သၟဟ်သၟန် – ပ္ဍဲသက္ကရာဇ်ဍုၚ် ၁၃၇၅ သၞာံ ဂိတုဖဝ်ရဂိုန် (၆) မံက်ဂှ် စပံက်အာဘာဗ္တောန်လိက်မန်ဥတုကညၚ် အလုံပွိုၚ်ဍုၚ်မုဟ်ဍုၚ် မွဲတ္ၚဲဓဝ်ရောၚ်ဂှ် ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ပွိုၚ်ဍုၚ်မုဟ်ဍုၚ်တံ လၟိၚ်လလောၚ်တြးလဝ် ပ္ဍဲဂိတုဖဝ်ရဂိုန် (၄) မံက်ဂှ်ရောၚ် ဂွံတီကေတ်ရ။
ဟိတဓရ ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ပွိုၚ်ဍုၚ်မုဟ်ဍုၚ်ဂှ် “ဂကောံဟီုဂှ်တှေ် ဍေံဂွံဒှ် မွဲပဠောပ်၊ ဍေံဂွံဒှ်မွဲစန်ရ။
နူကဵုဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ပွိုၚ်ဍုၚ်မုဟ်ဍုၚ်ဏံ နွံမံၚ် (၁၁) ပွိုၚ်တိုက်ဂှ်တှေ် ဒးဒှ်မွဲတ္ၚဲဓဝ်ဏောၚ်ဂှ် ရုဲလဝ်တ္ၚဲဗီုဂှ်ရ” သာ်ဝွံ ဘဒ္ဒန္တကုမ္မာရ ဟီုရ။
ယဝ်ရပံက်ဘာလဇုဲမ္ဂး ကွးဘာလ္ၚဵု အာတိုန်ယေန်သၞာၚ်ဗုဒ္ဓဘာသာ အလဵုအသဳကီု အာတိုန်ကျူယှေန်ကီုလေဝ် ဒှ်မာန်ရ။ အခိၚ်ကွးဘာတံ သွဟ်လိက်ဘာအလဵုအသဳတုဲဗက် ပံက်ဘာမ္ဂး ကွးဘာတံလေဝ် စိုတ်ဟွံပြးအာ လပါ်ဝေၚ်ရောၚ် ညးဆက်ဟီုရ။
ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ပွိုၚ်ဍုၚ်မုဟ်ဍုၚ်ဂှ် စဒက်ပ္တန်လဝ် နူသက္ကရာဇ် (၁၃၅၄) သၞာံတေံတုဲ လၟုဟ်မ္ဂး နကဵုလၟိဟ်ပွိုၚ်တိုက် (၁၁) ပွိုၚ်တိုက် ပါလုပ်ဒက်ပ္တန်လဝ် ပ္ဍဲက္ဆံၚ်ပွိုၚ်ဍုၚ် မဒှ်ရ။
စနူကဵုဂိတုဖဝ်ရဂိုန် (၆) မံက်ဂှ် ပံက်ဗ္တောန်ရောၚ်တုဲ ဂိတုစဲ (၅) မံက်မ္ဂး သွဟ်လိက်ကဆံၚ်ပွိုၚ်တိုက်တုဲ ဂိတုစဲ (၈) မံက်ဂှ် သွဟ်လိက်ကဆံၚ်ပွိုၚ်ဍုၚ်ရောၚ်။ ဂိတုစဲ (၁၀) မံက်မ္ဂး ကၠောန်သ္ပသ္ဘၚ်စှေ်ဘာမန် ပွိုၚ်ဍုၚ်မုဟ်ဍုၚ် မရနုက်ကဵု (၂၂) ဝါ ပ္ဍဲကဵုဋ္ဌာနပွိုၚ်တိုက် ဒဵုမာဲ-ဆက်တဲ ဘာတြေံ ကွာန်ဒဵုမာဲရောၚ်။
“ပံက်ဘာအခိၚ်ပြဟ်ဟ်ဏံဂှ် ဒှ်အခက်ခုဲ ဂၠာဲအ္စာဘာစေတနာ ဟွံလောဲကွေံကွေံပုဟ်။ သၚ်တံလေဝ် ဟွံဂွံသွဟ်လိက် အလဵုအသဳဏီ။ အရီုအဗၚ် နူကွးဘာ (၁၀) တန်ကဵု ကွးဘာတက္ကသိုလ်တံလေဝ် ဟွံဂွံပေၚ်ၚ်ပုဟ်လေဝ်” သာ်ဝွံ ညးတာလျိုၚ်ပွိုၚ်တိုက်နာၚ်သၠုၚ် အ္စာဘာမန်မွဲတၠ ဟီုထ္ၜးရ။
တုပ်သၟဟ်သာ်ဂှ်ကီု အပ္ဍဲကဵုပွိုၚ်ဍုၚ် ဂကူမန်တံ မၞုံတန်တဴဂၠိုၚ်ဂှ်လေဝ် သွက်ဂွံပံက်ဗ္တောန်အာ တန်ဗ္တောန်လိက်ပတ်မန် အခိၚ်ဥတုကညၚ်မာန်ကီုဂှ် က္ဆံၚ်ကွာန်ညးကုညး ပလေဝ်ပလေတ်မံၚ်နွံရောၚ် ဂွံတီကေတ်ရ။
သဘၚ်သၟာန်သွဟ်လိက်ပတ်မန်ဥတုကညၚ် အလုံဒေသရးမန် သၞာံဏံဂှ် ပ္ဍဲစၟတ်တ္ၚဲ ၁၈-၅-၂၀၁၄ မ္ဂး ကၠောန်ဗဒှ်အာ ပ္ဍဲဘာဒေါဝ်သာသနာ ၂၅၀၀ ဍုၚ်မတ်မလလီုရောၚ်တုဲ စၟတ်တ္ၚဲ (၂၃-၅-၂၀၁၄) မ္ဂး ကၠောန်သ္ပသဘၚ်စှေ်ဘာ ဥတုကညၚ် အလုံဒေသရးမန် အာပ္ဍဲဘာဒေါဝ်သာသနာ ၂၅၀၀ ရောၚ် သာ်ဝွံ အတိုၚ်သ္ဂုတ်သွာတ်ကောံဓရီု ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန် ပွိုၚ်သၞာံ မရနုက်ကဵု (၁၅) ဝါဂှ် ဖျေံလဝ်နွံရ။
