ဘာတန်ဒေါဝ် ကွာန်နာၚ်သၠုၚ်
ပ္ဍဲဂိတုအဝ်ဂါတ် (၁၇) အခိၚ်ဗ္တံဂှ် ကောန်ပျူတာ (၂) စုမ်၊ စက်ပၠောလိက်၊ တဳဝဳသီုစက်သၟဝ်မွဲစုမ်၊ ကေန်မရာမွဲစုမ် (ကက်ဆက်) ကီု သီုဖအိုတ်ၚ္ၚုဟ်မး ၜိုတ် (၁၆) ကိုတ်ပြၚ် ဍေံကၠတ်ဂွံဏာရောၚ် ဂးရ။
“ဍေံလုပ်ဂှ် လုပ်လပါ် (ရုံးခန်း) ဂှ် ဟွံသေၚ်ပုဟ်။ နူလုပ်နူဟဒမ်လပါ်တေံ ဍေံဍံၚ်လုပ်ကၠုၚ် နူကဵုဒေၚ်လပါ်လ္တူဂှ် ဏောၚ်။ မၞိဟ်တဲအောန်ဂှ် ၜါပိဍေံဒဒးဒှ်ဏောၚ်၊ ချိၚ်ဆကေတ်ရ။ ဍေံတံယိုက်ဏာကပေါတ်တုဲ သၟဝ်ကျာပါၚ်ဂၠံၚ် ပ္ဍဲသုသာန်ဂှ် ဖအ် (ဖေါ့) တံ ပါကေန်တံ ဍေံထောံလဝ်ဂှ်ရ။ မြဍေံပါမံၚ်ကီု မြဂှ် ၜံက်မံၚ်ပ္ဍဲဟဒမ်ရုၚ် (ရုံးခန်း) ဂှ်ကီု၊ ကပေါတ်ဆက်စပ် သှေ်မံၚ်ဂှ် ဗၠာဲသၟိၚ် (ရဲ) တံ သီဏာလဝ်ဖအိုတ်ရ” သာ်ဏံ သကိုပ်အုပ်ဓုပ်ကွာန်နာၚ်သၠုၚ် နာဲ ထောန်တုၚ် ဟီုရ။
ဟဒမ်ရုၚ် (ရုံးခန်း) ဂှ် ခါတ်လဝ်ကသအ် ၜါကဆံၚ်ကီုလေဝ် ဟိုတ်နူကဵုသၠဖ္ဍာန် ဟွံချိုတ်ပၠိုတ်ဂှ် နူကဵုဟဒမ်ဗ္တောန် လိက်မွဲကဆံၚ် ဍေံကၠောံအာဟဒမ်ရုၚ် (ရုံးခန်း) တုဲ ဍေံကၠတ်ဂွံဏာရောၚ် ညးဆက်ဟီုရ။
“တၞးလိက်ရုၚ်ဆေၚ်စပ်တံဂှ် မုလေဝ်ဍေံဟွံကေတ်ဏာပုဟ်။ ကပေါတ်ကၠေံအာဂှ် ကပေါတ်အလဵုအသဳ ပါမံၚ်တှေ် ကပေါတ်အလဵုအသဳဂှ်တှေ် ဒးဗပေၚ်ဏောၚ် ဗွဲမပြဟ်၊ ဂွံဆက်ကၠောန်ကမၠောန်ဂွံ ဂွံဗပေၚ်ကဵုၝဏံဂှ် ချပ်မံၚ်ညး သ္ကအ်ဖိုဟ်” သာ်ဏံ ညးရေၚ်တၠုၚ်ဖိုလ်ဘာမွဲတၠ ဟီုရ။
ညးတာလျိုၚ်မၚ်ဘာ (ကျောၚ်းစောၚ့်တာဝန်ခံ) ဂှ် ဟိုတ်နူကဵုသာသ္ပအ်တာလျိုၚ်ဂးတုဲ ၚ္ၚုဟ်မးကောန်ပျူတာမွဲစုမ် နကဵုသြန် (၅) ကိုတ်ဒ္ကေဝ် ဒးလေဲကဵုရောၚ် သကိုပ်အုပ်ဓုပ်ကွာန် ဟီုလဴကဵုရ။
ဘာတန်ဒေါဝ်ကွာန်နာၚ်သၠုၚ်ဂှ် ဒုၚ်သ္ဇိုၚ်ကဵုဘာတန်မူလ နူကဵုကွါန်နာၚ်သၠုၚ်၊ လေံတက်အခေါန်တံတုဲ ပံက်လဝ်ပ္ဍဲ ကဵုပါၚ်ဂၠံၚ်ကွာန်နာၚ်သၠုၚ်ဂှ် သ္ၚောဲခြာမံၚ်ကဵုကွာန် (ဒၞာဲမၞိဟ်ဂမၠိုၚ်ဒၟံၚ်) ဂှ်ရောၚ် ဂွံတီကေတ်ရ။
