နာဲမာန် – ဂကူညးတၞဟ်ပလီုဒၟံၚ် ကောန်သၟတ်မန်ပိုဲ နကဵုပရေၚ်ဂဥုဲၜူမာဲဂှ် သၟတ်ပိုဲက္ဍဟ် လ္ပဒုၚ်လီုညိ၊ လ္ပသုၚ်စောဲဂဥုဲၜူမာဲညိ သာ်ဝွံ ဥက္ကဌ ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ပွိုၚ်ဍုၚ်ဇြပ်ဗု ‘ကျာ်ဇၞော်အ္စာသဳလဝန္တ’ ဘာဟံသာထဝ်ဍုၚ်ဇြပ်ဗု ဟီုကဵုသတိ ကုသၟတ်ကွးဘာ ပ္ဍဲသဘၚ်စှေ်ဘာ နူတနေံတေံရ။
နူတနေံတေံ ဂိတုပသာ် (၉) စွေက်၊ June 2 ဂှ် ဂကောံဗ္တောန်လိက်ပတ်မန် ဥတုကညၚ် ပွိုၚ်ဍုၚ်ဇြပ်ဗု ကၠောန်သ္ပသဘၚ်စှေ်ဘာ ပွိုၚ်ဍုၚ်ဇြပ်ဗု ဒၞာဲဘာဟံသာထဝ်ထဝ်တုဲ ညးမဒှ် ဥက္ကဌဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ကျာ်ဇၞော်အ္စာသဳလဝန္တ ဟီုကဵုဏာ သတိကဵုသၟတ်ကွးဘာဂမၠိုၚ် သာ်ဂှ်ရ။
ပ္ဍဲကဵုသဘၚ်စှေ်ဘာ ဥတုကညၚ်ပွိုၚ်ဍုၚ်ဂှ် ဂကောံကမ္မတဳလိက်ပတ်ယေန်သၞာၚ်ပွိုၚ်ဍုၚ်ကီု ဂကောံဗ္တောန် လိက်ပတ်မန် ကေုာံ ယေန်သၞာၚ်ဗုဒ္ဓဘာသာကီု ဂကောံဗော်ပရေၚ်ဍုၚ်ကွာန်မန်ဂမၠိုၚ်ကီု ဂကောံအစောန်စရာဲညးဗြဴမန် (မိစဴဗု) ကီု သီုသၟတ်ကွးဘာဖအိုတ် ဗၞတ် (၉၀၀) တိုန်စိုပ်ရ။
စပ်ကဵုပရေၚ်သၟတ်မန်တံ သုၚ်စောဲဒၟံၚ် ဂဥုဲၜူမာဲဂှ် ကတဵုဒှ်ဒၟံၚ် ဇၟာပ်ဍုၚ် ဇၟာပ်ကွာန် အလုံရးဍုၚ်မန်မွဲတုဲ ဂကောံမဟာဇန်နာနာ၊ ဗော်ပရေၚ်ဍုၚ်ကွာန်နာနာ ဂကောံခမဳသၚ်ကျာ်ဇၞော်အ္စာဂမၠိုၚ် ဒှ်ဓဝိၚ် သၟတ်တံဒ္ဂေတ်ပဋိပတ် လီုလာ်တုဲ ဆဝ်ဗ္ၚုဟ်ကဵုဒၟံၚ်သတိကဵုသၟတ်တံ ညံၚ်ဟွံဂွံသုၚ်စောဲ ဂဥုဲၜူမာဲရ။
“ပရေၚ်ဂဥုဲၜူမာဲဂှ် သုၚ်စောဲဍေံတုဲတှေ် ဂုဏ်ဖဵုသွက်သၟတ်ပိုဲ မုဟွံမွဲပုဟ်၊ ညးမကၠောန်ဒၟံၚ် ပရေၚ်ပိုန်ဒြပ်တံ ညးမတက်ပလီုဒၟံၚ်က္ဍဟ် သၟတ်ကောန်ဂကူပိုဲတံရ ပတိတ်ဏာပရဲရောၚ် ဟိုတ်ဂှ်ရ ဂဥုဲၜူမာဲဂှ် သၟတ်တံ လ္ပသုၚ်စောဲညိ အန္တရာဲသွက်ဂကူပိုဲကီု အန္တရာဲသွက်သၟတ်တံကီု အန္တရာဲဇၞော်ဇၞော်မွဲရောၚ်” သာ်ဝွံ ကျာ် ဇၞော်အ္စာသဳလဝန္တ ထပ်ကဵုသတိရ။
