မာံပိုန် – ပ္ဍဲကဵုအလဵုအသဳကၟိန်ဍုၚ်ဗၟာတံ ဗ္ဂိန်ကဵုဒါန်အပ်ပြာပ်တဆိပ်ကြာ ဆေၚ်ကဵုသာသနာ ကုတၠဳပိုန်သၚ် သၞာံ (၂၀၁၄) ဏံဂှ် သၚ်မန်တံလေဝ် ပါလုပ်က္လိဂွံ (၃) ဇကုကီုရောၚ် အတိုၚ်မချူဗၟံက်လလောၚ်တြးလဝ် ပ္ဍဲကဵုလိက်ပရိုၚ် လၟေၚ်တ္ၚဲ အလဵုအသဳပ္တိတ် ပ္ဍဲစၟတ်တ္ၚဲ ၄-၁-၂၀၁၄ ဂှ် ဂွံတီကေတ်ရ။

တဆိပ်ကြာဆေၚ်ကဵုပ္တန်သာသနာ က္ဆံၚ်သၠုၚ်အိုတ် အဘိဓဇအဂ္ဂမဟာသဒ္ဓမ္မဇောတိကဓဇဂှ် ဘဒ္ဒန္တကေသရ ကျာ် ဇၞော်(ကျောက်တလုံး) ပွိုၚ်ဍုၚ်မုဟ်ဍုၚ်ကီု၊ အဂ္ဂမဟာသဒ္ဓမ္မဇောတိကဓဇဂှ် ဘဒ္ဒန္တဝဏ္ဏ ကွာန်ကံပံက် ဘာထဝ် ပွိုၚ်ဍုၚ်ကံကြိက် တွဵုရးကရေၚ်ကီု၊ တဆိပ်ကြာအ္စာလိက် မဟာဂန္ထဝါစကပဏ္ဍိတဂှ် ဘဒ္ဒန္တနန္ဒသာရ ဘာဒေါဝ်ပရိ ယတ္တိ ဍုၚ်ကျာ်ခမဳ ပွိုၚ်ဍုၚ်ဇြပ်ဗုကီု သ္ဂောံဒုၚ်ဗ္ဂိန်တဴအိုတ်ရ။

“သၞာံဏံ ပ္ဍဲကဵုသၚ်မန် ဂွံပိဇကုဂှ် လ္ပာ်ပ္တန်သာသနာ ၜါဇကု၊ လ္ပာ်အ္စာလိက်ဂှ် ဂွံမွဲဇကုရ၊ လ္ပာ်ပ္တန်သာသနာ ဂွံဏာ ၜါဇကုဂှ် ကမၠောန်ညးတံ သက်ဟီုဟွံမွဲမံၚ်ရ သိုၚ်ဘုတ်ဘာဏောၚ်၊ ပ္တန်ကျာ်စေတဳဏောၚ်၊ ဗွဲတၟေၚ် ကျာ်ဇၞော်ဘာ ဒေါဝ် ဍုၚ်ကျာ်ခမဳ ဂွံဏာဂှ် မိပ်စိုတ်တၟာဂလိုၚ်၊ မုပရောတှေ် လ္ပာ်ပရေၚ်ဂကူကီု ပရေၚ်ပရိယတ်ကီုဂှ် ညးကၠောန် ကွေံကွေံရောၚ်” သာ်ဝွံ ကျာ်ဇၞော်အ္စာကေတုမာလာ ဘာကံပလိုၚ် လၟိၚ်ကဵုသၞံၚ်တိုၚ်ရ။

ကျာ်ဇၞော်အ္စာတၠ ဘဒ္ဒန္တကေသရဂှ် က္လိဂွံအာယုက် (၉၃)၊ ဝှ် (၄၄) နွံပိုန်ဂ္ဇံဘာဝၚ်စိၚ် (ကျောက်တလုံး) ပွိုၚ်ဍုၚ်မုဟ်ဍုၚ်၊ ကျာ်ဇၞော်အ္စာတၠ ဘဒ္ဒန္တဝဏ္ဏဂှ် က္လိဂွံအာယုက် (၉၃)၊ ဝှ် (၆၉) မၞုံပိုန်ဂ္ဇံဘာ ကွာန်ကံပံက်၊ ဘာထဝ် ပွိုၚ်ဍုၚ်ကံကြိက်တုဲ ကျာ်ဇၞော်အ္စာ ဘဒ္ဒန္တနန္ဒသာရဂှ် က္လိဂွံအာယုက် (၆၀) ဝှ် (၄၀) မၞုံပိုန်ဂ္ဇံဘာပရိယတ္တိ ဘာဒေါဝ် ဍုၚ်ကျာ်ခမဳ ပွိုၚ်ဍုၚ်ဇြပ်ဗုအိုတ်ရ။

