စနူကဵုဂိတုမေ ၁၁ ဏံတုဲ ဌာန်ရုပ်ရမျာၚ် DVB (ဒီမိုကရက်တစ် မြန်မာ့အသံ) စဗလးမံၚ်ကဵု TV ကောန်ဍုၚ်အရၚ်ပွိုၚ် ၁၅ မဏေတ်ရောၚ်ဂွံတီကေတ်ရ။

အစဳအဇန်ဗလးရုပ်ရမျာၚ်ဏံဂှ် နူကဵုဌာနပရိုၚ်ကောန်ဍုၚ်အရေၚ်ပံၚ်ကောံ (Burma News International -BNI)တံ က္ဍိုက်ဍိုပ်တုဲ ကၠောန်ဗဒှ်လဝ်ရ။

“ အတိုၚ်လၟေၚ်ညးတံပလံၚ်နၚ်ခံက်အၚ်ဂှ် ပိုဲဒုၚ်လဝ်တဲ အစဳဇန်ဘာသာမန်ဂှ် ဇၟာပ်တ္ၚဲစန်ဗလးအာဏောၚ်၊ ဟီုဘာသာမန်တုဲ ထပက်မလိက်ဗၟာ” အေဝ်ဒဳတာကေပ်ကာဲကမၠောန် ဌာန်ပရိုၚ်ဗၠးၜးမန် IMNA ဟီုရ။

တုပ်သာ်ကီု တ္ၚဲအၚာဂှ် ဘာသာယှာန်(သေံဇၞော်)၊ တ္ၚဲဗုဒ္ဓဝါဂှ် ကချေၚ်၊ တ္ၚဲဗြဴပတိဂှ် ကရေၚ်၊ တ္ၚဲသိုက်ဂှ် ကရေၚ်ဍာဲ၊ တ္ၚဲသ္ၚိသဝ်ဂှ် ချေၚ်၊ ရခေၚ်ဂှ် အဒိုတ်၊ ဘာသာဗၟာဂှ်ဗလးအာ ဇၟာပ်တ္ၚဲဗုဒ္ဓဝါဏောၚ် ထမံက်ထ္ၜးလဝ်ပ္ဍဲကဵုခံက်အၚ် အစဳဇန် BNI ဂှ်ရ။

“နကဵုဌာနပရိုၚ်ကောန်ဍုၚ်အရေၚ်ဂှ် သွက်ဂွံဗလးရုပ်ရမျာၚ် အစဳဇန်TV ဂှ်ပရေၚ်ဆဵုဂဗအောန်မံၚ်ဏီ၊ ဟိုတ်ဂှ်ရ သွက်ဂွံသၠုၚ်ပတို်န်ဍာ်ဒကေဝ်မဳဒဳယာကဵု ဂွံပတိတ်အစဳဇန်ခိုဟ်ခိုဟ်မာန်ကီုဂှ် ဒးစဝ်ဒုၚ်တုဲပလေဝ်ပလေတ်စထေက်ဏောၚ်” အေဝ်ဒဳတာကပ်ကာဲကမၠောန် ဌာန်ပရိုၚ်ဗၠးၜးမန်ဆက်ဟီုရ။

နူကဵုဌာန်ပရိုၚ်ဗၠးၜးမန်ဂှ် ( လွတ်လပ်သောအာရှအသံ RFA) ရေဒဳယဵုကဵု TV ဇၟာပ်သတ္တဟ ပလးမံၚ်ရမျာၚ်ရ။

နူကဵု BNI က္ဍိုက်ပ်တုဲ ပ္ဍဲကဵုဂိတု ဂျောန်ဏံမဂးကဵုဘာ စပ်ကဵုမၞိဟ်ပတိတ် TVကဵု ဘာအယ်ဒဳတာ ပ္ဍဲဍုၚ်ဇံၚ်မာဲ တေံရောၚ်ဂွံတီကေတ်ရ။

ဂကောံ BNI ဂှ်စပံက်ကၠုၚ်လဝ်နူကဵုသၞာံ ၂၀၁၃ တုဲလၟုဟ် နူကဵုဌာန်ပရိုၚ်ဗၠးၜးမန် IMNA, ချေၚ်ဝေါလ် Chin World, နူကဵုဌာန်ပရိုၚ်ကချေၚ် KNG၊ ဌာန်ပရိုၚ်ဂလာတာန် Kaladan Press, ကန္တရဝတီတိုၚ်း(မ်း) Kantarawaddy Times, ဌာန်ပရိုၚ်ၜိုပ်ထဝ် Phophtaw News Association, ဌာန်ပရိုၚ်ကရေၚ် Karen Information Center, ဌာန်ပရိုၚ်ခိုနူးထုန် Khonumthung News, ဌာန်ပရိုၚ်နိရဥ္စရာ Narinjara News, နူကဵု ဌာန်ပရိုၚ်ကဵုဇာဖိုၚ်မဳဒဳယာ Network Media Group, ဌာန်ပရိုၚ် “ရှမ်းသံတော်ဆၚ့်” Shan Herald Agency for Newd, သံလွၚ်တိုၚ်းမ် Than Lwin Times ကဵု ဌာန်ပရိုၚ်မဇျ္စိမ Mizzima News, တံပါလုပ်မံၚ်ရ။