မိလျးထဝ် – နူကဵုဂကောံယေန်သၞာၚ်ကောန်ဂကူမန် (ဍုၚ်သေံ) တံ က္ဍိုက်ပ်တုဲ အပ္ဍဲဂိတုအေပရဳ စၟတ်တ္ၚဲ ၂၃ အခိၚ် နူဂယး ၁၀ နာဍဳ ၃၀ မိနတ်ဂှ် ကၠောန်ဗဒှ်ဏာအခန်ကၞာ ပံက်ဘာတန်ဗ္တောန်သဇိုၚ်ကွိၚ်ကွိုက်မန် အလန်စတုတ္ထ ဒၞာဲဌာန်ဒတန်ယေန်သၞာၚ်ကောန်ဂကူမန် ကွာန်ဝၚ်က၊ ဍုၚ်သၚ်ခလပူရဳ ရနိဂီုဍုၚ်သေံ ရ။

အပ္ဍဲကဵု အခန်ကၞာပံက်ဘာတန်ဗ္တောန်ဂှ် ညးက္ဍိုပ် ဌာန်ဒတန်ယေန်သၞာၚ်ကောန်ဂကူမန် နာဲကသုမန်၊ သ္ကိုပ်တန်ဗ္တောန် နာဲဗညာအံက်ဗန်၊ အ္စာတန်ဗ္တောန် မိကောန်ထဝ်၊ ကွးဘာ ၂၀ တၠ ကေုာံ မိမကွးဘာကီု သီုကဵုညးစိုတ်လုပ်စတံ သီုဖအိုတ် ၜိုတ် ၃၀ တၠ တိုန်စိုပ်ရ။

“ဂွိၚ်ဖေက်ကွိၚ်ကွိုက် အခိုက်ကၞာမန်ပိုဲကၠေံကၠက်အာတုဲ မွဲသၞာံမွဲဝါ အခိၚ်ကောန်ၚာ်တံ ဘာကၟာတ်ဂှ် ပိုဲတံပံက်ကၠုၚ်မံၚ် ဘာကွိၚ်ကွိုက်ဏံရ၊ တုဲပၠန် အပ္ဍဲကဵုပံက်ဘာ အလန်စတုတ္ထဏံလေဝ် ရန်တၟံကဵု ကွးဘာတန်သၠုၚ်ကဵု ကောန်ဂကောံအပ္ဍဲရုၚ်တံ ဂွံပါလုပ်အာမာန်ကီုရ” သာ်ဏံ သ္ကိုပ်တန်ဗ္တောန် နာဲဗညာအံက်ဗန် ဟီုရ။

သွက်ဂွံပံက်ဘာတန်ဗ္တောန်ဏံဂှ် တၚ်ရန်တၟံ နွံမံၚ် (၃) တၚ်ဂးရ (၁) သွက်ဂွံမၚ်မွဲထိၚ်ဒဝ်အာ သဇိုၚ်ကွိၚ်ကွိုက်မန်ဂမၠိုၚ်၊ (၂) ညးသၟတ်မန်တံ ဂွံပါလုပ် ထိၚ်ဒဝ်အာ ကွိၚ်ကွိုက်မန် ပါလုပ်တိၚ်တက်မာန်၊ (၃) သွက်ဂွံထ္ၜးပျးအာကွိၚ်ကွိုက်မန် ပ္ဍဲဍုၚ်သေံ သီုကဵုပ္ဍဲဍုၚ်မန်တံ ပါလုပ်ရ သာ်ဝွံ နာဲဗညာအံက်ဗန် ဆက်ဟီုရ။

