ဂကောံရပ်လွဟ်မွဲက္ဍိုပ် tတံၚ်ရပ်ဏာရဲဍုၚ်ခေါဇာ ၄ တၠ ပွိုၚ်ကြပ်မွဲဂိတုတုဲ ပ္ဍဲဂိတု အံက်တဵုဗာ ၄ ဂှ် ရဲရပ်မၞိဟ်အာတ်သြန်တံ ကလေၚ်ဗလးယျရောၚ်နူဌာန်ပရိုၚ်ဗၠးၜး ( IMNA ) ဂၠိုက်ဂၠာဲသၟာန်သၟုက်တုဲ ဂွံတီကေတ်ရ။

ဂိတုတုဲကၠုၚ် ပ္ဍဲစၟတ်တ္ၚဲ ၁၉ ဂှ် မၞိဟ်တၠကၠအ်မၞုံကဵုဒြပ်ရတ်တံ အဃောစဳရေၚ်မံၚ် ကိစ္စဝေယျာဝစ္စ သွက်ဂွံကဵုဒါန်မဟာဒုက် ပ္ဍဲဘာသၟဝ်(ဘာလေံကျာ်) ဂှ် ရဲရပ် မၞိဟ်အာတ်သြန်တံ ရပ်ဏာ မၞိဟ်တြုံ ၄ တၠ၊ မၞိဟ်ဗြဴ ၂ တၠတုဲ ဗလးကဵု ၂ တၠကီုလေဝ် သှေ် မၞိဟ် ၄ တၠဂှ် ဒးဒုၚ်ရပ်လဝ် ပွိုၚ်ကြပ်မွဲဂိတုရ။

＂ဗၠးတိတ်ကၠုၚ် သီုဖအိုတ်ယျ၊ ဂွံတိတ်ဗၠးနူဘဲလမျီုတုဲ ပိုယ်ရဲဂကောံသ္ၚိကၟိန်တံသီုဖအိုတ် နူဓဝိၚ်ဂွိၚ်မံၚ်တံ ဂွံတိတ်ဗၠးအာကီု＂သာ်ဝွံ ဂကောံသ္ၚိကၟိန် ညးမဗၠး တိတ်မွဲတၠဟီုရ။

ၜိုန်ဂှ်လေဝ် ဗၠးတိတ်ကၠုၚ် ဗီုလဵုရောဂှ် နအလဵုညးတၠခန္ဓတံ လဴထ္ၜးကဵုဟွံသေၚ် ဂးရ။

ရဲတံၚ်မၞိဟ်အာတ်သြန်တံ ၜိုန်အာတ်လဝ်သြန် ရ၅၀ ကိုဋ်ကီုလေဝ် ရဲညးတၠခန္ဓတံ သွက်ဂွံကဵုဂှ် သြန်ဟွံမွဲပုဟ် ဂးရ။

＂ဍုၚ်ပိုယ်ဂှ် သၟာရပ်မၞိဟ်အာတ်သြန်တံ အခိၚ်ဟွံရုဲ လုပ်ရပ်မာန်မံၚ်၊ မၞိဟ်အပြောံဂၠိုၚ်မံၚ်လေဝ် မၞိဟ်ညးမၞိဟ်အဲ ပါ်ပဲါဟွံဒးပုဟ်၊ ကောန်ပၞာန်၊ ဗၠာဲသၟိၚ်တံ ဍေံမံၚ်ဒၟံၚ်ပ္ဍဲဗဒပ်ဍေံတံသၟးရဂၠိုၚ်＂ သာ်ဝွံ ရဲဍုၚ်ခေါဇာ ဟွံမိက်ထၟံက်ယၟုမွဲတၠ ဟီုရ။

ဍုၚ်ခေါဇာဂှ် မၞုံသၠုၚ်ကျာ ဍုၚ်ရေဝ် ခြာဗၞတ် ၂၄ တိုၚ်တုဲ လက္ကရဴသၞာံ ၂၀၀၀ တုဲကၠုၚ်ဂှ် တမ်ဒပ် ခလရ ၃၁ ကၠုၚ်ဖျေံသ္ဇိုၚ်တုဲ နူကဵုက္ဆံၚ် ဂကောံကွာန်ဂှ် စၟတ်သၠုၚ်ပတိုၚ်က္ဆံၚ်ပွိုၚ်ဍုၚ်ပါ် နူဂှ် ကလေၚ်ဖျေံလဝ် ဗဒပ်ဗၠာဲသၟိၚ်ကဵု ရုၚ်အလဵုအသဳတံရ။

ၜိုန်ဂှ်လေဝ် ဍုၚ်ခေါဇာဂှ် ပရေၚ်ဂီုကၠီုဟွံမွဲ သာ်ဝွံညးစၞးကၠတ်ထဝ်ညးဍုၚ်ကွာန် ပွိုၚ်ဍုၚ်ရေဝ် မိမျေအ်တာန် ဟီုကဵုဌာန်ပရိုၚ်ဗၠးၜးမန် (IMNA) ရ။