＂လ္ပာ်အလဵုအသဳတံဟီုလဝ်ဂှ်တှေ် သၞောဝ် ၂၀၀၈ ဏံ ကၠောန်လဝ်နကဵုသၞောတ် ဖေဝ်ဒရေဝ်ရဏောၚ်၊ သၞောဝ် ၂၀၀၈ ဏံဂှ် ညိလေဝ်ဟွံတုပ်ကဵု သၞောတ်ဖေဝ်ဒရေဝ်ပုဟ် တီမံၚ်ဖအိုတ်ရ၊ အလဵုအသဳတံလေဝ်တီမံၚ်၊ ဆဂး သ္ဇိုၚ်သၞောဝ်သၞောတ်တုပ်မံၚ်ရဂှ်လေဝ် ညးတံ ကလေၚ်ဟီု＂ သာ်ဝွံ ဥူဇြိုဝ်ဇြာမ် ဟီုရ။
ပေဲါသဳကၠဳကၠောန်လဝ် ဒၞာဲသ္ၚိသမတ ဂျာန်နာဝါရဳ ၁၅ ဏံဂှ် ညးတိုန်စိုပ်တံဂှ်တှေ် ညးစၞးဒပ်ပၞာန် ၈ တၠ၊ ဝန်ဇၞော်ကောန်ဍုၚ်အရၚ် ၂၉ တၠ၊ ညးစၞးဗော်ကောန်ဍုၚ်အရၚ် ၁၀ တၠ၊ အပံၚ်မၞိဟ် ၄၈ တၠပါလုပ်တုဲ၊ သဳကၠဳလဝ် ပရူ ပရေၚ်ပြံၚ်သၠာဲ ဒဳမဝ်ကရေဇြဳကဵု ပရေၚ်ဓမံက်ပတိုန် ဗီုဒးပဠေဝ်ပဠေတ်သွက်ဂွံပြံၚ်သၠာဲ၊ ဒုၚ်သ္ဇိုၚ်ကဵု ပေဲါသဳကၠဳပရေၚ်ၜိုဟ်လလမ်တုဲ သွက်ဂွံကၠောန်သ္ပအာ ပေဲါသဳကၠဳပရေၚ်ဍုၚ်ကွာန် ဆေၚ်ကဵု ကလေၚ်ဒက်ပတန်တိုန် ပရေၚ်ညဳသၟဟ်ကောန်ဍုၚ်အရၚ်၊ ပေဲါရုဲမာဲ ၂၀၁၅ ဏံ ညံၚ်ဂွံကၠောန်သ္ပအာဗွဲမအံၚ်ဇၞး လၟေၚ်ကမၠောန် ပရေၚ်ဍုၚ်ကွာန် သွက်ဂွံပြံၚ်သၠာဲ ဂွံမံက်ဂတဝ်တိုန် ဗွဲမယျဵုလ္ဂူမာန်တံ သဳကၠဳလဝ်ရောၚ် ဂွံတီကေတ်ရ။
ဆက်တုဲ ဆေၚ်ကဵုပဠေဝ်သၞောဝ် ၂၀၀၈ ဏံ ကၠောန်သ္ပအာ ပေဲါအာတ်မိက်ဆန္ဒညးဍုၚ်ကွာန် ကာလပေဲါရုဲမာဲ ၂၀၁၅ တေံ ဒှ်ကၠုၚ်မှ ပေဲါအာတ်ဆန္ဒဏံ ကလေၚ်ပတိုန်ဏာ ပ္ဍဲကၠတ်ထဝ်တေံဏောၚ် လ္ပာ်အလဵုအသဳတံ ဟီုလဝ်ရ သာ်ဝွံ ဂွံတီကေတ် ဇရေၚ် ညးတိုန်စိုပ်မွဲတၠ ဝန်ဇၞော်ကောန်ဂကူမန် နူဂကောံအလဵုအသဳတွဵုရးကရေၚ် နာဲချေတ်ဥူ ရ။
နာဲချေတ်ဥူ ဂှ် ＂သွဟ်တိတ်ကၠုၚ်နူ ပေဲါသဳကၠဳတ္ၚဲဏံဂှ်တှေ် သ္ဇိုၚ်သၞောဝ်ဥပဒေဏံ ကာလကၠတ်ထဝ်တၟိ မံက်တိုန်မှ ပဠေဝ်အာဏောၚ်၊ ကၠောန်အာပေဲါအာတ် ဆန္ဒဏောၚ်၊ ပေဲါအာတ်ဆန္ဒဏံ အံၚ်ဇၞးတှေ် ကာလပေဲါရုဲမာဲ ၂၀၁၅ တေံတုဲမ္ဂး လုပ်ပဠေဝ်သၞောဝ် ပ္ဍဲကၠတ်ထဝ်တေံ ဏောၚ် ဗီုဏံ ဍေံတံဟီုလဝ်၊ ဆေၚ်ကဵုကိစ္စ ကောန်ဍုၚ်အရၚ်ဏံတုဲ တေံကာလစိုပ်တ္ၚဲ ကၟိန်ဍုၚ်တေံမှ သွက်ဂွံထ္ပက်အာစၟတ်တဲ ပရေၚ်ဒေါအ်ပန်ပှော်အလုံဍုၚ်မာန်ဂှ် လ္ပာ်အလဵုအသဳတံလေဝ် ဂစာန်ကီုဏောၚ် ဂးရ＂သာ်ဝွံ ဟီုရ။
