ရဲဒးဒုၚ်စောဲဂဗုတ်တံ ကာလကၠုၚ်လဝ်ရုၚ်ဗၠာဲသၟိၚ်ဍုၚ်ရေဝ် ပ္ဍဲဂိတုမေ(Facebook)
တံ ပညဳညးသ္ကံတုဲ အဝ်ဂေတ် (၁၇) ဂှ် က္လိဂွံတၚ်တုပ်စိုတ် သွက်ဂွံက္လေၚ်ရုပ်သီကဵုဂဗုတ်ဂှ်ယျရောၚ် ဂွံတီကေတ်ရ။
တုဲကၠုၚ်နူဂိတုမေ (၁၅) တေံ သွက်ဂွံကၠောန်လိက်တၞးအခေါၚ်ကၠောန်တိဂးတုဲ အခိၚ်မိယျဳဋ္ဌေ မအာစိုပ်တဴကွာန် သၞေဟ်ကြုက်ဂှ် ညးဒေသ ရဲဒစဵုဒစးရုၚ်စက်ချးတၟအ်တံ ကၠောန်သ္ပပရေၚ်“ဘပဠ၊ ပလီုပလာ်ပိုန်ဒြပ်” ရောၚ်ဂးတုဲ တေၚ်လဝ်ဂဗုတ်ဂှ် ပ္ဍဲမေ (၂၅) ရ။
ညးမတေၚ်လဝ်ဂဗုတ်မွဲတၠ ကောန်ကွာန်သၞေဟ်ကြုက် မိကျဳလေန်ဂှ် “သၚ်တံဂှ် ကောန်ကွာန်မံၚ်မွဲစွံ၊ ဟိုတ်ဂှ်ရ ညးတံမိက်ဂွံကဵုမံၚ်ညဳညဳသာသာ၊ ကျာ်ဇၞော်အ္စာတံဟီုကဵုဒၠေံါဗ္တောန်တုဲတှေ် နကဵုဆန္ဒပိုဲရ ပိုဲက္လေၚ်ရုပ်သီကဵုဂဗုတ် ပိုဲတေၚ်လဝ်ဂှ်ဏောၚ်” သာ်ဝွံ ညးဟီုကဵုသၞံၚ်တိုၚ်ရ။
ဆက်တုဲ မကျဳလေန်ဟီုထ်ၜးကဵုပရေၚ်ကေတ်လဝ်တၚ်တုပ်စိုတ်ညးသ္ကံဂှ် အခိၚ်ကောန်အဲအာအကြာဂၠံၚ် အကြာ ဍာန်မ္ဂး လ္ပသ္ပသၞကီု၊ လ္ပပလီုပလာ်ပိုန်ဒြပ်၊ သွက်ဂွံကဵုလိက်စၟတ်တဲထပက်လဝ် ပရေၚ်ဒုၚ်လျိုၚ် (တာဝန်ခံချက်) တံကီု က္လေၚ်အာတ်လဝ်နွံမံၚ်ရောၚ် ညးဟီုပၠန်ရ။
“ဒးဒုၚ်စောဲလဝ်ကဵုဂဗုတ် (၄) ၝောံပိုဒ်၊ ၝောံပိုဒ် (၂) ဂှ် ညးတေၚ်လဝ်ရုပ်သီကဵုဂွံ၊ သှေ်မံၚ်ၝောံပိုဒ် (၂) ဂှ် ညး တေၚ်လဝ် ရုပ်သီကဵုဟွံဂွံ စိုပ်ရုၚ်သၞောဝ်ဓဝ်တုဲမှ ရုပ်သီဂွံ။ ဟိုတ်ဂှ်ရ ဂဗုတ်သှေ်မံၚ် (၂) ၝောံပိုဒ်ဏံဂှ် ဒးစိုပ် မံၚ်ရုၚ်သၞောဝ်ဓဝ်ဏီဏောၚ်” သာ်ဝွံ ညးအုပ်ကွာန်အၚ်ဒၚ် နာဲတေအ်ယှံၚ် ဟီုရ။
