အဃောစဳရေၚ်သ္ပမံၚ်ဝေယျာဝစ္စ သွက်ဂွံကဵုဒါန်မဟာဒုက် ပ္ဍဲဘာသၟဝ်(ဘာလကျာ်) ဍုၚ်ခေါဇာဂှ် ဂကောံရပ်လွဟ်တံ ရုဲစှ်ကေတ် ညးမၞုံပိုန်ဒြပ်တၠတိကၠံ မၞိဟ်တြုံ ၄ တၠ၊ မၞိဟ်ဗြဴ ၂ တၠတုဲ အခိၚ် ၈ နာဍဳဗ္တံဂှ် ဍေံကော်ပတိတ်ဏာရ သာ်ဝွံ ရဲဍုၚ်ခေါဇာမွဲတၠ ဟီုရ။
“အခိၚ်စဳရေၚ်ဒၟံၚ် သွက်ဂွံကၠောန်ကဵုဒါန်မဟာဒုက် ပ္ဍဲဘာလကျာ်တေံ ပ္ဍဲမွဲအခိၚ်ဓဝ်ဍေံကော်ဏာ သီုမၞိဟ် ၆ တၠရ၊ ရုၚ်ဗၠာဲသၟိၚ်ကဵု ဒပ်ပၞာန်နွံမံၚ်ဖိုဟ်ဂှ် ဍေံတံဂံၚ်ကွေံကွေံ” သာ်ဝွံ ရဲဍုၚ်ခေါဇာမွဲတၠ ဟီုရ။
ပ္ဍဲကဵုမၞိ်ဟ်ဒးဒုၚ်ရပ်အာတ်သြန်သီုဖအိုတ်ဂှ် မၞိဟ်အာယုက်ဇၞော် ၆၀ သၞာံမွဲတၠကဵု မၞိဟ်ဗြဴယာဲကောန်တှ် မွဲတၠ ဍေံရပ် လဝ်ပွိုၚ်မွဲတ္ၚဲတုဲ ကလေၚ်ဗလးကဵု ဗ္ဒာဲကွာန်အံၚ်ဇၞး(ကျောက်ကုဒၚ်) ရ။
ဂကောံတံၚ်ရပ်ဏါမၞိဟ်တံဏံ သြန်လၟိဟ်ၜိုတ်လဵုအာတ်မိက်လဝ်ဟွံတီကီုလေဝ် တုဲကၠုၚ်နူဂိတုမေဏံ ဂကောံရပ်လွဟ်မွဲဂကောံ ဗလံၚ်ဗစိုပ်လဝ်လိက်အာတ်သြန် နူဘာလကျာ်ပ္ဍဲဍုၚ်ခေါဇာ ၂ ဘာမွဲကဆံၚ် ညံၚ်ဂွံပလံၚ်ကဵုသြန် ၄၀၀ ကိုဋ်နွံရ သာ်ဝွံ ရဲဍုၚ်ခေါဇာ ဟွံဓမံက်ယၟုမွဲတၠ ဟီုကဵုဌာန်ပရိုၚ်ဗၠးၜးမန် IMNA ရ။
“ပရိုၚ်ဒးဒုၚ်တံၚ်ရပ်ဏာလဝ်ဂှ် ကဵုလဝ်ပရိုၚ်နွံဒၟံၚ်ရ၊ လၟုဟ်ပိုယ်ဂၠိုက်ဂၠာဲမံၚ်ပရိုၚ် ဂကောံလဵု၊ ကော်ဏာဒၞာဲလဵု ၊ မၞိဟ်ဒးဒုၚ်ရပ်တံဂှ် နွံမံၚ်ပ္ဍဲတဲဍေံတံတှေ် တၚ်နၚ်ချိုတ်တ်ပၠိုတ်တ်ဂှ် ဟီုဟွံဂွံပုဟ်လေဝ်” သာ်ဝွံ ညးဒုၚ်လျိုၚ်ဍုၚ်ရေဝ် ဗော်ဍုၚ်မန်တၟိမွဲတၠ ဟီုရ။
တိဍာ်ကြပ်မံၚ် လ္ပာ်သၠုၚ်ကျာ်ပွိုၚ်ဍုၚ်ရေဝ်ကဵု ဒေသသၟဝ်ကျာပွိုၚ်ဍုၚ်ဍာ်ဗု မွဲဒကုတ်ဂှ် ဂကောံရပ်လွဟ် နာဲသိုၚ်၊ နာဲဆာန်ဍုၚ်၊ နာဲလောန်တံ ဗက်အာတ်မံၚ်သြန်သာ်ဏံဂှ် ပြာကတ်ဒၟံၚ်ရ။
ဍုၚ်ခေါဇာဂှ် ခြာမံၚ်ကဵုဍုၚ်ရေဝ်သၠုၚ်ကျာ ဗၞတ် ၂၄ တိုၚ်တုဲ လက္ကရဴနူသၞာံ ၂၀၀၀ ဂှ် ဒှ်တိုန်က္ဆံၚ်ပွိုၚ်ဍုၚ်ပါ်တုဲ ရုၚ်ဗၠာဲသၟိၚ်ကဵု ရုၚ်ဌာနအလဵုအသဳကဵု တမ်ဒပ်ပၞာန်ဗၟာ ခလရ ၃၁ ဖျေံလဝ်သ္ဇိုၚ်ရ။