ပေဲါသဳကၠဳတ္ၚဲဏံဂှ် အလဵုအသဳကဵု က္ဍိုပ်သ္ကိုပ်ညးဍုၚ်ကွာန်တံ သဳကၠဳအာ ဂတးဂတန်မာန်တုဲ ပေဲါဆဵုဂဗသဳကၠဳဏံ ဂွံဇြဟတ်ရ၊ ညးတိုန်စိုပ် က္ဍိုပ်သ္ကိုပ်ကောန်ဍုၚ်အရၚ်လ္ၚဵုတံ ၜိုန်ရသ္ပလဝ်စၟတ်သမ္တီကီုလေဝ် ညးတိုန်စိုပ်လ္ၚဵုဂှ်တှေ် ဟိုတ်နူဇြဟတ်မၞိဟ်ဂၠိုၚ်တုဲ ဂွံအခိၚ်သဳကၠဳအောန် အာရ၊ ကိစ္စဒးကေတ်အခိၚ်တုဲမှ ဂွံသဳကၠဳမာန်တံဂှ် ဟွံဒှ်သဳကၠဳအာပုဟ် က္ဍိုပ်သ္ကိုပ်လ္ၚဵုလ္ၚဵုတံ ဟီုမံၚ်အိုတ်ရ။
ပေဲါသဳကၠဳပရေၚ်ဍုၚ်ကွာန်ဏံဂှ် ပ္ဍဲကဵုမၞိဟ်တိုန်စိုပ်ဟလိုၚ် ပေဲါသဳကၠဳဂွံဒှ်အာကမၠောန်မွဲမာန်ဂှ် ဟွံဒှ်ကၠုၚ်ကမၠောန်ပုဟ် သာ်ဝွံ ညးအုပ်ကာဗော် ကောန်ဂကူမန် ဒံက်တာစောန်တၟး ဟီုရ။
ဒံက်တာစောန်တၟးဂှ် ＂မၞိဟ်အောန်တှေ် ဒှ်မံၚ်ကမၠောန်ဏီ၊ မၞိဟ်ဂလိုၚ်မံၚ်ဗီုဗီုဏံ ဗီုလဵုမှ ဒှ်ကမၠောန်ဟွံမာန်ပုဟ်၊ နူကဵုပေဲါသဳကၠဳဏံမွဲက္ဆံၚ်၊ ဆေၚ်ကဵုကိစ္စပရေၚ်ၜိုဟ်လလမ်တံ၊ ပရေၚ်ပြံၚ်လှာဲ သၞောဝ်ဥပဒေတံ ဒးသဳကၠဳထေက်ဏောၚ်၊ ဟိုတ်ဂှ်ရ နအလဵုသမ္မတတှေ် ဒးကေတ်အခိၚ်တှေ်ကေတ်၊ မၞိဟ်အောန်လေဝ်ဗီုအောန် အေကမၠောန်ဗီုဏံ ဒးကၠောန်အာထေက်ဏောၚ် ဗီုဏံ အဲညာတ်လေဝ် ＂ သာ်ဝွံ ဟီုရ။
ဗီုကၠောန်သ္ပလဝ် ပေဲါဆဵုဂဗသဳကၠဳဏံ တန်တဴကဵုအခိၚ်အခါကဵု ဗီုပြၚ်မွဲမွဲတုဲ သီုဖအိုတ်ဂှ် ဒးပညဳပညပ်ဏောၚ်၊ ဒးက္လေၚ်ကၠောန်အာပၠန် ဏောၚ်၊ ဗီုဏံ ပ္ဍဲမုက်လိက်ပရိုၚ်ရုၚ်သမ္မတ လလောၚ်တြးလဝ်ရ။
လအာတုပ် သၞာံ ၂၀၁၄ ဂိတုနဝ်ဝေန်ပါတေံ အလဵုအသဳ၊ ကၠတ်ထဝ်၊ ဒပ်ပၞာန်ကဵု က္ဍိုပ်သ္ကိုပ်ဗော်ပရေၚ်ဍုၚ်ကွာန် မၞိဟ် ၁၄ တၠ၊ သွက်ဂွံ ဆဵုဂဗသဳကၠဳအလန်ပထမတုဲ သမတကော်ဘိက်လဝ်ရ ပ္ဍဲပေဲါသဳကၠဳဂှ် မုသွဟ်လေဝ်ဟွံတိတ်ကၠုၚ်ဂှ်ရ ဒးတုဲအာ ၜိုတ်ဆဵုဂဗညးသကအ် ဓဝ်ရ။
