ညးဗြဴမန်တံ က္ဍိုက်က္ဍိုပ်တုဲ ဒက်ပတန်အာ ဗော်ပရေၚ်ဍုၚ်ကွာန် အပ္ဍဲဗွိုၚ်သၞောဝ် ရောၚ် ညးမဒှ်ဥက္ကဋ္ဌ ဂကောံဒက်ပတန်ဗော် “ဗော်ညးဗြဴ” မိလျိုၚ်မန်ဟီုကဵုသၞံၚ်တိုၚ် အပ္ဍဲစၟတ်တ္ၚဲ (၉-၁၀-၂၀၁၄) ဂှ်ရ။

ညးဗြဴတံ အသိၚ်ချဳဓရာၚ် ပရေၚ်ဍုၚ်ကွာန် ဂွံသၠုၚ်တိုန်ကီု ဂွံပတုဲအာဖဵုကောန်ဂကူ ညးဍုၚ်ကွာန်နာနာကီုဂှ်တုဲ ဒက်ပတန်အာဗော်ညးဗြဴ (Women Party) ရောၚ် ဂွံတီကေတ်ရ။

“သွက်ဂွံပတိုန် Register ဂှ် ပံက်ဗော်တွဵုရးဍုၚ်မန်သၟးဟွံသေၚ် တုဲတှေ် ယးတေံ ပိုဲဒးအာနေပျဳဒဝ်ဏောၚ်၊ လပါ်ပိုဲဂှ် ပလေဝ်ပလေတ်စ လဝ်တုဲယျလေဝ်၊ ပလံၚ်ဏာကဵုလဝ် တိုက်ပလံၚ်လိက် (စာတိုက်) ဂှ် ဖေက်ဟွံချိုတ်ပၠိုတ်တုဲ အလဵုမၞိဟ်ဇကုလေဝ် အာကီုဏောၚ်” သာ်ဝွံ ဥက္ကဋ္ဌ ဂကောံဒက်ပတန်ဗော်ညးဗြဴ မိလျိုၚ်မန် ဟီုရ။

ဗော်ညးဗြဴမန်ဝွံ ယဝ်ရမံက်ဒှ်ကၠုၚ် အပ္ဍဲဗွိုၚ်သၞောဝ် နဒဒှ်ဗော်ပရေၚ်ဍုၚ်ကွာန်မွဲမ္ဂး မဒှ်ဗော်ညးဗြဴကၠာအိုတ်တုဲ သွက်ဂွံပတိုန်လိက်စၟတ်သမ္တီ ဒက်ပတန်ဗော်ဂှ် ရုဲစှ်လဝ်ကမ္မတဳကေၚ်ကာ (၉) တၠ ကေုာံ ကမ္မတဳဗဟဵု (၁၅) တၠ တုဲဒှ်လဝ်ရ၊ ယဝ်ရကလိဂွံအခေါၚ်ဒက်ပတန်ဗော်မ္ဂး ဒးစန်ဒက် ကောန်ဗော်အောန်အိုတ် (၁၀၀၀) တၠရောၚ် ညးဆက်ဟီုရ။

ဗော်ညးဗြဴ (Women Party) ဝွံ ပ္ဍဲတွဵုရးဍုၚ်မန်သၟးဟွံက အတိုၚ်လုံကၟိန်ဍုၚ်ဂှ် သွက်ဂွံချဳဓရာၚ်အာနွံတုဲ သၞောဝ်ဒက်ပတန်ဗော်ကီု မူဝါဒ ပရေၚ်ဍုၚ်ကွာန်တံကီုဂှ် ဆိုက်ဗဒက်အာကဵု တၠပညာမစိုန်သကီုတံတုဲ ချူဓဇက်အာရောၚ် ဂးရ။

ပစ္စုပ္ပန်ဝွံ အပ္ဍဲကဵုကောန်ဂကူမန်ဂှ် ဗော်ဒဳမဵုကရေဇြဳအလုံရးမန် (AMDP) ကီု ဗော်ကောန်ဂကူမန် (MNP) တံကီု ချဳဓရာၚ်မံၚ် ပရေၚ်ဍုၚ်ကွာန် အပ္ဍဲဗွိုၚ်သၞောဝ်တုဲ ဗော်ဍုၚ်မန်တၟိဂှ် နဒဒှ်ဗော်ရပ်လွဟ် ချဳဓရာၚ်မံၚ်နွံရ။