ခတ္တာနန် – အခိုက်ကၞာယေန်သၞာၚ် ကောန်ဂကူကောန်ဍုၚ်အရၚ် ပေဲါပြိုၚ် ချူဆန်၊ ဒယှေ်၊ လှေ်၊ တိၚ်တိုက် မရနုက်ကဵု ၂၀ ဝါ ကၠောန်ဗဒှ်လဝ် လ္တူဍုၚ်မတ်မလီု သၞာံဏံ ညးလုပ်ပြိုၚ်အောန် စှေ်အာ အစာကွိၚ်ကွိုက် နာဲထဝ်ပိုန် ဟီုရ။

ပေဲါပြိုၚ် ချူဆန်လှေ်ဒယှေ်တိၚ်တိုက် မရနုက်ကဵု ၂၀ ဝါ သၞာံ ၂၀၁၃ ဏံ ကၠောန်ဗဒှ်ဏာ အပ္ဍဲဂိတုအံက်တဝ်ပါ ၁၀ စဵုကဵု ၁၂ ဒၞာဲၝောံခန်တွဵုရးဍုၚ်မန်ကဵု ဘာတန်သၠုၚ် ၅ ဍုၚ်မတ်မလီု ပွိုၚ် ၃ တ္ၚဲဂှ် ဝန်ဇၞော်တွဵုရး ဥူအုၚ်မျေအ် ကေုာံညးတာလျိုၚ်အလဵုအသဳတွဵုရးဂမၠိုၚ်တံ တိုန်စိုပ်လဝ်အခန်ကၞာဂှ် ဂွံတီရ။

အ္စာနာဲထဝ်ပိုန်ဂှ်“သၞာံဏံ ကဏ္ဍပြိုၚ်ဂှ်လေဝ် အောန်မံၚ်၊ ပရေၚ်ပလေဝ်ပလေတ်လေဝ် ဟွံမွဲစကွေဟ်ဟ်၊ လ္ၚဵုဂှ် စုတ်လဝ်စရၚ်တုဲ ကၠုၚ်စိုပ်ဟွံမာန်လေဝ်နွံ” သာ်ဏံ ဟီုရ။

ပေဲါပြိုၚ် ချူဆန်လှေ်ဒယှေ်တိၚ်တိုက်ဝွံ သၞာံတုဲတုဲကၠုၚ်တေံဂု် ညးစၞးနူ ၁၀ ပွိုၚ်ဍုၚ် အပ္ဍဲတွဵုရးမန်တံ လုပ်ပြိုၚ်ကီုလေဝ် အပ္ဍဲသၞာံဏံဂှ် ပွိုၚ်ဍုၚ်သဓီု၊ ၜဳကလေၚ် ကေုာံ ကျာ်ထဝ်တံ ကၠုၚ်စိုပ်လုပ်ပြိုၚ်ဟွံမွဲရ။

သၞာံတုဲတုဲကၠုၚ်တေံဂှ်တှေ် ဂကောံလှေ်အခိုက်ကၞာဒိၚ်မန် မကလိဂွံလဝ် လာဘ်ပဌမဂှ် သီုကဵုအာလှေ်ထ္ၜးလဟိၚ်လဝ်ကဵု အပ္ဍဲသ္ဘၚ်ပံက်အခန်ကၞာ ချူဆန်ဒယှေ်လှေ်တိၚ်တိုက် အလုံဍုၚ်ဗၟာ ကုဇရေၚ်ဍုၚ်နေပျဳတဝ်တေံရ၊

“ပ္ဍဲသၞာံဏံဂှ်တှေ် ပေဲါ Sea Game နွံမံၚ်တုဲ အပ္ဍဲနေပျဳတေံ သ္ဂောံကၠောန်ဗဒှ်ုအာ ပေဲါလှေ်ဒယှေ်တိၚ်တက်ဂှ် အစဳဇန်ဟွံဒှ်ရပုဟ်” သာ်ဏံ အ္စာနာဲထဝ်ပိုန် ဆက်ဟီုရ။

ပေဲါပြိုၚ်လှေ်ဒယှေ်တိၚ်တက် တ္ၚဲကၠာအိုတ်ဂှ် ကဏ္ဍဗၟာဂမၠိုၚ်၊ တ္ၚဲဒုတိယဟှ် ကဏ္ဍပြိုၚ်ဗကာန် ဂဳတအနုသုခုမဂကူမန်တံဒှ်တုဲ တ္ၚဲလက္ကရဴအိုတ်ဂှ် ပအပ်ပြာပ်လာဘ်သကာ ကုညးဂွံဇၞးတံရ။

