က္ဍိုပ်သ္ကိုပ်ဗော်ဍုၚ်မန်တၟိ ၂ တၠ(IMNA)
သွက်ဂွံဆဵုဂဗပ္ဍဲနေပျဳတဝ်ဂှ် ချိၚ်တ္ၚဲဟွံဂွံဏီ ဂွံတီကေတ်ရ။
ကိုပ်ကၠာတေံ အတိုၚ် ဌာန်ဇၞူပရေၚ်ၜိုပ်လလမ် MPC ပ္ညဳပ္ညပ်လဝ်ဂှ်မ္ဂး ပ္ဍဲကဵု ဂိတုအဝ်ဂေတ်၂၅ ကဵု ၂၈ ဂှ် က္ဍိုုပ်သ္ကိုပ် ၜါလ္ပာ်တံ သွက်ဂွံဆဵုဂဗသဳကၠဳ ပရေၚ်ဂကောံပါလုပ် သွက်ဂွံထပက်စၟတ်တဲ လိက်ကသုက်ဒေါံပန်ပှော်အလုံဍုၚ်ရောၚ် ဂးရ။
ညးမပါလုပ်ပ္ဍဲ ဂကောံညးစၞးပ္ညဳပ္ညပ် ကောန်ဍုၚ်အရၚ်ကဆံၚ်သၠုၚ် SD ကဵု ဒုဥက္ကဌ ဗော်ဍုၚ်မန်တၟိ နာဲဟံသာဂှ် “ပ္ညဳလဝ်ကဵုအလဵုအသဳတံတုဲ ၊ ညံၚ်ဂွံဒှ်ပြဟ်ဟ်မာန်၊ ဂိတုဂတဏံညံၚ်ဂွံဆဵုညးကအ်မာန်၊ သွက်ဂွံဆဵုညးသကအ် ပ္ဍဲကဵု ၂၈ ဏံဂှ် ဒှ်ဟွံမာန်ရပုဟ်” ညးဟီုရ။
သွက်ဂွံအာသဳကၠဳ ပ္ဍဲနဝ်ပျဳတဝ် ရုဲစှ်လဝ်က္ဍိုပ်သ္ကိုပ် ဂကောံရပ်လွဟ်ကောန်ဍုၚ်အရၚ် ၅ တၠဂှ် ဥက္ကဌဗော် ဍုၚ်မန်တၟိ MNP နာဲထဝ်မန်၊ ဥက္ကဌ ဗော်သွးကောန်ဂကူကရေၚ် KNU သ္ကိုပ်ဗိုလ်ဇၞော် မူတူးစေးဖိုး၊ ဒု-ဥက္ကဌ ဂကောံဗၠးၜးကောန်ဂကူကချေၚ် KIO သ္ကိုပ်ဗိုလ်ဇၞော် အၚ်ဗန်လ၊ ဥက္ကဌ ဗော်တဴတက်ကောန်ဂကူကရေၚ်ဍာဲ KNPP အေဘယ်တွိ၊ နာယက ဗော်ဍုၚ်သေံ (သျှာန်) တဴတက် SSPP ဒု- သ္ကိုပ်ဗိုလ်ဇၞော် သေထေန်တံ ပါလုပ်ဏောၚ်ဂွံတီကေတ်ရ။
တုပ်သာ်ဂှ်ကီု ညးစၞးဂကောံပ္ညဳပ္ညပ်ကဆံၚ်သၠုၚ် က္ဍိုပ်သ္ကိုပ် SD ပဒိုနော်စီဖိုးရာစိန်၊ ဒု-က္ဍိုပ်သ္ကိုပ်ဂကောံ (၁) ဒံက်တာ လဂျာ၊ ဒု-က္ဍိုပ်သ္ကိုပ်ဂကောံ (၂) ပူးဇၚ်ကျုံးတံလေဝ်ပါလုပ်ရ။
နာဲဟံသာဂှ် “ ယဝ်ခါရ ပြေပြံၚ်တှေ် ချိၚ်တ္ၚဲတုဲ ဆၜိုတ်ထပက်စၟတ်တဲ ၊ ပရေၚ်ကဵုကေတ်ဏံဂှ် ဟွံပြေပြံၚ်ပုဟ်တှေ် ဒှ်အာဗီုတြေံပၠန်၊” ညးဟီုလဝ်ကဵု သၟာပရိုၚ်တံ သာ်ဏံနွံရ။
လၟုဟ်ပြဟ်ဟ်ဏံ သွက်ဂွံထပက်စၟတ်တဲ NCA ဂှ် အလဵုအသဳတံ ကော်ဘိက်လဝ် ၁၅ ဂကောံဓရ်တုဲ၊ ဂကောံရပ်လွဟ် ၆ ဂကောံသှေ်မံၚ် ဒပ်ပၞန်ဂကူ တအောၚ် (ပလံၚ်) TNLA ၊ ဂကောံရပ်လွဟ် ကိုဝ်ကန် MND-AA ၊ ဒပ်ပၞန်ရခေၚ် AA ၊ ဂကောံကောန်ဂကူ “ဝ” WNO ၊ ဂကောံဒဳမဝ်ကရေက်တေတ်ဠာဟူ LDU ကဵု ကံၚ်သဳကောန်ဂကူ ရခေၚ် ANC တံဂှ် ဟွံကော်ဘိက်ဏီရ။
ဆဂး ပ္ဍဲကဵု ပေါဲကောံဓရီု Ethnic Armed Organizations Summit EAOS ကၠောန်လဝ်ပ္ဍဲဍုၚ်သေံ ဒၞာဲဍုၚ်ဇံၚ်မာဲ ပ္ဍဲဂိတု အဝ်ဂေတ် ၂၁ စဵုကဵု စိုပ်၂၄ တေံ ဖျေံလဝ်သ္ကုတ်သွာတ် ထပက်စၟတ်တဲ ဒေါံပန်ပှော် အလုံဍုၚ် NCA ဂှ် ဂကောံရပ်လွဟ် ကောန်ဂကူကောန်ဍုၚ်အရၚ် ညံၚ်ဂွံပါလုပ်သီုဖအိုတ်ဂှ် ဂစာန်အာဏောၚ်၊ ညးမဒှ်သဘာပတိ ဥက္ကဌ KNU သ္ကိုပ်ဗိုလ်ဇၞော် မူတူးစေးဖိုး ဗှ်ထ်ၜးသ္ပဒတန်လဝ် ပ္ဍဲကၟာတ်အခန်ကၞာသဳကၠဳဳလဝ်ရ။
တၚ်ပါလုပ် ပ္ဍဲကဵု လိက်ကသုက် NCA ဂှ် ၃၃ တၚ်ဂှ် ညးစၞး အလဵုအသဳကဵု ညးစၞး ဂကောံရပ်လွဟ်ကောန်ဍုၚ်အရၚ်တံ ဂွံလဝ်တၚ်တုပ်စိုတ် ၃၂ တၚ်ကီုလေဝ် သှေ်မံၚ်ပ္ဍဲကဵုတၚ်လကရဴအိုတ်ပိုဒ် “ သဘောတူစာချုပ်လက်မှတ်ရေးထိုးခြၚ်း” သွက်ဂွံထပက်စၟတ်တဲ စၞးဂကောံရပ်လွဟ်ကောန်ဍုၚ်အရေၚ်ဂမၠိုၚ်ဂှ် ဂကောံ ၆ ဂကောံတေံ အလဵုအသဳတးပါဲလဝ်ရ။
