-
- သွက်ဂွံ အခန်ကၞာတ္ၚဲၜိုဟ်လလမ်အလုံဂၠးကဝ် ဒၞာဲရုၚ် MYPO (Photo – GS)
ပ္ဍဲကဵုကၠောန်သ္ပ တ္ၚဲၜိုဟ်လလမ်အလုံဂၠးကဝ် ဒၞာဲရုၚ်ဂကောံသၟတ်မန်လညာတ်တၟိ လ္တူဍုၚ်မတ်မလီု၊ အရာပ် မျာၚ်သာယာ၊ ဂၠံၚ် (၁၉) ဂှ် စကၠောန်နူကဵုအခိၚ်ဗ္တံ (၇) နာဍဳတုဲ ညးစၞးဗော်ဍုၚ်မန်တၟိ ဋ္ဌာနပရေၚ်ဖောအ်ဗြေဝ် ဍုၚ်မတ်မလီု နာဲအာမ်သိုက်ဆာန်၊ ညးစၞးဂကောံၜိုဟ်လလမ်ရာမည နာဲရတ်ဂကူ၊ နူကဵုဂကောံ (SYCB) ကေုာံ သၟတ်တံ တိုန်စိုပ် (၄၀) တၠပြၚ်ရ။
“လၟုဟ်ဂှ် ဂကောံအလဵုအသဳကဵု ဂကောံရပ်လွဟ်ကောန်ဍုၚ်အရၚ်တံ သီုဖအိုတ်ဂှ် ဟွံဂွံထ္ပက်စၟတ်တဲ ပရေၚ်ၜိုဟ် လလမ်ဏီပုဟ်၊ ဆအယာံမာတ် ကေတ်လဝ်ပရေၚ်ဒေံါပန်ပှော်ညိဏီကီု၊ နူကဵုပရေၚ်ဒေံါပန်ပှော်ဏံဟေၚ် ဆက်ဂါမ်ကၠောံအာ ပရေၚ်ၜိုဟ်လလမ်ဏောၚ်၊ ခြာဟွံလအ်ဏံလေဝ် သွက်ဂွံထ္ပက်စၟတ်တဲဂှ် ဍေံဒှ်ကၠုၚ် မာန်ရောၚ်၊ ၜိုန်ရပရေၚ်ၜိုဟ်လလမ်ဏံ ထ္ပက်စၟတ်တဲတုဲကီုလေဝ် ညးဂှ်ဖံက်ပ္ကဝ်ဒၟံၚ် စေဝ်ပၞောန်ပရေၚ်ၜိုဟ်လလမ်ဂှ် ဂကောံမၚ်ရံၚ်ဒေံါပန်ပှော် ဒးနွံမွဲဂကောံထေက်ဏောၚ်” သာ်ဝွံ နူကဵုညးတာလျိုၚ်ဗော်ဍုၚ်မန်တၟိ နာဲအာမ်သိုက်ဆာန် ဟီုရ။
သွက်ဂွံဒှ်ပရေၚ်ၜိုဟ်လလမ်ဍာ်ဇမၠိၚ်ဂှ် အလဵုအသဳကဵု ဂကောံရပ်လွဟ်ကောန်ဍုၚ်အရၚ်သၟး ကၠောန်တှေ် ဍေံဂွံဒှ်အာ ပရေၚ်ၜိုဟ်လလမ် အာဍာ်ဇမၠိၚ်မာန် ဟွံသေၚ်ပုဟ်၊ ပ္ဍဲကဵုပရေၚ်ၜိုဟ်လလမ်ဂှ် နူကဵုဂကောံမှာဇန်တံလေဝ် မွဲနဲမွဲဗီု ဒးပါလုပ်ထေက်ဏောၚ်ဂှ် ညးဆက်ဟီုရ။
