-
- ရာဒနာမိက် ပရေၚ်ၜိုဟ်လလမ်(IMNA)
-
- ရာဒနာမိက် ပရေၚ်ၜိုဟ်လလမ်(IMNA)
အခိၚ်ထၟံက်မံၚ်ရုပ်ရဴပရေၚ်ၜိုဟ်လလမ်လၟုဟ်ဏံ ဟွံမွဲဒၟံၚ်ဗဗွဲဓရ်တံကီု၊ ဟွံညဳသၟဟ်ဟွံဒှ်ဓဝ်ဍာံတံညံၚ်ဟွံဂွံဒှ်ကီု၊ ဇၟာပ်ကောန်ဍုၚ်ကွာန်တံ အခေါၚ်အရာညးကဵုညး မိက်ဂွံကဵုနွံအာရောၚ် သာ်ဝွံ ရဲဘာသာအေသ်သလာန် မသုရတနာမျေအ် ဟီုရ။
“ဒၞာဲထၟံက်မံၚ်ရုပ်ရဴ ပရေၚ်ၜိုဟ်လလမ်တံဂှ် ညံၚ်ကဵုဂွံဒှ်ၜိုဟ်ဟ်သြိုဟ်ဟ်တုဲ မပ္တံဟွံမွဲ ဗဗွဲဓရ်တံ၊ ဟွံညဳသၟဟ်ဟွံဒှ်ဓဝ်ဍာံတံ၊ ဟွံမိက် ကဵုဒှ်ပုဟ်၊ ဇၟာပ်မၞိဟ်ဂှ် အခေါၚ်အရာညးကဵုညး မိက်ဂွံကဵုနွံဏောၚ်၊ ပရေၚ်ၜိုဟ်လလမ်ဂှ် မိက်ဂွံကဵုထၟံက်အာရုပ်ရဴ ၜိုဟ်ဟ်သြိုဟ်ဟ်ဏောၚ်၊ ပရေၚ်ၜိုဟ်လလမ်ဂှ် ထၟံက်ရုပ်ရဴကဵု လွဟ်လက်နက်တံ ဟွံဂွံပုဟ်” သာ်ဝွံ ညးဟီုရ။
ပ္ဍဲကၟိန်ဍုၚ်ဗၟာ အဃောအာမံၚ်ဂၠံၚ်တရဴ ပရေၚ်ၜိုဟ်လလမ်လၟုဟ်ဏံဂှ် ပြဟ်ဟ်ဏံ နွံမံၚ်က္ဆံၚ်သဳကၠဳ ပရေၚ်ဒေါအ်ပန်ပှော်ဟေၚ်ဒှ်တုဲ ပရေၚ်သဳကၠဳပရေၚ်ဒေါအ်ပန်ပှော်ဂှ်လေဝ် ဒေံါဒေၚ်ကၠုၚ်မံၚ် ၜိုတ်ၜါဂိတုဒှ်ရ။
ပ္ဍဲဂိတုနဝ်ဝေမ်ဗာ စၟတ်တ္ၚဲ ၁၉ တုဲကၠုၚ်ဏံ တန်ဗ္တောန်ဘာအလံၚ်ဗိုလ် KIO ဒၞာဲလာၚ်ဇြာ တွဵုရးကချေၚ်ဂှ် နူကဵုဒပ် အလဵုအသဳတံ ပန်ဏာကဵု လွဟ်မဇၞော်တုဲ အလံၚ်ဗိုလ် ဂကောံရပ်လွဟ် ကောန်ဍုၚ်အရၚ်တံ ပြဟ်လလုဲအာ ဗွဲမဂၠိုၚ် က္တဵုဒှ်ကၠုၚ်လဝ်ရ။
ဗီုဂှ်ကီု နအလဵုကောန်ဍုၚ်ကွာန် ကၟိန်ဍုၚ်ဗၟာဏံမ္ဂး ပဋိပက္ခဒှ်မံၚ်လၟုဟ်ဏံဂှ် ညံၚ်ဟွံဂွံအိုတ်အးအာမာန် အလဵုအသဳကဵု ဂကောံရပ်လွဟ်တံ လေဝ် ညံၚ်ဂွံကလေၚ်ပတဝ်အာက္ဍိုပ်ကဵု ဂၠံၚ်တရဴပရေၚ်ၜိုဟ်လလမ်မာန်ဂှ် ဒးဆက်ဗတိုက်ဖအောဝ်ထေက်ရောၚ် သာ်ဝွံ နူကဵုဂကောံဇာဖိုၚ် ပရေၚ်ၜိုဟ်လလမ် ကချေၚ် ရဲဘာသာခရေတ်ယာန် ဒဝ်ခွန်ဂျာ ဟီုရ။