ရဲဒစဵုဒစးရုၚ်စက်ချးတၟအ်တအ်ဂှ် နကဵုၝောံပိုဒ် (၄၅၁၊ ၄၂၇၊ ၄၄၇၊ ၅၀၆) ဒးဒုၚ်တေၚ်လဝ်တုဲ သွက်ၝောံပိုဒ် (၄၂၇၊ ၅၀၆) ၜိုန်ရရုပ်သီကဵုဂွံကီုလေဝ် ၝောံပိုဒ်သှေ်မံၚ် (၄၅၁ ကဵု ၄၄၇) ဂှ် ဟိုတ်နူဒှ်မံၚ် ၝောံပိုဒ်ဆေၚ်ဆက်ကဵုဗၠာဲသၟိၚ် (ရဲအရေးပိုၚ်) တုဲ ညးတေၚ်လဝ်ဂဗုတ်တံ ရုပ်သီကဵုဟွံဂွံ၊ သီုညးၜါလ္ပာ် ထ္ပက်စၟတ်တဲ ပ္ဍဲရုၚ်သၞောဝ်ဓဝ်မှ ရုပ်သီဂွံရောၚ် ညးပါလုပ်ရေၚ်တၠုၚ်မံၚ်ကဵုဂဗုတ်မွဲ ဥူအံၚ်နာၚ်ဝေန် ဂကောံ (YSS) ဍုၚ်ရေဝ်ဂှ် ဟီုထ်ၜးရ။
“ဍာံဍာံတေံ ပရောဏံဂွံဒှ်အာဂှ် ပရေၚ်ကၠိုဟ်ခၠၚ် ဗၠေတ်အာညးသ္ကအ်ဏောၚ်။ မိယျဳဌေဂှ် သွက်ဂွံကၠောန်လိက် အ ခေါၚ်ကၠောန်တိ စှေ်အာကွာန်သၞေဟ်ကြုက်၊ ညးဒေသတံဂှ် ကၠိုဟ်ဗၠေတ်အာ မိယျဳဌေအာရာန်တိ သွက်ရုၚ်စက် ချးတၟအ်တုဲတှေ် မၞိဟ်ဟလိုၚ်အာကရေဲမံၚ် ဂတမုက်သ္ၚိ ဥူတာတေ ‘ဟွံမွဲပၟိက် ရုၚ်စက်ချးတၟအ်’ မၞိဟ် (၃၀၀/၄၀၀) ကၠံတုဲတှေ် ဍေံဒှ်အာ ပရောပရာဏံရောၚ်” သာ်ဝွံ ညးဆက်ဟီုရ။
ညးမတေၚ်လဝ်ဂဗုတ်ပန်တၠတံဂှ် မဒှ်ဥူသာတေ၊ မိကျဳလေန်၊ မိခေန်န်ထိုဲ ရဲကွာန်သၞေဟ်ကြုက် ကဵု မိယျဳဌေ ကောန်ကွာန်သာဲဂြာံတုဲ ညးဒေသအၚ်ဒၚ်ဂမၠိုၚ် ဗၞတ် (၂၆) တၠ ဒးဒုၚ်တေၚ်လဝ် ပ္ဍဲရုၚ်ဗၠာဲသၟိၚ် ဍုၚ်ရေဝ် နကဵုၝောံ ပိုဒ် (၄၅၁၊ ၄၂၇၊ ၄၄၇၊ ၅၀၆) ပရေၚ်ဂၠာဲသၞ၊ ပလီုပလာ်ပရေၚ်ပိုန်ဒြပ်၊ ၜက်ၜေက်လုပ်စိုပ်သ္ၚိ၊ ကၠောန်သ္ပပရေၚ် ဘပဠရောၚ်။
ဟိုတ်နူကျာ်ဇၞော်အ္စာဒေသဖလိန်တံ ကဵုသြဝါဒကီု၊ နကဵုဆန္ဒ ပၟိက်မိက်ဂွံမံၚ်ကဵုညးဍုၚ်ကွာန်တံ ကောံကောံ ကလောံကလောံကီု၊ လ္ပာ်ဇကု (ညးတေၚ်လဝ်ဂဗုတ်) တံလေဝ် ပရေၚ်ဒးဆောံလေၚ် ဇၞော်ကဵုဇြဟတ်ဟွံမွဲကီုတုဲ ပွမတေၚ်လဝ်ဂဗုတ်ကုညးဒေသဖလိန်တံဂှ် မ္ဒးက္လေၚ်ရုပ်သီကဵုရောၚ် ချူဓမံက်လဝ် ပ္ဍဲကဵုလိက်က္လိလဝ်တၚ် တုပ် စိုတ်ညးသ္ကအ်ဂှ်နွံရ။
0 Comments