လ္ပာ်ဗော်ဍုၚ်မန်တၟိဂှ် ဥက္ကဋ္ဌဇၞော် နာဲထဝ်မန်၊ ညးလျိုၚ်ဗွိုအပ္ဍဲဍုၚ် နာဲဝေန်လှ ကေုာံ ဂကောံဂမၠိုၚ်ကဵု လ္ပာ်အလဵု အသဳတွဵုရးဍုၚ်မန်ဂှ် သ္ကိုပ်ဝန်ဇၞော် ဥူအုမ်မျေအ်၊ ဝန်ဇၞော်ပရေၚ်ဂီုကၠီု ကေုာံ ပယျဵုတွဵုရး၊ ဝန်ဇၞော် ပရေၚ်ဖောအ်ဗြေဝ်သာယာ၊ ဝန်ဇၞော်ပရေၚ်သာသနာ ကေုာံ ပလံၚ်ဗ္စိုပ် မွဲဟာန် ကေုာံ သ္ကိုပ်စၞောန်ပ္ညုၚ် ရုၚ်အလဵုအသဳတွဵုရးဍုၚ်မန်တံ တက်ကျာဆဵုဂဗညးသ္ကံ ဗွဲပလး ပွိုၚ်မွဲနာဍဳပြၚ်ရောၚ် ညးလျိုၚ်ဖောအ်ဗြေဝ် ဗော်ဍုၚ်မန်တၟိ ဒုသ္ကိုပ်ဗိုလ်ဇၞော် အာမ်သိုက်ဆာန် ဟီုရ။
“ဆဵုညးသ္ကံလၟုဟ်ဂှ် ဆဵုတၟေၚ် ဗီုတေံဗီုဏံဟွံသေၚ် ဆဵုဂဗဗွဲပလးရ၊ ဥက္ကဋ္ဌဇၞော်ပိုဲ အခိၚ်ညးစှေ်ကၠုၚ် စိုပ်မတ်မလီု ဏံတှေ် စှ်လှေ်မွဲလန် ဟွံလအ် ဟွံလအ် ဂွံဆဵုအာညးသ္ကံကီု၊ တုဲတှေ် စပ်ကဵုပရေၚ်ဖောအ်ဗြေဝ်၊ ပရေၚ်ကမၠောန် တုဲလေဝ် ဂွံဆဵုဂဗသဳကၠဳ သၠာဲဂတးလညာတ်ကီုရ” သာ်ဝွံ ညးပါလုပ် အပ္ဍဲကဵုပေဲါဆဵုဂဗ ဒုသ္ကိုပ်ဗိုလ်ဇၞော် အာမ်သိုက်ဆာန် လဴထ္ၜးရ။
သၟာၚ်နူဂှ်ပၠန် နကဵုအလဵုအသဳတွဵုရးဍုၚ်မန် ဗီုဓမံက်ရုပ်ရဴကၠောန်ၜိုတ်ဒၟံၚ် စပ်ကဵုပရေၚ်ဖောအ်ဗြေဝ် အပ္ဍဲ (၁၀) ပွိုၚ်ဍုၚ် ဂမၠိုၚ်ဂှ် လဴက္လးကဵုတုဲ ပ္ဍဲကဵုဒၞဲါလ္ၚဵု ညံၚ်ဂွံဘိုၚ်ရီုဗၚ် ဘိုၚ်ပံၚ်ဗစပ်ကဵုကီုဂှ် အာတ်မိက်လဝ် ကုဗော်ဍုၚ်မန်တၟိနွံရ။ နကဵု ဗော်ဍုၚ်မန်တၟိလေဝ် ဆေၚ်ကဵုပရေၚ်ချဳဒရာၚ်ဗော်တုဲ မူခက်ခုဲနွံဂှ် သဳကၠဳပ္တိုန်ထ္ၜးလဝ်ညးသကံ ဗွဲပလးကီုရ။
“ပ္ဍဲဆဵုဂဗဗွဲပလးဏံဂှ် စပ်ကဵုကိစ္စဗိက်တုဲ နကဵုဥက္ကဋ္ဌဇၞော်ပိုဲ အာတ်အရီုဗၚ် ပ္တိုန်ထ္ၜးလဝ်ကဵု သ္ကိုပ်ဝန်ဇၞော် တွဵုရးဍုၚ်မန်ကီုရ၊ ကိစ္စဂှ် ဒဵုလၟုဟ် မူသွဟ်လေဝ် ဟွံတိတ်ကၠုၚ်ဏီဂှ်ရ နူကဵုညးတံမွဲက္ဆံၚ် ညံၚ်ဂွံဘိုၚ်ဟီုကဵု က္ဆံၚ်လ္တူတေံညိကီု၊ တုဲတှေ် ညံၚ်ဂွံချပ်ကဵုတုဲ ညံၚ်ဂွံက္လေၚ်ရပ်စပ်ကဵုအမှုဂှ်ရ” သာ်ဝွံ ဒုသ္ကိုပ်ဗိုလ်ဇၞော် အာမ်သိုက်ဆာန် ဆက်ဟီုရ။
ဆက်တုဲ အခိၚ်သဝ်တ္ၚဲဂှ် ဥက္ကဋ္ဌဇၞော်ဗော်ဍုၚ်မန်တၟိ ထပ်ဆဵုဂဗကဵု ဋ္ဌာနဂကောံဆက်စပ်ကၠောံက္ဍမံၚ်ကဵုဗော် မပ္တံကဵု ဂကောံၜိုဟ်လလမ်ရာမည (RPF)၊ ဂကောံသၟတ်မန်လညာတ်တၟိ၊ ဂကောံညးဗြဴမန် (ဗဟဵု) တအ် ပ္ဍဲကဵုတိုက် ရံၚ်လိက် နာဲယှိုဲကျေန် လ္တူဍုၚ်မတ်မလီုတုဲ သဳကၠဳသောၚ်က္လးဏာ စပ်ကဵုကိစ္စပရေၚ်ကမၠောန်ဂမၠိုၚ်နွံရောၚ် ဂွံတီ ကေတ်ရ။
ဗော်ဍုၚ်မန်တၟိ ကေုာံ အလဵုအသဳဝွံ ပ္ဍဲဂိတုဖေဖဝ်ဝါရဳ (၂၅)၊ သၞာံ (၂၀၁၂) ဂှ် နကဵုတၚ်တုပ်စိုတ် (၅) တၚ် စပ္တံထ္ပက် စၟတ်တဲ ဒေံါလဝ်ပန်ပှော်က္ဆံၚ်တွဵုရး ပ္ဍဲကဵု Strand Hotel ဍုၚ်မတ်မလီုရ။
