သ္ဇိုၚ်သၞောဝ်အုပ်ဓုပ်ဍုၚ်၂၀၀၈ ပလေဝ်ကၠာဟာ၊ ဟွံပလေဝ်ဟာဟီုဂှ် ပေဲါသဳကၠဳပရေၚ်ဒေံါပန်ပှော်အလုံဍုၚ် ယောၚ်ယာအာဟွံသေၚ် သာ်ဝွံ ညးအာက္ဍိုပ်ဂကောံ NCCT ပရေၚ်ဒေံါပန်ပှော်အလုံဍုၚ် နာဲဟံသာ ဟီုကဵုဌာန်ပရိုၚ်ဗၠးၜးမန် IMNA ရ။
Nai Hong Sar(internet)
ၜိုန်ဂှ်လေဝ် ဆေၚ်စပ်ကဵု သ္ဇိုၚ်သၞောဝ်အုပ်ဓုပ်ဏံတုဲ တၚ်ဒးပလေဝ်တံဂှ် ဟိုတ်နူညးဍုၚ်ကွာန်တံ အာတ်မိက်လဝ်နွံဂှ်ရ ဗီုလၟုဟ်ဏံ သွက်ဂွံပလေဝ်ကဵုဟွံမွဲ၊ ပေဲါရုဲစှ်မာဲ၂၀၁၅ တုဲမှ ပလေဝ်သၞောဝ်ဟီုမ္ဂး ညးဍုၚ်ကွာန်တံ ဟွံဒးဂၞပ်စိုတ်၊ ဒၞာဲဒေသကောန်ဍုၚ်အရၚ်တံလေဝ် ကောန်ဍုၚ်အရၚ်တံ ညံၚ်ဂွံဂွံအခေါၚ်အရာရုဲစှ်ကေတ် ဝန်ဇၞော်ပ္ဍဲတွဵုရးဇကုမာန်ဂှ် ဟိုတ်နူ ဟွံပလေဝ်သၞောဝ်ဂှ်ရ ဟွံဂွံတၚ်တုပ်စိုတ်ဏီ၊ ဗီုသ္ပဒၟံၚ်လၟုဟ်ဂှ် ဒှ်မံၚ်နဲ တံၚ်အခိၚ်မွဲသာ်ဏောၚ် သာ်ဝွံ နာဲဟံသာ ဆက်ဟီုရ။
စပ်ကဵုပလေဝ်သၞောဝ် ၂၀၀၈ တုဲ ဥက္ကဌ ကၠတ်ထဝ်ကၟိန်ဍုၚ် သူရယှိုဲမာန်ဟီုလဝ်ဂှ် ပေဲါရုဲမာဲ ၂၀၁၅ တုဲ ကၠတ်ထဝ်တၟိမံက်ကၠုၚ်တၟိမွဲပၠန်မှ ဆက်ပလေဝ်အာသ္ဇိုၚ်ရောၚ် သာ်ဝွံ ပ္ဍဲပေဲါသောၚ်ကလးပရိုၚ် ကၠောန်သ္ပလဝ်ဒၞာဲနေပျဳတဝ် ၁၈၊ ၁၁၊ ၂၀၁၄ တေံဂှ် ဟီုထၟံက်ထ္ၜးလဝ်နွံရ။
ကၠာဟွံဂွံ ကၠောန်သ္ပ ပေဲါရုဲမာဲ ၂၀၁၅ ဏီ စိုပ်ဂိတုမေမ္ဂး သွက်ပလေဝ်သၞောဝ်ဂှ် ကၠာန်သ္ပပေဲါကေတ်ဆနမ္ဒဲညးဍုၚ်ကွာန်တုဲ လ္တူတၚ်နၚ်ဂွံနၚ်တံဂှ် ရုဲမာဲတုဲ ကာလကၠတ်ထဝ် တၟိမံက်တိုန်မွဲမှ ဆက်ပလေဝ်အာသၞောဝ်ရောၚ် ဥူယှိုဲမာန်ဟီုဂးလဝ်ရ။
ညံၚ်ဂွံပလေဝ်ကဵုသၞောဝ် ၂၀၀၈ ဂှ် နကဵုကၠတ်ထဝ် ဒက်လဝ်ကမ္ပတဳသ္ၚဳဂၠိပ်ပလေဝ်သၞောဝ်ကီုလေဝ် အတိုၚ်ကမ္ပတဳတံ ပၠောပ်နၚ် တၚ်နၚ်သွက်ဂွံ ပလေဝ်သၞောဝ်ဂှ် နူကဵုကၠတ်ထဝ်တးပဲါကၠေံတုဲ ပေဲါရုဲမာဲ ၂၀၁၅ ဏံ ကၠောန်သ္ပအာ အတိုၚ်သၞောဝ်ဥပဒေ ၂၀၀၈ တေံပၠန်ဏောၚ်ဂးရ။
ဆက်တုဲ နာဲဟံသာဂှ် ＂တၚ်ဒးပလေဝ်သၞောဝ် ၂၀၀၈ ဂှ် နွံမံၚ်ဟလိုၚ်ရ၊ တၚ်အဓိကဂှ်တှေ် သၞောဝ် ၂၀၀၈ ဂှ်မ္ဂး ဒပ်ပၞာန်တံရ ကေတ်လဝ်ဒၞာဲဏောၚ်၊ သၞောတ်ဒဳမဵုကရေဇြဳဟွံသေၚ်ပုဟ် ဒၞာဲဏံဂှ်မွဲတၚ်၊ မွဲတၚ်ပၠန်ဂှ် ဥပဒေဏံ ၜိုတ်ဒုၚ်လဝ်ယၟု ကၟိန်ဍုၚ်ပံၚ်ကောံသက်သက်ရ၊ ရးကဵု တွဵုရး တံ အတိုၚ်သၞောဝ်ဂှ်တှေ် မုလေဝ်အဝဵုဟွံမွဲပုဟ် ဒၞာဲတံဏံ ဒးပလေဝ်ဏောၚ်＂ သာ်ဝွံ ညးဟီုရ။
ဂွံပလေဝ်သၞောဝ်မာန်ဂှ် ထ္ပက်စၟတ်တဲ ပရေၚ်ဒေံါပန်ပှော်အလုံဍုၚ်တုဲ ကၠောန်ပေဲါကောံဓရီုဇၞော် က္ဆံၚ်ကောန်ဂကူမွဲတုဲ ဂၠိုက်ဂၠာဲအာသွဟ် သွက်ဂွံပလေဝ်သၞောဝ်ထေက်ရောၚ် နာဲဟံသာ ဟီုရ။
0 Comments