သၟဟ်သၟန် – သွက်ဂွံသိုၚ်ခၞံ ၝောံခန်ကၠတ်ထဝ် တွဵုရးမန်သက်သက်ဂှ် ပ္ဍဲဗာတ်ဂျေတ် (သြန်ဘဏ္ဍာ) ရန်လဝ် သွက်ကၠတ်ထဝ် သၞာံ (၂၀၁၄-၁၅) ဏံ ချူဓဇက်ရန်လဝ် (၄၅၀၀) ကိုဋ်တုဲ သွက်ဂွံသိုၚ်ခၞံအာနွံရောၚ်ဂှ် ညးစၞးကၠတ်ထဝ်တွဵုရးမန် နူပွိုၚ်ဍုၚ်ၜါသွာၚ် နာဲအံၚ်နာၚ်ဥူဟီုရ။

“ဒၞာဲသ္ၚိကၠတ်ထဝ်ဂှ် ဇၟာပ်ညးဍုၚ်ကွာန် ညံၚ်ဂွံလုပ်တိတ်လောဲ၊ မိက်ဂွံဆဵုဥက္ကဌ ကၠတ်ထဝ်ကီု၊ မိက်ဂွံ ဆဵုကဵုအမာတ် ကီု ဂွံဆဵုလောဲ။ ဒၞာဲညးဍုၚ်ကွာန်ကဵု သၟိၚ်တံ တက်ကျာရ” သာ်ဝွံ နာဲအံၚ်နာၚ်ဥူ ဟီုရ။

ၝောံခန်ကၠတ်ထဝ်တွဵုရးမန်လၟုဟ်ဝွံ နွံမံၚ်အပ္ဍဲကဵုအရှာံကၠအ် ရုၚ်အလဵုအသဳတွဵုရး လပါ်လက္ကရဴတေံတုဲ ညးဍုၚ် ကွာန်တံ သွက်ဂွံလုပ်တိတ်ဂှ် ရောံဒညမံၚ်ရ။ ၝောံခန်ဂှ်လေဝ် သွက်ကၠတ်ထဝ်တၞဟ်ခြာဟွံသေၚ် သီုဗ္ဒမ်ဒုၚ် ကၟုဲလေဝ် သုၚ်စောဲမံၚ်ရ။

ပ္ဍဲကဵုအခန်ကၞာ စၟတ်သမ္တီ ကၠတ်ထဝ်တွဵုရးမန် ပေၚ် (၂) သၞာံဂှ် နာဲအံၚ်နာၚ်ဥူ ပ္တိုန်လဝ်ဂလာန် သွက်ဂွံသိုၚ်ခၞံအာ ရုၚ်ကၠတ်ထဝ် မ္ၚးအရှာံရုၚ်အလဵုအသဳတွဵုရးဂှ် ညးစၞးကၠတ်ထဝ်တံ စှေ်စိုတ်တုဲ တံၚ်ဓဇက်လဝ် ပ္ဍဲဗာတ်ဂျေတ် (သြန်ဘဏ္ဍာ) ကၠတ်ထဝ် လၟုဟ်ဏံရောၚ်ဂှ် ညးဆက်ဟီုရ။

ပ္ဍဲဍုၚ်မတ်မလီု တိဂအာၚ်သုသာန်ကြုက်တြေံ ဒၞာဲတိသၠာတ်မံၚ် ဗဒဲါတာန်လွေန်ဥယေန် (သံလွၚ်ဥယျာဉ်) ဂှ် နကဵု လက်သဏ် ဒေသမန် သီုရုပ်ၜိုပ်ကီု ကွတ်တဲဗဳသကဝ်တြေံ/တၟိ ပံၚ်ဗစပ်သိုၚ်ခၞံအာ တိုက်ပိထပ်ရောၚ်။ ဗဒမ် ကောံဓရီု ကၠတ်ထဝ်၊ ဗဒမ်ဒုၚ်ကၟုဲ၊ ရုၚ်ခန်ဥက္ကဌကၠတ်ထဝ်၊ ဒၞာဲကောံဓရီုကမ္မတဳကေၚ်ကာတံ ကၠောန်အာ အပ္ဍဲဂှ် ရောၚ်။ ပ္ဍဲအရှာံ ကၠတ်ထဝ်တၟိဂှ်ဝွံ သွက်ဂွံစွံပတန်ဒၞာဲ ညးဍုၚ်ကွာန်တံ ဗမံက်ဆန္ဒ၊ ကၠအ်ပ္ကဴ၊ ဌာနစွံကွဳစက်၊ တိုက်ရံၚ် လိက် ကလာစုတ်လိက် သွက်အမာတ်ညးစၞးကၠတ်ထဝ်တံလေဝ် စွံပ္တန်အာရောၚ် ဂွံတီကေတ်ရ။

“ကၠတ်ထဝ်ဟီုဂှ် သွက်အနာဂတ်ရ။ ကၠောန်သွက်အနာဂတ်ဂးတုဲ ဃရေက်ကၠောန် ဟွံထေက်ရ။ ဂၠာဲဒၞာဲသိုၚ် ၝောံခန်သ္ၚိကၠတ်ထဝ်၊ ဗီုပြၚ်သိုၚ်ခၞံကီု သြန်ဒါန်ကီု နူကဵုညးဍုၚ်ကွာန်တံလေဝ် ဒးပါလုပ်မ္ဂး ဂွံဒှ်စၞးညးဍုၚ်ကွာန်ရ” သာ်ဝွံ နာဲကျဳဇြဝ်လွေန် ညးလ္ၚတ်မံၚ် ပရေၚ်ကေၚ်ကာကၠတ်ထဝ်မွဲတၠ ဟီုပ္တိတ်လဝ် လညာတ်နွံရ။

သၟာၚ်နူကဵုရးဒေသဇၞော်လ္ဂုၚ်မွဲတုဲ သၟေဟ်ရးဒေသဇၞော် ကေုာံ တွဵုရးဂမၠိုၚ်တံဂှ် ၝောံခန်သ္ၚိကၠတ်ထဝ် တၞဟ်ခြာဟွံမွဲဏီရောၚ် ဂွံတီကေတ်ရ။