အစဳဇန်တန်ဗ္တောန်ဂမၠိုၚ်တံဂှ် ကိုပ်ကၠာအိုတ် ဒးလ္ၚတ်ဖ္ဍောတ် သၚ်္ကေတ Notation (၇) ရမျာၚ်တံဂှ်တုဲ ကဆံၚ်ဒုတိယဂှ် ဒးပကတ်ပကေၚ်အာ ခန်လ္ၚတ် (၁၈) ခန်လ္ၚတ် နကဵုဗါတ်ကဠာတုဲဂှ်မှ သွက်ဂွံပါ်ကေတ် တူရိယာဂကူတၞဟ်ဟ်တံ ဆက်ပကတ်ပကေၚ်အာပၠန်ရောၚ်။

ကွးဘာ မာံထဝ်လွဳဟီုဂှ်တှေ် “နကဵုအဲတှေ် ဒးစိုတ် တူရိယာကျာံရ၊ မုဟိုတ်ရောဟီုတှေ် ကျာံဂှ် ဍေံလ္ၚတ်ကျာတ်မံၚ် ဍေံလေဝ်တၟေၚ် နူတူရိယာတၞဟ်ဟ်တံရ” သာ်ဝွံ ညးဟီိုရ။

“သၞာံဏံဂှ် ပဲါနူကွးဘာအပ္ဍဲကွာန်ဝၚ်ကဏံတုဲ ပိုဲတံကော်ဘိက်လဝ် ကောန်ကွးဘာတၠုၚ်သၠုၚ် နူကဵုကွာန်စောဝ်ဇဗၠုတံကီုရ၊ အဓိကပိုဲတံ မိက်ဂွံသၠဲပတိတ် ပွဳပွိုၚ်ကွိၚ်ကွိုက်ပိုဲကီုရ” သာ်ဝွံ ညးက္ဍိုပ်ဌာန်ဒတန်ယေန်သၞာၚ်ကောန်ဂကူမန် နာဲကသုမန် ဟီုရ။

သၞာံဂတဏံမ္ဂး ရဲမၞံုံဒၟံၚ် အပ္ဍဲဒေသပယျဵု မပ္တံ ဍုၚ်ကျာ်ပိ၊ စောဝ်ဇဗၠု၊ ပလိုၚ်ဂျပါန်၊ ဂူၜဴ ကေုာံ ကွာန်တၞဟ်ဟ် မၞံုအပ္ဍဲတိဍာ်ဗော်တံဂှ်လေဝ် သွက်ဂွံကော်ဘိက်အာနွံရ သာ်ဝွံ ညးဆက်ဟီုရ။

ဘာတန်ဗ္တောန်သဇိုၚ်ကွိၚ်ကွိုက်ဏံဝွံ ကိုပ်ကၠာအိုတ် အ္စာကွိၚ်ကွိုက်မန် နာဲထဝ်ပိုန် က္ဍိုက်ပ်စပံက်ကၠုၚ်လဝ်အပ္ဍဲဂိတုဒဳဇြေန်ပါ သၞာံ ၂၀၀၉ ၊ အလန်ဒုတိယဂှ် သၞာံ ၂၀၁၀ စနူဂိတုသေပ်တေမ်ပါ ဒဵုကဵု ဂိတုဒဳဇြေန်ပါ ပွိုၚ် ၃ ဂိတု၊ အလန်တတိယဂှ် သၞာံ၂၀၁၂ ပံက်ကၠုၚ်လဝ် အပ္ဍဲဂိတုမာတ် ဒဵုကဵု ဂိတုအေပရဳရ။

အပ္ဍဲကဵုပံက်ဘာ အလန်စတုတ္ထဏံဂှ် စပံက်အာ နူဂိတုအေပရဳ စၟတ်တ္ၚဲ ၂၄ ဒဵုကဵု ဂိတု ဂျုန်တေံချိၚ်လဝ်တုဲ အ္စာတံဂှ် နူကဵုကွးဘာ ကေၚ်တိုန်လဝ် ဘာကွိၚ်ကွိုက်အလန်ပထမတံ ကေတ်တာလျိုၚ်တုဲ ဗ္တောန်အာကဵုရောၚ်။