လောန်ကၠုၚ်မွဲအခိၚ်တေံ အလဵုအသဳပၞာန်ဂှ် ပ္ဍဲသၞာံ (၁၉၉၃) ဍေံတအ် ဟွံမိက်ဗလးအဝဵုတုဲ ကော်မိက် သဘၚ်သဳကၠဳကောန်ဂကူ (အမျိုးသားညီလာခံ) မွဲတုဲ ချူတိုန်သၞောတ်ဝ်ဒက်ပတန်ဍုၚ် (၂၀၀၈) ရ။ ပရူချူဒတန်သၞောဝ်ဏအ်ဂှ် ဟိုတ်နူကဵုပဋိပက္ခပရေၚ်ဍုၚ်ကွာန်တုဲ လအ်အာ စဵုကဵု (၁၄) သၞာံရောၚ်။
ဆဂး သၞောတ်ဝ် (၂၀၀၈) တိတ်ကၠုၚ်ပၠန်ဂှ် ဟွံပတဝ်အာ ဂၠံၚ်တရဴဒဳမဝ်ကရေဇြဳရ။ ကေတ်နၚ်နဲကဲ ဍုၚ်အေန်ဒဝ်နဳသျှာတုဲ အဓိက ဒပ်ပၞာန်တအ် သွက်ဂွံပါလုပ် ပ္ဍဲအရာပကၚ်ရၚ် ပရေၚ်ဍုၚ်ကွာန်ရ။ ဒပ်ပၞာန်ဗၟာတအ်ဂှ် ဗွဲမဂၠိုၚ် နုက်တိတ် နူကဵုဒပ်ပၞာန်တုဲ လုပ်အာဗော်ပရေၚ်ဍုၚ်ကွာန် လုပ်ပြိုၚ်ပ္ဍဲကဵုပေဲါရုဲမာဲရ။ ပၞာန်လ္ၚဵုတအ်ဂှ် အတိုၚ်သၞောတ်ဝ်ဥပဒေကဵုလဝ်အခေါၚ်ဟေၚ် နကဵုကယျိုၚ်ပၞာန် လုပ်ကေတ်ခုၚ်အဝဵု ဗၞတ် (၂၅) တၟအ်ကၠံရ။ တၟော်အာ ဇေတ်တ်မ္ဂး ပ္ဍဲကဵုသ္ၚိစၠတ်ထဝ်ကၟိန်ဍုၚ် (သီုသ္ၚိစၠတ်ထဝ် ညးဍုၚ်ကွာန် ကဵု သ္ၚိစၠတ်ထဝ်ကောန်ဂကူ) တအ်ကီု ဒၞာဲစၠတ်ထဝ် တွဵုရး/ရးဒေသဇၞော်အိုသီုတံဂှ် ကောန်ပၞာန်ဗၟာရာံတအ်ကဵု ကောန်ပၞာန်ဗၟာ သီုကယျိုၚ်ပၞာန်တအ်ဟေၚ် ပေၚ်တၟိုဟ်မံၚ်ရ။
ပ္ဍဲပွိုၚ် (၃) သၞာံဏအ် သမတဥူတိၚ်သိၚ် အုပ်ဓုပ်ကၠုၚ် ဍုၚ်ကွာန်ဝွံ အတိုၚ်လဟီုဍေံတအ်တှေ် ညံၚ်ရဴ ဍုၚ်တဴတက်တိုန်တၟာဂလိုၚ်ရ။ ဆဂး ပ္ဍဲအရာ ဖျေံမံၚ်သၞောဝ်မွဲတုဲမွဲဂှ် ဗက်မံၚ်အတိုၚ်သၞောဝ်တြေံတေံဟေၚ်တုဲ စဵုကဵုဇၞော်မောဝ်ကွေံ ဟွံသေၚ်ရ။ ရံၚ်အာသၞောတ်ဝ်တအ် စဵုဒၞာကဵု ညးဍုၚ်ကွာန်ကွေံ ဟွံသေၚ်၊ ဒပ်ပၞာန်တအ် သီလဝ်တိဂှ် အလဵုအသဳတအ် ဗိုၚ်ဒၞာမံၚ်ကီု၊ သၞောဝ်မဳဒဳယာတိတ်မံၚ်တအ်ဂှ် ထိၚ်ဓရတ်လဝ်ကီု၊ သၞောဝ်ပရေၚ်ပညာဂှ် အတိုၚ်တြေံတေံဟေၚ် ဒှ်မံၚ်တုဲ ဟွံတဴတက်ရ။
ပရေံအိုတ်ဝွံ ဒပ်ပၞာန်တအ် ကေတ်လဝ်အဝဵု လတူညးစၞးညးဍုၚ်ကွာန်တအ်ဂှ် ပလေဝ်ညံၚ်ဟွံဂွံ ၝောံပိုဒ် (၄၃၆) ဂှ် ဒၞာလဝ်ရ။ အမာတ်ပ္ဍဲသ္ၚိစၠတ်ထဝ်ဖအိုတ် ဗၞတ် (၇၅) က္ဍိုပ်ကၠံ တုပ်စိုတ်တှေ် ပလေဝ်သၞောဝ်တအ် ဂွံတုဲ အဓိက သွက်ဂွံပလေဝ်ၝောံပိုဒ်ဏအ် ညံၚ်ဂွံဖၟောန်ဖျေံ (၇၅) က္ဍိုပ်ကၠံဂှ်ရောၚ်။ သၞောဝ်တၞဟ်ဟ်တအ်ဝွံ ဒၞာလဝ် ‘ဒေါ်အောၚ်ဆန်းစုကြည်’ ညံၚ်ဟွံဂွံဒှ်သမတရ။ တၟော်ကဵုဒးပ္လေဝ်သၞောဝ်တ်ှ်ေ ဒးပ္လေဝ်တၟာဂလိုၚ်ရောၚ်။