ညးမဒှ်ဥက္ကဌ ဂကောံအစောန်စရာဲညးဗြဴမန် အ္စာၝောံ ‘မိအုမ်ယျဳ’ ဂှ်လေဝ် “ အဲဂွံဆဵုကေတ် လၟိဟ်ကွးဘာ ဂလိုၚ်ဏံဂှ် အဲမိပ်စိုတ်ကွေံကွေံရ ကွးဘာဂလိုၚ်ဏံ နကဵုအဲမွဲလှေ်လေဝ် ဟွံကေၚ်ဆဵုဏီရ၊ လၟိဟ်ဂၠိုၚ်တုဲတှေ် ဍာ်ဒကေဝ်လေဝ် ဒးနွံကီုမှ ကာလဂှ်မှ ပရေၚ်လိက်ပတ်မန်ပိုဲကီု ပရေၚ်ယေန်သၞာၚ်မန်ပိုဲကီု ပရေၚ်ကောန်ဂကူပိုဲကီု ဂွံအာစိုပ်တရဴမာန်ရောၚ်” သာ်ဝွံ ဥက္ကဌဂကောံအစောန်စရာဲညးဗြဴမန် အ္စာဗြဴ ‘မိအုမ်ယျဳ’ ဟီုရ။
ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ပွိုၚ်ဍုၚ်ဇြပ်ဗုဂှ် စပ္တံနူ တန်ယေန်သၞာၚ်၊ တန်ဝၚ်ဟံသာဝတဳ၊ တန်အဘိဓရ်၊ တန်ဝၚ်လိက်ပတ်မန်၊ တန်ဝၚ်မတ္တမ၊ တန်သုဝဏ္ဏဘုံ၊ တန်လောကနိတိ ကဵု တန်အခိုက်ကၞာမန် ကွးဘာနူကဵုကွာန်ဂမၠိုၚ် လုပ်သွဟ် ပ္ဍဲကဆံၚ်ပွိုၚ်ဍုၚ်ရ။
ကွးဘာလုပ်သွဟ်လဝ် ပ္ဍဲကဵုကဆံၚ်ပွိုၚ်ဍုၚ်ဂမၠိုၚ်ဂှ် တန်ယေန်သၞာၚ်ဂှ် မိမြဟ်သန် နူကွာန်အနေၚ်ဂှ် ကလိဂွံလာပ်ပထမ၊ တန်ဝၚ်ဟံသာဝတဳဂှ် မိကောန်ထဝ် ကွာန်ကျာ်ပန်ဂှ် ပထမ၊ တန်အဘိဓရ်ဂှ် မိလျးဂကူ နူကွာန်နေၚ်ဂှ် ပထမ၊ တန်ဝၚ်လိက်ပတ်မန်ဂှ် မိအီကျေဝ် နူကွာန်တံၚ်ဖလုတ်ဂှ် ပထမ၊ တန်မုတ္တမဂှ် မိမာဂျူရဳ နူကွာန်တံၚ်ဖလုတ်ဂှ် ဂွံပထမ၊ တန်သုဝဏ္ဏဘုံဂှ် မိပ္ကဴသစ္စ နူကွာန်ကြုၚ်ကြုက်ဂှ် ဂွံပထမ၊ တန်လောကနိတိဂှ် မိအီထဝ် နူကွာန်ကြုက်ပိဂှ် ပထမ၊ တန်အခိုက်ကၞာမန်ဂှ် မၞုံယၟု မိသိုက်နန် ကွာန်သၞေဟ်ကိုၚ်ဂှ် ကလိဂွံလာပ်ပထမအိုတ်ရ။
ကွးဘာဥတုကညၚ် သွက်ဂွံလုပ်သွဟ် ပ္ဍဲကဆံၚ်ပွိုၚ်ဍုၚ်ဖအိုတ် ပၠုပ်လဝ်စရၚ် နွံ (၈၀၈) တၠတုဲ လုပ်သွဟ်ဂှ် (၇၅၃) တၠရ၊ ပ္ဍဲဂှ် ကွးဘာအံၚ် (၅၈၄) တၠတုဲ ကွးဘာ ကျဂှ် (၁၆၉) တၠရ။
