ပေါဲသၟာန်သွဟ်လိခ်ပရိယတ္တိ(internet)
ညးမကောပ်ကာဲ ပေဲါသၟာန်လိက် ကျာ်ဇၞော်ဘာဟံသာထဝ် ဍုၚ်ဇြပ်ဗုဂှ် “ပ္ဍဲပေဲါသၟာန်လိက်သၞာံဏံဂှ် ခၟဳသၚ်လုပ်သွဟ်တံ ဂၠိုၚ်ကၠုၚ်နူသၞာံအာတေံ ကၠံပြၚ်ၚ်ရ” သာ်ဝွံ ဟီုမြော်ရ။
ပ္ဍဲကဵုပေဲါသၟာန်လိက်ပရိယတ္တိမန် ရာမညနိကာယဂှ် ပါဠိပါရဂူ (၅) ဇကု၊ သဳရိပဝရ (၄) ဇကု၊ ဓမ္မာစရိယ (၂၅၇) ဇကု၊ တန်ဇၞော် (၁၇၂) ဇကု၊ တန်လဒေါဝ် (၁၅၆) ဇကု၊ တန်ဇၞော် (၄၉၆) ဇကု ကေုာံ တန်မူလ (၇၀၃) ဇကု မဒှ်တုဲ ထ္ပိုဲသာမဏဳဂမၠိုၚ်၊ ခၟဳသၚ်မဂၠိုၚ်ကဵု သဳလဂမၠိုၚ်ကီု အပံၚ်သီုဖအိုတ် ညးလုပ်စိုပ်သွဟ် (၁၇၉၃) ဇကု နွံရောၚ်ဂှ် ဂွံတီကေတ် နူကဵုစရၚ်စၟတ်သမ္တီဂှ်ရ။
ပ္ဍဲကဵုပေဲါသၟာန်လိက်ဂှ် ကျာဇၞော်(သြဝါဒစရိယ)ဂမၠိုၚ်၊ ကျာ်ဇၞော်ကောပ်ကာဲဂမၠိုၚ်၊ ကျာ်ဇၞော်စၟဳစၟတ်လိက် ကေုာံ ကျာ်ဇၞော် (စာထောက်) ဂမၠိုၚ် သီုဖအိုတ် ၜိုတ် (၂၀၀) ဇကု နွံရောၚ်ဂှ်လေဝ် ကျာ်ဇၞော်ဂှ် ဟီုမြော်ဏာရ။
သၟာၚ်နူဂှ်ပၠန် အသေအဟာန်ကဵုလာပ် ကုညးအံၚ်ဇၞးပေဲါသၟာန်လိက်ဂမၠိုၚ်တံဂှ်ဝွံ သၞာံတုဲကၠုၚ်တေံဂှ် ကၠောန်ဗဒှ်လဝ် ပ္ဍဲဍုၚ်ဇြပ်ဗုတုဲ သၞာံဏံဂှ် ကၠောန်ဗဒှ်အာ ပ္ဍဲဘာကၠအ်ပၞဟ်၊ ဍုၚ်မုဟ်ဍုၚ်ရောၚ် သဂးရ။
စၞအဟာရဘောဇိုန် ကေုာံ ပိုန်ပိဏ္ဍပါတ်ဂမၠိုၚ် သွက်ခၟဳသၚ်သွဟ်လိက်ဂမၠိုၚ်ဂှ်ဝွံ ဂကောံသၟတ်မန်(ရာမာန်) ဍုၚ်မတ်မလီု၊ ဂကောံသၟတ်မန် ဇၟာပ်ဒေသဂမၠိုၚ် ကေုာံ ကောန်ကွးဘာဂမၠိုၚ်တံ အာစိုပ်ကဵုလဝ်ဒါန်ရောၚ်ဂှ် ကွးဘာတက္ကသဵုသၟတ်မန်မွဲတၠ ဟီုရ။
ကွးဘာတက္ကသဵုဂှ် “ကွးဘာတက္ကသဵု သၟတ်မန်ပိုဲတံ ပကောံတုဲ မွဲတ္ၚဲမၞိဟ် (၂၀) တၠပါ်တုဲ အာဒၞာဲသၚ်သွဟ်လိက် ဇၟာပ်တ္ၚဲရ။ သၞာံလောန်ကၠုၚ်တေံဂှ်လေဝ် ပါ်မၞိဟ်ဗီုဏံတုဲ အာကၠောန်သ္ပမံၚ်ရ။ နကဵုပိုဲမၞိဟ်သၟတ်တံ ကေတ်တာလျိုၚ် လ္ပာ်စၞစသတ်ဆု၊ ဍာ်ဍာတ်တ် (ဍာ်ယေမ) ကေုာံ စၞစဝေၚ်(ကွာၚ်ၜဲယိုဟ်ၜန်) ရ” သာ်ဝွံ ဟီုရ။
ရန်တၟံကဵု ပရေၚ်တဴတက်ဖောအ်ဗြေဝ်သာသနာကီု၊ ပွမထိၚ်ဒဝ် ညံၚ်ဟွံဂွံကၠေံကၠက်အာကီုဂှ်တုဲ ကၠောန်ဗဒှ်ဏာ ပေဲါသၟာန်လိက်ရောၚ်ဂှ် ကျာဇၞော်ဘာဟံသာထဝ် ဟီုမြော်ဂလာန်ရ။
အပ္ဍဲတ္ၚဲပေဲါသၟာန်လိက်ဂှ်ဝွံ ပိုန်မွဲတ္ၚဲ (၁၀) ကိုဋ်၊ ပိုန်မွဲဗ္ဂါပ် (၅) ကိုဋ်၊ ပိုန်မွဲခုၚ်(မွဲဝိုၚ်) (၅၀၀၀) မၞုံၚုဟ်မးတုဲ ညးကဵုဒါန်ဂမၠိုၚ် မိက်ဂွံပါလုပ်ကဵုဒါန်မ္ဂး ကဵုဒါန်ဇရေၚ်ဘာကျာ်သာသနာ (၂၅၀၀) မာန်ရောၚ်ဂှ် ဆဝ်မ္ၚုဟ်လဝ်ကီုရ။
ဂိုဏ်ရာမညနိကာယ ဆေၚ်စပ်ကဵုအလုံဒေသရးမန်ဂှ်ဝွံ ပံၚ်ကောံဒက်ပ္တန်လဝ်ကဵု ခၟဳသၚ်မန် မၞုံပ္ဍဲဂိုဏ်သုဓမ္မာ၊ မဟာယျေန် ကေုာံ ယိှဲုကျေန်ဂမၠိုၚ်တုဲ ပ္ဍဲကဵုကောန်ဂကူမန်ဂှ် မဒှ်ဂိုဏ်ဇၞော်ဗုဒ္ဓဘာသာ ကၞောတ်အထောဋ်ရ။
