နကဵုအခန်ကၞာ လှေ်ဒ ယှေ် အခိုက်ကၞာယေန်သၞာၚ်မန် မဒှ်ရ။
ညးမပါလုပ် ဂကောံကမ္မတဳလိက်ပတ်ယေန်သၞာၚ်မန် ဗညာတိုန်နန်ဂှ် “ သဘၚ်ကၞာသၞာံဏံဂှ် ပ္တိုန်ထ္ၜးစဳပျးဏာကဵု ကပေါတ်ကွိၚ်ကွိုက်မန် ဍိုက်က်ပေၚ်ၚ်ရ။ သၞာံတုဲတုဲကၠုၚ်တေံဟီုတှေ် ပံက်ဒွက်တုဲ ဒယှေ်ရနွံ၊ ညံၚ်ဂွံဒုၚ်စရှ်သာ ပရေၚ်လှေ်ဒယှေ် အခိုက်ကၞာယေန်သၞာၚ်မန်မာန်ရ” သာ်ဝွံ ဟီုဂးဏာရ။
ပါမောက္ခတၠပညာအ္စာချုဝၚ်မန် ဒံက်တာနာဲပန်လှ (စုတိ) ချူဇန်လဝ် မၞုံယၟုဒွက် လျးကျာ်သြဳပိုဲမန် (“မွန်တို႕ဂုဏ်ရည်” ) ဂှ် နကဵုမန် – ဗၟာ ၜါဘာသာ ကွးဘာတက္ကသဵုဂမၠိုၚ် ဒယှေ်ပ္တိုန်ဂုန်စရာဲ ပံက်ဏာအခန်ကၞာရ။
နကဵုအစဳဇန် လှေ်ဒယှေ် ဒွက်အခိုက်ကၞာယေန်သၞာၚ်မန် စှ်ၜါရာသဳဂမၠိုၚ်၊ ဒွက်မန်ဂတာပ်ခေတ်ဂမၠိုၚ်ကဵု အစဳဇန်ဒွက် ဓမံက်ထ္ၜးကယျိုၚ်ကယျဝ် ယေန်သၞာၚ်မန်တံဂှ်လေဝ် ပ္တိုန်ထ္ၜးဏာလဝ် နွံကီုရ။
အခန်ကၞာဝွံ ပ္ဍဲဂိတုအဝ်ဂါတ် (၁၇)၊ စနူအခိၚ် နူဂယး (၉) နာဍဳ စဵုကဵု (၃) နာဍဳတ္ၚဲစေၚ်ဂှ် ကၠောန်ဗဒှ်ဏာ ပ္ဍဲ Golden Hall, Lion City Restaurant ပွိုၚ်ဍုၚ်ကမာယျောတ်၊ ဍုၚ်လ္ဂုၚ်ဂှ်တုဲ အ္စာဘာ/အ္စာၝောံ နူတက္ကသဵုဂမၠိုၚ်၊ ဂကောံကမ္မတဳလိက်ပတ်ယေန်သၞာၚ်မန် (လ္ဂုၚ်) ဂမၠိုၚ်ကဵု သီုကွးဘာဂမၠိုၚ်ကီု အပံၚ်သီုဖအိုတ် လၟိဟ်ၜိုတ် (၃၀၀) တၠပြၚ်ၚ် တိုန်စိုပ်အိုတ်ရ။
ကွးဘာသၟတ်ဗြဴ ညးမတိုန်စိုပ် အခန်ကၞာမွဲတၠဂှ် “ လၟုဟ်ဟီုတှေ် ဇြဟတ်ကောန်ဂကောံကွးဘာ တက္ကသဵုလ္ဂုၚ်ပိုဲ ဒှ်အာ (၁၅၀၀) မွဲလ္ၚီမသုန်ကၠံပြၚ်အာယျ၊ ပ္ဍဲသၞာံဏံဂှ် ဇြဟတ်ကွးဘာ ပဵုကၠုၚ် (၄၀၀) ပြၚ်ကီုရ” သာ်ဝွံ ဟီုရ။
ဂကောံကွးဘာမန်တက္ကသဵုလ္ဂုၚ် (တက္ကသဵုဂမၠိုၚ် – လ္ဂုၚ်) ဝွံ ဖန်ဗဒှ်ဂၠိုက်ဂၠာဲလဝ် ပရေၚ်သုတေသန ကယျိုၚ်ကယျဝ် အခိုက်ကၞာယေန်သၞာၚ်မန် မာန်ကၠုၚ်တုဲ မဒှ်ဂကောံ မၞုံကဵုဝၚ်မွဲကီုရ။
ဂကောံကွးဘာမန် ကမ္မတဳလိက်ပတ်ယေန်သၞာၚ်မန် (တက္ကသဵုဂမၠိုၚ်-လ္ဂုၚ်) ဂှ်ဝွံ စဒက်ပ္တန်လဝ် ပ္ဍဲသၞာံ (၁၉၆၆ – ၆၇) လောန်ကၠုၚ်တေံဂှ် ဂွံဆဵုကေတ် ပ္ဍဲလိက်စၟတ်သမ္တီဂမၠိုၚ်ကီုရ။
