အေဝ်ဒဳတာ ဌာန်ပရိုၚ် DVB ဥူခေန်မိုၚ်သဵုဂှ် “နူမဂ္ဂဇြေန်၊ ဂျာနဝ် အပ္ဍဲဍုၚ်တေံ ဂၠိုၚ်ကၠုၚ်တုဲ ရဲကလၚ်ရေဒဳယော Shot Wave လပှ်ကျာဇမၠေံတံ အောန်စှေ်အာကွေံကွေံရ၊ စၞးသ္ဒးမၚ်ကလၚ်မံၚ် အခိၚ်ပိုဲဗလးရမျာၚ် နူဂယး (၆) နာဍဳကဵု အခိၚ်ဗ္တံ (၉) နာဍဳ ဂှ်မ္ဂး ဗှ်ကေတ်နူလိက်ပရိုၚ်ဂှ် ဍေံပဵုတုဲဂၠိုၚ်တိုန်မံၚ်ရ” သာ်ဝွံ ညးဟီုဏာရ။
စပ်ကဵု ညးတၠထံၚ်သောတ ကလၚ်ရမျှာၚ်ရေဒဳယောအခိၚ်လၟုဟ်အောန်ဂၠိုၚ်ဂးတုဲ ရဲကံက်တၚ်နၚ်ရေဒဳယောတံ လ္ၚတ်ဂွံလဝ်စရၚ်ပ္ဍဲဍုၚ်ဗၟာဂှ် မၞိဟ်ကလေၚ်ရေဒဳယော DVB တံ နွံဒၟံၚ်ဆ ၂ တၟံကၠံဟေၚ်ဒှ်တုဲ ပၞောဝ်ကဵုဌာန်ဗလးရမျာၚ်ဗၟာမ္ၚးဍုၚ် (၄) ဌာနမ္ဂး DVB ဂှ် ညးကလေၚ်မံၚ်အောန်အိုတ်ဂးရ။
ပြဟ်ဟ်ဏံပလေဝ်ပလေတ်စလဝ်ဟၟဲဏီတုဲ ဟိုတ်နူ အစဳဇန်ပြံၚ်သၠာဲ ဗလးအာရုပ်ရမျှာၚ်သာ်ဏံဂှ် ရဲဗလးမံၚ်ရမျှာၚ်ရေဒဳယော ကောန်ဍုၚ်အရၚ်တံ ဒှ်အာအခက်အခုဲဗွဲမဂၠိုၚ်ရောၚ်ဂှ်လေဝ် ပတိုန်ထ္ၜးမံၚ်ပ္ဍဲကောံဓရီု Online ဏံနွံရ။
ညးတာလျိုၚ် အစဳဇန် DVB ဘာသာကယာန်ဂှ် “ ပ္ဍဲဂကောံဓရီုတုဲကၠုၚ်တေံ ဟီုလဝ်ဂှ်တှေ် ကဵုတန်ဗ္တောန် TV ကၠာဏောၚ်၊ ကဵုအရီုဗၚ်ကဵုပရေၚ်နဲကဲပညာကၠာဏောၚ် ၜိုန်ရဟီုလဝ်ကီုလေဝ် ဟွံဂွံဓမံက်ရုပ်ရဴ ဏီပုဟ်။ အပ္ဍဲကဵု မွဲၜါဂိတုဏံဂှ်ရ ပြံၚ်သၠာဲအာ မွဲလစုတ်ဓဝ်ဂှ်တှေ် အခိၚ်ပလေဝ်ပလေတ်လေဝ်ဟွံမွဲရ” ရဴဝွံဟီုရ။
လပါ်ညးဓမံက်ရုပ်ရဴ အစီဇန်ဘာသာကောန်ဍုၚ်အရေၚ်ဗွဲမဂၠိုၚ်တံမ္ဂး ဟိုတ်နူမၞိဟ်ဖျေံလဝ်သဇိုၚ် အပ္ဍဲကဵုဒေသပယျဵုတံဒှ်တုဲ သွက်ဂွံဗလးရုပ်ရမျှာၚ်ဂှ် အာကၠုၚ်ဟွံလောဲဂှ်မွဲသာ် ဗွဲတၟေၚ် ဆေၚ်ကဵုကပေါတ်ကရိယာ တက်ရုပ်၊ ကုတ်ဆက်ရုပ်တံဂှ်လေဝ် မွဲသာ်မှဗဂပ်လဝ်ဟၟဲဏီ ဂးရ။
ပ္ဍဲအစဳဇန်ဘာသာကောန်ဍုၚ်အရေၚ် DVB တံဂှ် ဘာသာကချေၚ်၊ ကယာ(ကရေၚ်ဍာဲ)၊ ကယာန်၊ ကရေၚ်၊ ချေၚ်၊ မန်၊ ရခေၚ်ကေုာံ ဘာသာသေံ(ယျှာန်)တံဂှ် ဇၟာပ်သတ္တဟ လၟေၚ်တ္ၚဲညးကဵုညး ဗလးမံၚ်ရမျာၚ်ရေဒဳယောဖိုအ်ရ။
အစဳဇန်ဗလးရမျာၚ် DVB ရေဒဳယဝ်ဏံဂှ် အလဵုအသဳပံၚ်ကောံကၟိန်ဍုၚ်ဗၟာ NCGUB မွဲအခိၚ်တေံ က္ဍိုက်ပ်နူဍုၚ်နဝ်ဝေ ဗလးရမျှာၚ်တိုက်ရိုက်တုဲ အစဳဇန်ကောန်ဍုၚ်အရေၚ်တံဂှ် နူဂကောံရပ်လွဟ်ကောန်ဍုၚ်အရၚ်တံပံၚ်ကောံ သ္ပတိုၚ်နူဌာန်ဂအုပ် KNU မာနာပလဝ်တေံ ပၠုပ်ရမျှာၚ်မွဲကဆံၚ်တုဲ စနူသၞာံ ၁၉၉၃ ဂိတုဂျူလာၚ် ၁၉ တေံဂှ် စတမ်ဗလးကၠုၚ်မံၚ်ရမျှာၚ်မဒှ်ရ။
