ပ္ဍဲစၟတ်တ္ၚဲ ၁၉ ဂိတုနဝ်ဝေမ်ဗာ အခိၚ်ဒေါဝ်တ္ၚဲ ၁ နာဍဳကလေၚ်ဂှ် ညးတိၚ်တိုက်(Bass) ပ္ဍဲဂကောံဂဳတမန် ညာဏ်လွဳမာန်၊ အာယုက် ၃၇ ၊ အဃောတိက်မံၚ်ဒေါဝ်တ္ၚဲ ဒၞာဲသ္ၚိညးဒၟံၚ် ဍုၚ်ကၟာဝက်ဂှ် စုတိအာရ သာ်ဝွံ ဂွံတီကေတ် နူသၟာဒယှေ်ဒွက် ကေုာံ သၟာတိၚ်တက် ( lead ) ဂေတ်တာ နာဲပါဝါ ရ။

သၟာတိၚ်တက် ညာဏ်လွဳမာန်(IMNA)＂ ၜိုတ်အခိၚ်ဒေါဝ်တ္ၚဲ ၁ နာဍဳဂှ် ဍေံတက်မံၚ်ကျာခိုဟ်ဟ်ရ၊ အေတိက်ဒေါဝ်တ္ၚဲတုဲ ၜိုတ် ၃ နာဍဳသဝ်တ္ၚဲဂှ် ညးတၞဟ်က္လေၚ် ဆဵု သီုဟွံမွဲရ၊ ညးဂှ်အခိၚ်စုတိဏံ ယဲဟွံမွဲပုဟ် လောန်ကၠုၚ် ၜိုတ်(၁၀)တေံ က္ဍိုပ်ကေၚ်လီုလဝ်ကီု လွဳတုဲ ခိုဟ်အာအတိုၚ်ပကတိပၠန် လၟုဟ်ညးစုတိအာတှေ် အောန်စိုတ်တၟာဂလိုၚ်လေဝ်＂ သာ်ဝွံ နာဲပါဝါ ကေၚ်တိၚ်တက်လဝ် ပ္ဍဲဂကောံဂဳတမန်မွဲစွံ ဟီုရ။

သၟာတိၚ်တက်ညာဏ်လွဳမာန်ဝွံ ပဲါနူကလောန်တိၚ်တက်တုဲ ကၠောန်မံၚ်ကမၠောန်ပလေဝ်ကွဳလိုန်ဓာတ် မံၚ်အာအကြာ ကွာန်ညးတိုပ်သုက် ဍုၚ်ကၟာဝက်ဂှ်ရ သာ်ဝွံ နာဲပါဝါ ဆက်ဟီုရ။

＂မွဲဒမြိပ်ဏံ ပိုယ်တံဒးတိၚ်တက်နွံမံၚ်တၟာဂလိုၚ်လေဝ် လၟုဟ်ညာဏ်လွဳမာန်ဒှ်အာဗီုဏံဗက် ပ္ဍဲဂကောံဂဳတမန်ပိုယ် ဒှ်အာ အခက်အခုဲတၟာဂလိုၚ် ညးဂှ် ဒှ်မံၚ်မၞိဟ်ကိစ္စဇၞော်မွဲဏောၚ် ပိုယ်တံလေဝ် မံၚ်ကၠုၚ်လဝ်မွဲစွံ စၞခိုဟ် စၞပရေံဟွံပါ် စကၠုၚ်လဝ်မွဲစွံတှေ် လၟုဟ်ညးဟွံမွဲတှေ် ပိုယ်တံဒးဒုၚ်စသိုၚ်တၟာဂလိုၚ်＂ သာ်ဝွံ နူဂကောံဂဳတမန်မွဲတၠ နာဲမဇမန် ဟီုရ။

ဖျေံကမ္မဌာန် ညာဏ်လွဳမာန်(IMNA)

သၟာတိၚ်တက် ညာဏ်လွဳမာန်ဝွံ တိၚ်တက်ကၠုၚ်လဝ်ပ္ဍဲဂကောံဂဳတမန် သၞာံဗွဲမလအ်လေဝ် လ္ပာ်မၞိဟ်တေံပရေံ မၞိဟ်ဏံ ပရေံ ဟွံကေၚ်ဟီုမွဲလှေ် ဟွံဒှ်သၞကဵုညးတၞဟ်မွဲလှေ် စိုတ်စရိုဟ်ခိုဟ် မံၚ်တဴၜိုဟ်ၜိုဟ်သိုဟ်သိုဟ်ရ သာ်ဝွံ နာဲမဇမန် ဆက် ဟီုရ။

သၟာတိၚ်တက်ညာဏ်လွဳမာန်ဝွံ ဒှ်မၞိဟ်ပ္ဍဲကွာန်ကၟာဝက်၊ ပွိုၚ်ဍုၚ်မုဟ်ဍုၚ်တုဲ ဒှ်ကောန်ဗၠာဲ နာဲညောအ်မုၚ် မိလှ ပ္ဍဲကောဒေံ မၞုံမသုန်တၠ ဒှ်ကောန်လၟေၚ် ၄ ယၟုကော်မံၚ်ပ္ဍဲကွာန်ဂှ် ယှိုဲပုၚ် ယၟုတိၚ်တက်ဂှ် ညာဏ်လွဳမာန် နူကဵုအယုက်ၜိုတ် ၁၅ သၞာံ တေံ လုပ်စိုပ်ဗွိုၚ်ဂဳတ စဵုကဵု အယုက် ၃၇ ယိုက်ဂၠေၚ်ကၠုၚ်တာလျိုၚ်သုခုမမန် ပွိုၚ် ၂၀ သၞာံပြၚ်တုဲ ပ္ဍဲစၟတ်တ္ၚဲ ၁၉ ဂိတု နဝ်ဝေမ်ဗာ ဂှ် စုတိအာတုဲ၊ စၟတ်တ္ၚဲ ၂၀ ဂှ် စံၚ်ဇွ၊ စၟတ်တ္ၚဲ ၂၁ ဂှ် ပကုသဵု ကဵုဒါန်စရိုဟ်ဍာ်ရ။