“ပရေၚ်ၜိုဟ်လလမ်ဏံ သွက်ကောန်ကၟိန်ဍုၚ်ဗၟာ သီုဖအိုတ် ဒးနွံကဵုတၚ်ဒုၚ်လျိုၚ်ဏောၚ်၊ ပရေၚ်ၜိုဟ်လလမ် သွက်မွဲဒၞာဲဓဝ် သွက်ညးမွဲဓဝ် ဟွံမိက်ကဵုဒှ်ပုဟ်၊ ပိုယ်ညးဍုၚ်ကွာန်တံလေဝ် ပဋိပက္ခဂွံဇၞော်တိုန်ဂှ် လ္ပကၠောန်တုဲ ညံၚ်ဂွံအာဂၠံၚ်တရဴ ပရေၚ်ၜိုဟ်လလမ်မာန်ဂှ် ဒးကလေၚ် ဗတိုက်ဖအောဝ်ဏောၚ်၊ ၜိုတ်ပြဟ်မာန် ဒးပရဟ်ပတိုန်တုဲ ညံၚ်ဂွံစိုပ်လ္တူခုၚ်ပြဟ်ပြဟ်ဂှ်လေဝ် ဒးကလေၚ်ဗတိုက်ဖအောဝ်ထေက်ဏောၚ်＂ သာ်ဝွံ ဒဝ်ခွန်ဂျာ ဆက်ဟီုရ။
အခိၚ်လၟုဟ်ဏံ အလုံကၟိန်ဍုၚ်ဗၟာဏံ ဒေသလဵုလေဝ် ဟွံၜိုဟ်လလမ်ဏီ၊ ဒၞာဲတွဵုရးကချေၚ် ဗီုပန်ပှော် ဒှ်မံၚ် ပ္ဍဲဂိတုနဝ်ဝေမ်ဗာ ၁၉ ဂှ်မ္ဂး မွဲဒမြိပ်ဂၠံၚ်တရဴပရေၚ်ၜိုဟ်လလမ်သီုဖအိုတ် ဒှ်အာညံၚ်ရဴပလီုပလာ်ထောံ ပရေၚ်ၜိုဟ်လလမ်မာန်ဏောၚ်ဂှ် ဒဝ်ခွန်ဂျာ သၠဳကၠိပ်လဝ်ရ။
ပရေၚ်ဒေါအ်ပန်ပှော်ကဵု ပရေၚ်ၜိုဟ်လလမ် ထၟံက်ရုပ်ရဴဟွံမာန်မ္ဂး ပရေၚ်ဖောဝ်ဗြေဝ်တဴတက်ကၟိန်ဍုၚ်လေဝ် ဟွံတဴတက်တိုန်ပုဟ်ဂှ် ညးကောန်ဗုဒ္ဓဘာသာမွဲတၠ ကိုဂျဝ်ကိုကို ဟီုရ။
ကောန်သၟတ်နူဘာသာပံၚ်ကောံတံ ကၠောန်သ္ပပေဲါရာဒနာမိက် ပရေၚ်ၜိုဟ်လလမ် ပ္ဍဲဂိတုနဝ်ဝေမ်ဗာ ၂၄ အခိၚ်သဝ်တ္ၚဲ ၜိုတ် ၅ နာဍဳ ဒၞာဲကၠအ်ဥဒျာန်မဟာဗန္ဓုလ ဍုၚ်လ္ဂုၚ်ရ။
နူကဵုဘာသာပံၚ်ကောံ သၟတ်ၜိုတ် ၅၀ တၠ တိုန်စိုပ်ရာဒနာမိက် သွက်အလံၚ်ဗိုလ် ဒးပြဟ်လလုဲအာ ပ္ဍဲတန်ဗ္တောန်အလံၚ်ဗိုလ် လာၚ်ဇြာတေံဂှ် ဍေန်ပၟတ်ပၞာၚ် ပွမထၟံက်ထ္ၜးသၞိၚ်ရုပ်ရဴပရေၚ်ၜိုဟ်လလမ်ကီု သီုဒယှေ်တိၚ်တက်အာ ဒွက်ပရေၚ်ၜိုဟ်လလံကီုရ။
0 Comments