ပ္ဍဲကောံဓရီုကၠတ်ထဝ် တွဵုရးဍုၚ်မန် အလန်ပထမ လၟေၚ်နဝမ မကၠောန်သ္ပလဝ် စပ္တံနူစၟတ်တ္ၚဲ (၅) ဂိတုသေပ် တေမ်ဗာဏံဝွံ ဆေၚ်ကဵုပရေၚ်တိကၠအ် ဒပ်ပၞာန်သီလဝ်တုဲ ပ္ဍဲအရာက္လေၚ်သၠးပၟပ်ကဵုမံၚ်တံဂှ် အပ္ဍဲကဵုပွိုၚ်ဍုၚ်ဇြပ်ဗုမွဲ ဟိုတ်နူက္လေၚ်ဂွံလဝ်ဟၟဲဂှ်ရ ညးစၞးကၠတ်ထဝ်တွဵုရးဍုၚ်မန် ပွိုၚ်ဍုၚ်ဇြပ်ဗု နာဲတၠဆာန် သၟာန်ကလးလဝ် ပ္ဍဲကဵု ကောံဓရီုကၠတ်ထဝ်ဂှ်ရောၚ် ဂွံတီကေတ်ရ။
“သွက်ဂွံက္လေၚ်ကဵု ဇရေၚ်သၟာဗ္ၚတအ် တိဒပ်ပၞာန်သီလဝ်ဂှ် သှေ်မံၚ်ဗၞတ် ၉၇၄.၆၆ ဨကရ၊ အပ္ဍဲဂှ်တှေ် တိတဵုလွဳ သုၚ်စောဲဟွံဂွံ မပ္တံကဵု တိတာ၊ တိအၚ်လှာ၊ တိကရးတအ်ဂှ် နွံမံၚ်၂၉၂.၃၄ ဨက၊ တိဂြိုပ် ၂၇.၁၃ ဨက၊ တိဗလး ဗ္စပြေၚ်ဂၠဴ ၁၀၆ ဨက၊ တိဍာ်စပြၚ်လီုတအ်ဂှ် ၄၉.၅၅ ဨက၊ မွဲဟာန် ကေုာံ တိသၟာဗ္ၚတအ် ဟွံဂွံအာတ်ဂရၚ်ပ္တီဏီဂှ် နွံ ၄၉၉.၆၄ ဨက တအ် သှေ်သၟေဟ်မံၚ်ရ၊ နကဵု(ဗော်ဒုၚ်ကာကောပ်ကာဲသုၚ်စောဲတိ) တွဵုရးလေဝ် ရဲမိက်ဂွံကၠောန် ကၠအ်၊ တဵုလွဳတအ် ယဝ်ကၠုၚ်စိုပ်အာတ်ဂရၚ်ပ္တီမ္ဂး ရေၚ်တၠုၚ်ဖန်ဇန်ကဵုဒၟံၚ်ရောၚ်” သာ်ဝွံ ဝန်ဇၞော်ဝါဗ္ၚ ကေုာံ ကၟိုန်ဍာ် တွဵုရးဍုၚ်မန် ဥူမျဵုညောအ် သွဟ်ကဵုလဝ် ဂလာန်သၟာန် အမာတ်မန် နာဲတၠဆာန်ဂှ်ရ။
ပ္ဍဲကဵုဒပ်ပၞာန်တံ က္လေၚ်သၠးပၟပ်ကဵုမံၚ်တိသီလဝ်လၟုဟ်ဂှ် သွက်ပွိုၚ်ဍုၚ်မပ္တံကဵု ကျာ်ထဝ်၊ ၜဳက္လေၚ်၊ သဓီု၊ ပံၚ်၊ မတ်မလီု၊ ၜါသွာၚ်၊ မုဟ်ဍုၚ်၊ ကျာ်မြဟ်၊ ရေဝ်တံ ပါလုပ်မံၚ်နွံကီုလေဝ် သွက်ပွိုၚ်ဍုၚ်ဇြပ်ဗုမွဲ ဟွံပါလုပ်ရောၚ် အတိုၚ်ဥူမျဵုညောအ် သောၚ်ထ္ၜးလဝ် ပ္ဍဲကောံဓရီုကၠတ်ထဝ် မကၠောန်သ္ပတ္ၚဲပထမ (၅/၉/၂၀၁၄) ဂှ် ဂွံတီကေတ်ရ။
“အပ္ဍဲကဵုဝန်ဇၞော်ဝါဗ္ၚ/ကၟိုန်ဍာ် ဥူမျဵုညောအ်ဟီုဏာဂှ် ကဵုလဝ်အရၚ်သွက်ပွိုၚ်ဍုၚ်ဇြပ်ဗုဟွံပါပုဟ်၊ ပွိုၚ်ဍုၚ်ဇြပ်ဗုဂှ် တိဒပ်ပၞာန်သီလဝ် နွံမံၚ်၊ မပ္တံကဵုကွာန်ဝါကလဳ၊ ကွာန်ဗဒိုပ်ဇၞော်တအ်ဂှ် ဒပ်လွဟ်ဇၞော် စၟတ် (၃၁၅) သီလဝ်ကၠအ် ထၜိုတ်ညးဍုၚ်ကွာန် ဗၞတ် (၂၀၀) ဨကပြၚ်မံၚ်၊ ကြဴနူလက်ထက်အလဵုအသဳတိုန်တၟိဏအ်တုဲ ကိစ္စတိကၠအ် ဒးဒုၚ် သီတအ်ဂှ် က္လေၚ်သၠးပၟပ်ကဵုနွံမံၚ်တုဲ အပ္ဍဲကဵုပွိုၚ်ဍုၚ်ဇြပ်ဗုဏအ်သၟးဂှ် ဂဗုတ်တိကၠအ် ဒးဒုၚ်သီလဝ် နွံမံၚ်ဗၞတ် (၁၃၅) ဂဗုတ်၊ စပ်ကဵုဂဗုတ်တအ်ဏအ်တုဲ ကာလပသောၚ်တေံဂှ် ဟိုတ်နူပရေၚ်ကၠးဖ္ဍး ဟွံမွဲတုဲ သောၚ်ကလးကဵု ဟွံမာန်၊ တၠကၠအ်တအ်ဂှ် ကၠုၚ်ပတိုန်ထ္ၜးလဝ်ကဵုအဲ နွံမံၚ်” သာ်ဝွံ အမာတ်မန် နူပွိုၚ်ဍုၚ်ဇြပ်ဗု နာဲတၠဆာန် ဟီုရ။
ကောံဓရီုကၠတ်ထဝ်အလန်ဏံဝွံ ညးစၞးအမာတ်ကၠတ်ထဝ်တွဵုရးတံ သၟာန်လဝ်စပ်ကဵုပရောတိကၠအ်ဂၠိုၚ်မံၚ်တုဲ အပ္ဍဲ ဂှ် တိသွက်ဂွံက္လေၚ်ပၟပ်ကဵု နွံဨကဂလိုၚ်လဵု၊ တိကၠအ်ဂွံလဝ်အခေါၚ် (သွက်ဂွံက္လေၚ်ပၟပ်) တုဲတုဲဂှ် နွံဨကဂလိုၚ်လဵု ကေုာံ က္လေၚ်စၟဳစၟတ်တုဲ သွက်ဂွံက္လေၚ်ပၟပ်ကဵုဂှ် နွံမံၚ်ဏီဟာ မပ္တံသာ်ဝွံ ပါလုပ်ရောၚ် ဂွံတီကေတ်ရ။
လောန်ကၠုၚ်စၟတ်တ္ၚဲ ၀၅/၀၃/၂၀၁၄ တေံ နကဵုအလဵုအသဳတအ် ကေၚ်လလောၚ်တြးကၠုၚ်လဝ် အပ္ဍဲလိက်ပရိုၚ် ‘ကြေးမုံ’ ဂှ် တိသွက်ဂွံက္လေၚ်သၠးပၟပ်ကဵု (အလန်ဒုတိယ) အပ္ဍဲတွဵုရးဍုၚ်မန်ဂှ် ဓမံက်ထ္ၜးလဝ် (မြေစာရၚ်းပုံစံ (၁၀၅/ ၁၀၆) ရယူသိမ်းဆည်းထားသောမြေ – ၁၆၂၅ ႕ ၄၆ ဨက၊ တပ်အစီစဉ်ဖြၚ့်လုပ်ပိုၚ်ခွၚ့်ရယူသိမ်းဆည်း ထား သောမြေ – ၁၇၇၂ ႕ ၄၃ ဨက၊ ယခၚ်ကာလသိမ်းဆည်းရေး ဆောၚ်ရွက်ဆဲမြေ – ၃၂၃ ႕ ၈၁ ဨက) ပံၚ်သီုဖအိုတ်- (၃၇၂၁.ရ၀) ဨကနွံမံၚ်ရောၚ် ဓမံက်ထ္ၜးလဝ်ရ။
တုဲပၠန် အပ္ဍဲကဵုစၟတ်တ္ၚဲ ၂၂/၀၈/၂၀၁၄ နူကဵုဌာနဝန်ဇၞော်ပရေၚ်စဵုဒၞာ ပတိုန်ထ္ၜးလဝ်စရၚ် အပ္ဍဲကဵုကောံဓရီုအလဵု အသဳကၟိန်ဍုၚ် ပထမ (၄) ဂိတု၊ သၞာံဘဏ္ဍာ၂၀၁၄-၂၀၁၅ ဂှ် တိက္လေၚ်သၠးပၟပ်ကဵုဂမၠိုၚ်တအ်ဂှ် သွက်အရၚ်တွဵုရး ဍုၚ်မန်ဂှ် (စွန့်လွှတ်မြေ – ၃၆၃၉.၆၄၀ ဨက၊ လွှဲပြောင်းပြီး – ၃၅၇၉.၆၄၀ ဨက၊ လွှဲပြောင်းကျန် – ၆၀.ဝ၁၀ ဨက၊ တောင်သူထံလွှဲပြီး – ၂၆၂၂.၁၁၀ ဨက၊ တောင်သူထံ လွှဲရန်ကျန် – ၉၅၇.၅၃၁ ဨက) ဓမံက်ထ္ၜးလဝ် အပ္ဍဲလိက် ပရိုၚ် ‘ကြေးမုံ’ ပၠန်ရ။