ကျာ်ဇၞော်အ္စာတၠ ကွာန်ကံပံက် ဘာထဝ် ကေုာံ ကျာ်ဇၞော်အ္စာ ဘာဝၚ်စိၚ်မ္ဂး ဆေၚ်ကဵုကမၠောန်ပ္တန်သာသနာ ပွမ ဒက်ကျာ်စေတဳ၊ ကျာ်ထွာဲတံဂှ် အလဵုဇကုညးတံ ကၠောန်ကၠုၚ်လဝ်ကေတ်တ်ရတုဲ ဒဵုကဵုစိုပ်အခိၚ်တ္ၚဲဏံမ္ဂး ညးတံ ပ္တန်လဝ်ကျာ်စေတဳ၊ ကျာ်ထွာဲ လုပ်လၟိဟ်ကဵုကၠံ ပ္ဍဲဒၞဲါဒေသဇဳနွံရောၚ် ဒကာဘာညးတံ ဟီုအိုတ်ရ။

“နူဘဝထပိုဲဍောတ်တ်တေံ ပိုဲကေၚ်တက်လဝ်ဍိုတ် ကရောံအ္စာတၠရ၊ ညးဂှ် မံၚ်ၜိုဟ်ဟ်ကွေံကွေံ၊ လ္တူကောန်ကွး ညးပၠန်လေဝ် နွံကဵုဓဝ်ဇြဟာန်ဆာန်ကၟိန်ရ၊ တုဲတှေ် ကွတ်တဲညးကၠောန်ဏာကျာ် သီုဖၟိုတ်တံဂှ် ဒှ်မံၚ်ဗွဲဗီုပြၚ်ဓဝ်ရ” သာ်ဝွံ ညးမကေၚ်တက်လဝ်ဍိုတ် သွက်အ္စာတၠဘာထဝ် သ္ဂောံပ္တန်ကျာ် နူဘဝဒှ်ထပိုဲမွဲတၠ ဒကာဘာဇၞော် နာဲအံၚ် မျေအ် ဂးရ။

ဆက်တုဲ နာဲကြက်လွဳမန် မဒှ်ကွးကျာ်ဇၞော် ဘာဝၚ်စိၚ်ဂှ်လေဝ် “ဆေၚ်ကဵုကမၠောန်ပ္တန်သာသနာတှေ် ညးကၠောန် သက်ဟီုဟွံမွဲရ၊ ညးဒက်ပ္တန်လဝ်ကျာ်တံဂှ်လေဝ် အလဵုဇကုညးဟေၚ် ပ္တိတ်ဗီုပြၚ်(ဒဳဇြာၚ်)တုဲ ကၠောန်လဝ်ရ၊ ဂိတုပှော် (၁၀) စွေက်ဏံတှေ် အာယုက်ညးပေၚ် (၉၄) ဂှ် ကၠောန်သဘၚ်မ္ၚဵုတ္ၚဲညးဒှ်မၞိဟ် မိပ်ပ်ဇြိပ်ပ်ပၠန်ရောၚ်” သာ်ဝွံ ဂးရ။

ပ္ဍဲသက္ကရာဇ် ၁၃၇၅ သၞာံ ဂိတုဖဝ်ရဂိုန် ၁၅ မံက် (၁၅-၃-၂၀၁၄) တေံမ္ဂး အလဵုဇကုသမတ အလဵုအသဳကၟိန်ဍုၚ် ဥူတုၚ်ဇြုၚ် က္ဍိုက်ပ်တုဲ သွက်သ္ဂောံဗ္ဂိန်ကဵုဒါန် ကုတၠဳပိုန်သၚ် ညးမက္လိဂွံတဆိပ်ကြာတံ ပ္ဍဲကဵုဍုၚ်နေပျဳတဝ်တေံနွံဂှ်ရ ဒါယကာဘာ၊ ဒါယကာဗျဉ်ကျာ်ဇၞော်အ္စာတံလေဝ် ပရဟ်ဒုၚ် ပလေဝ်ပလေတ်မံၚ်အိုတ်ယျရောၚ် ဂွံတီကေတ်ရ။