ယဝ်ရ သၞောတ်ဝ်ဥပဒေ (၂၀၀၈) ဏအ် ဟွံပ္လေဝ်မ္ဂး ဂၠံၚ်တရဴဒဳမဝ်ကရေဇြဳဂှ် အာဟွံစိုပ်ရ။ သ္ကိုပ်ပၞာန်တအ်ပၠန်လေဝ် ဟွံမွဲပၟိက် သွက်ဂွံပ္လေဝ်သၞောဝ်ဝွံရ။ ယဝ်ရ ဟွံပလေဝ်သၞောဝ် (၂၀၀၈) မ္ဂး ဒှ်ပရေၚ်ဆိုအ်ဗ သွက်ဂၠံၚ်တရဴဒဳမဝ်ကရေဇြဳသၟးဟွံသေၚ် သီုကဵုဆိုအ်ဗ ပရေၚ်တဴတက်ဍုၚ်ကွာန်၊ သီုအာ ဇီုကပိုက်ကဵု ပရေၚ်ဒေံါပန်ပှေ်ာ အလုံဍုၚ် ပရေၚ်ၜိုဟ်လလမ်အလုံဍုၚ်မာန်ရ။
ဟိုတ်ဂှ်ရ ဗော် NLD ကဵု ကွးဘာ (၈၈) တအ် သ္ပသ္ကိုပ်သ္ကတုဲ သွက်ဂွံပလေဝ်သၞောဝ် (၂၀၀၈) ကၠောန်သ္ပပေဲါသောၚ်ကလး ဟီုဂးရ။ သွက်ဂွံပလေဝ်သၞောဝ် (၂၀၀၈) ဂှ် ခက်ခိုအ် ဆိုအ်ဗမံၚ်ကဵု သ္ကိုပ်ပၞာန်ကဵု ဒပ်ပၞာန်တအ်ရောၚ်ဂှ်လေဝ် နူကဵု ‘ဒေါ်အောၚ်ဆန်းစုကြည်’ ကဵု ကွးဘာ ‘မၚ်းကိုနိုၚ်’ တအ် ဟီုပတိတ်ဒၟံၚ် ကၠးကၠးမးမးရ။ ယဝ်ရ ဒပ်ပၞာန်တအ် ဟွံမွဲပၟိက်ကဵု ပလေဝ်သၞောဝ်မ္ဂး ဒးဇီုကပိုက်ကဵု ညးဍုၚ်ကွာန်တံ တိုက်ရိုက်မာန်ရောၚ်ဂှ် ညးတအ် ဟီုတိုန်ကၠးကၠးမးမးရ။
ၜိုန်ရ “ဒေါ်အောၚ်ဆန်းစုကြည်” ကဵု “မၚ်းကိုနိုၚ်” တအ် ဟီုဂးမံၚ် သာ်ဏအ်ကီုလေဝ် လ္ပာ်ဒပ်ပၞာန်တအ် ဟွံသ္ပကေၚ်ကာကွေံ၊ ပ္ဍဲကဵု သ္ၚိစၠတ်ထဝ်တေံဂှ် ၜိုန်ရ ဒက်လဝ် ‘ကမ္မတဳပလေဝ်ချူသၞောဝ်’ ကၠာလေဝ် ကမ္မတဳဏအ်ဂှ် ဟီုဏာ ဟီုနၚ် ဗဂေတ်ဏာ ဂတးနၚ်ဒၟံၚ်တုဲ သၞောတ်ဝ်ထေက်ကဵုဒးပလေဝ်ဂှ် ညးတအ် ဟွံဟီုရ။
လၟုဟ်ဝွံ သွက်ဂွံပလေဝ်အာ သၞောတ်ဝ်ဥပဒေ (၂၀၀၈) ဂးတုဲ ဗော် NLD ကဵု ကွးဘာ (၈၈) တအ် ကော်မံၚ်ညးဍုၚ်ကွာန် သွက်ဂွံထ္ပက်စၟတ်တဲတုဲ ပတိုန်ထ္ၜးအာကဵု သ္ၚိစၠတ်ထဝ်တေံရောၚ်။ နကဵုဒြဟတ်ဒရိုဟ် ညးဍုၚ်ကွာန် သွက်ဂွံပလေဝ်အာတုဲ လၟုဟ်ဝွံ ညးဍုၚ်ကွာန်တအ် လၟိဟ်ဂၠိုၚ်လက်ကိုဋ် ကၠုၚ်ထ္ပက်ဒၟံၚ်စၟတ်တဲရ။
ယဝ်ရ ဒပ်ပၞာန်ကီုဒှ် သ္ၚိစၠတ်ထဝ်ကီုဒှ် ယဝ်ရ ဟွံကဠၚ်စ လညာတ်ညးဍုၚ်ကွာန်တအ်မ္ဂး ပေဲါထ္ၜးဆန္ဒ အလုံဍုၚ်အလုံကွာန် ကလိုက်ကမဵု ကတဵုဒှ်မာန်ရောၚ်ဂှ် ပတိုန်ထ္ၜးဏာရအဴ။
0 Comments