဇိုၚ်ကဵု တ္ၚဲတၠဂုဏ် ဥက္ကံသ ဒးဒုၚ်ရပ် ပ္ဍဲကဵု ဂိတု ပုဟ် ၈ စွေက် ၁၃၆၈ ဂှ်တုဲ ပိုဲတံ စချဳဒရာၚ် ဒက်ပ္တိုန်ကၠုၚ် တ္ၚဲကဵုဒါန်ဆီရ” ဂှ် တၠဂုဏ် သုခဟံသာ ဆက်ဟီုမြော်တဴရ။
တ္ၚဲကဵုဒါန်ဆီဝွံ စနူသၞာံ ၂၀၀၇တေံရ တၠဂုဏ် အဇ္ဇ(ကော်)ဇဝ်လာတ် စဒက်ပ္တိုန် ကဵုကၠုၚ်ဒါန်ဆီတုဲ ဗွဲလက္ကရဴ ခမဳသၚ်မန်တံ စချဳဒရာၚ်ကၠုၚ် လၟုဟ်ပေၚ်စိုပ် ၃ ဝါရ။
0 Comments