“အပ္ဍဲကဵုတူရိယာမန်ဂှ်တှေ် ကျာံကဵု ဂြဝ်ရ ပြိုၚ်လဝ်၊ ဗါတ်ကိုၚ်ကဵု ခၞဲဂှ် မၞိဟ်လုပ်ပြိုၚ်ဟွံမွဲပုဟ်၊ ဂြဝ်ဂှ်လေဝ် မၞိဟ်မွဲရ လုပ်ပြိုၚ်တုဲ ကဵုဏာလာဘ်သ္ဍိုက်မၠိုက်တၟေၚ်ရ” သာ်ဝွံ ညးဗက်တက်ကဵုလဝ်ခ္ဍေဝ်ခၞုက် မိမဵုမဵု ဟီုရ။

ပေဲါပြိုၚ် တူရိယာကျာံဂှ် နာဲမျဝေန် ပွိုၚ်ဍုၚ်ကျာ်မြဟ် ပဌမ၊ မာံသိုက်လောန် ပွိုၚ်ဍုၚ်မုဟ်ဍုၚ် ဒုတိယ၊ မာံသိုက်လောန်ဆာန် ပွိုၚ်ဍုၚ်မတ်မလီု တတိယ၊ ဂကောံလှေ်ဒိၚ်မန်ဂှ် ပွိုၚ်ဍုၚ်မုဟ်ဍုၚ် ပထမ၊ ပွိုၚ်ဍုၚ်ဇြပ်ဗု ဒုတိယ၊ ပွိုၚ်ဍုၚ်မတ်မလီု တတိယ သကလိဂွံအာလဝ် လာဘ်ဂမၠိုၚ်ရ။

စပ်ကဵုကၠောန်ဗဒှ် ပေဲါပြိုၚ်ချူဆန်လှေ်ဒယှေ်တိၚ်တက်ဂှ် သၞာံတုဲကၠုၚ်ဏံ ကဏ္ဍကောန်ဍုၚ်အရၚ်တံ ဂွံအခေါၚ်ပါလုပ်ပြိုၚ်ဗကာန်ကၠုၚ်တုဲ ပေဲါပြိုၚ်ချူဆန်လှေ်ဒယှေ်တိၚ်တိုက်မန်ဂှ်ုလေဝ် စုတ်ကၠုၚ်မွဲကဏ္ဍကီုရ။

အပ္ဍဲကဵု အခန်ကၞာ ပေဲါပြိုၚ်လှေ်ဒယှေ်တိၚ်တက်ဂှ် အတိုၚ် အလဵုအသဳတၟိပိုဲဖျေံလဝ် တၚ်သ္ကုတ်သွာတ်ဂှ်ရ နကဆံၚ်တွဵုရး ကၠောန်ဗဒှ်အာမံၚ် ပေဲါပြိုၚ်လှေ်ဒယှေ်တိၚ်တိုက်ဂှ်တုဲ ပိုဲတံလေဝ် ဂွံထိၚ်ဒဝ်အာ ယေန်သၞာန်ပိုဲကီုရ သာ်ဏံ ဝန်ဇၞော်တွဵုရးမန် ဥူအုၚ်မျေအ် ဟီုဏာလဝ်ဂလာန်ကီုရ။

လက်ထက်အလဵုအသဳ မဆလ တေံဂှ် သ္ပဒတန်စၟတ်သမ္တီလဝ်တွဵုရးမန်တုဲ စနူသၞာံ ၁၉၇၅ ဂှ် ပေဲါပြိုၚ်ချူဆန်လှေ်ဒယှေ်တိၚ်တိုက် ကောန်ဂကူမန်တံ ဇၟာပ်ဂိတုမာတ်ချ် ၁၉ အရိုဟ်ဟ်သၞာံ ကၠောန်ဗဒှ်အာမံၚ် အပ္ဍဲသဘၚ်တ္ၚဲတွဵုရးမန် လ္တူဍုၚ်မတ်မလီု ဒဵုကဵု သၞာံ ၁၉၈၈ တေံ ဗွဲမမိပ်ဇြိပ်ကၠောန်ဗဒှ်ဏာလဝ်ရ သာ်ဝွံ သၟာဂဳတအနုသုခုမန်တံ ဟီုလဴကဵုရ။