“ပ္ဍဲကဵုကၟိန်ဍုၚ်ပိုဲဂှ် ကောန်ဍုၚ်အရၚ် ဂကူနွံမံၚ် (၈) ဂကူ၊ နူကဵု (၈) ဂကူဂှ်မှ ဒှ်ကၠုၚ်ဂကူဍောတ်တ်တံ နွံမံၚ်ဗွဲမဂၠိုၚ် ရောၚ်၊ လၟုဟ်ဂွံဒှ်မံၚ် ပဋိပက္ခပ္ဍဲဍုၚ်ပိုဲဂှ်တှေ် ယေန်သၞာၚ်ညးတၞဟ် ဟွံကဵုဓမံက်ရုပ်ရဴ၊ လိက်ညးတၞဟ် ဟွံကဵုဗ္တောန်၊ ကၟာတ်လဒဵုလဝ်အခေါၚ်အရာ ဂကူကောန်ဍုၚ်အရၚ်တံ၊ ဟိုတ်ဂှ်ရ ဂွံဒှ်မံၚ်ပဋိပက္ခဏောၚ်” သာ်ဝွံ နူကဵု ဥက္ကဋ္ဌ ဂကောံပရေၚ်ၜိုဟ်လလမ်ရာမည နာဲရတ်ဂကူ ဟီုရ။
တ္ၚဲစၟတ်သမ္တီၜိုဟ်လလမ်အလုံဂၠးကဝ် စၟတ်တ္ၚဲ ၂၁ ဂိတု သာပ်တေန်ဗါဂှ် နူကဵုဂကောံကွးဘာဆက်စၠောံ သၟတ်ဂမၠိုၚ် ကၟိန်ဍုၚ်ဗၟာ (SYCB) တံ ပတိတ်လိက်လလောၚ်တြး၊ အာတ်မိတ်လဝ် လ္တူအလဵုအသဳ သမ္မတဥူတုၚ်ဇြုၚ် နွံမံၚ် (၅) တၚ်တုဲ တၚ်ဆဝ်မ္ၚုဟ်စိုတ်ဓါတ် ပ္ဍဲကဵုလိက်လလောၚ်တြးဂှ် “သီုဖအိုတ် အခေါၚ်အရာတုပ်သၟဟ် တံၚ်တဲဗန်ကအ်တုဲ ဒက်ပ္တိုန်ကၟိန်ဍုၚ်ဖေဝ်ဒရေဝ်စိုအ်” နွံရ။
“ပရေၚ်ၜိုဟ်လလမ်ဏံဂှ် ဆေၚ်စပ်မံၚ်ကဵု ဇၟာပ်မၞိဟ်တံဏောၚ်၊ သွက်ပရေၚ်မၞိဟ်လေဝ် ဒှ်တၚ်အဓိကမွဲဏောၚ်ဂှ် ပိုဲညာတ်ကေတ်ရ။ ဟိုတ်ဂှ်ရ ပ္ဍဲကဵုပရေၚ်ၜိုဟ်လလမ်ဏံဂှ်တှေ် သၟတ်ပိုဲလေဝ် ဒးပါလုပ်ထေက် ညာတ်ကေတ် သာ်ဂှ်တုဲတှေ် လၟုဟ်ပိုဲကၠောန်ကၠုၚ် တ္ၚဲၜိုဟ်လလမ်ဂၠးကဝ် ဂွံကၠုၚ် (၂) ဝါယျဏောၚ်” ဂှ် ညးမကေတ်လဝ် တာလျိုၚ် ဒုဥက္ကဋ္ဌ ဂကောံသၟတ်မန်လညာတ်တၟိ မိမြမောဝ် ဟီုရ။
တ္ၚဲပရေၚ်ၜိုဟ်လလမ်အလုံဂၠးကဝ် မရနုက်ကဵု (၃၂) ဂှ် အလုံမွဲဂၠးကဝ် ကၠောန်သ္ပမံၚ်တုဲ ပေဲါဗတိုက် ပဋိပက္ခတံဂှ်လေဝ် သှေ်မံၚ်ဟွံအောန်ဏီရ။
ပ္ဍဲကဵုကၟိန်ဍုၚ်ဗၟာလေဝ် ဒှ်မံၚ်ပဋိပက္ခ ပေဲါဗတိုက် ရပ်လွဟ် ပွိုၚ် (၆၀) သၞာံပြၚ်တုဲ တ္ၚဲဏံ သွက်ဂွံပသောၚ် ပဋိပက္ခတံဂှ် ညးဍုၚ်ကွာန်တံ နွံပၟိက်မံၚ် အလဵုအသဳကဵု ဂကောံရပ်လွဟ်ကောန်ဍုၚ်အရၚ်တံ သွက်ဂွံပသောၚ်ပဋိပက္ခ လ္တူခုၚ် ညံၚ်ဂွံဒှ်အာ “ပရေၚ်ၜိုဟ်လလမ်ထာဝရ” ရ။
0 Comments