ညးစၞးအလဵုအသဳကဵု ဂကောံရပ်လွဟ် ၈ ဂကောံသဳကၠဳလဝ်(MPC)
မ္ဂး ညးစၞး သီုၜါလ္ပာ်တံ ဆဵုဂဗသဳကၠဳ ဖျေံသ္ဂုတ်သွာတ်ဏောၚ် ဂွံလဝ်ပရိုၚ်ရ။
သေပ်တေမ်ဗာ ၂၀ လောန်ကၠုၚ်ဏံဂှ် မၞိဟ်စၞး နူဂကောံ ရပ်လွဟ် ၈ ဂကောံ ကဵု လ္ပာ်အလဵုအသဳ ဝန်ဇၞော် ဥုအံၚ်မေန် ဒုဥက္ကဌ UPWC သီုဥုခေန်ဇြဝ်ဥု ကေုာံ ကောန်ဂကောံ နူMPC တံ အဃောဆဵုဂဗသဳကၠဳလဝ် ပ္ဍဲရုၚ် MPC သွက်ဂွံချိၚ်စွံတ္ၚဲ အရၚ်ဂွံထ္ပက်စၟတ်တဲ လိက်ကသုက် NCA ဂှ်တုဲ တုပ်လဝ်စိုတ် အတိုၚ်ဗွဲလ္တူဂှ်ရ။
“တ္ၚဲဏံ ရန်ကဵု သွက်ဂွံ ချိၚ်စွံတ္ၚဲ အရၚ်ဂွံထ္ပက်စၟတ်တဲ လိက်ကသုက် NCA ဂှ်တုဲ မၞိဟ်စၞး နူဂကောံ ရပ်လွဟ်ကောန်ဍုၚ်အရၚ် ကဵု မၞိဟ်စၞး နူအလဵုအသဳ တံ ဒ္စးဒုၚ် သဳကၠဳလဝ်ကၠာရ။ နဒဒှ်ပဏာမ က္လေၚ်ဆဵုညးသ္ကအ် ပ္ဍဲအံက်တဝ်ဗာ ၃ တေံပၠန်ဏောၚ် သ္ဂုတ်သွာတ်လဝ်ရ။ စိုပ်တ္ၚဲတေံမှ တ္ၚဲလဵု ဒှ်ထ္ပက်စၟတ်တဲဍာံရောဂှ် သဳကၠဳသ္ဂုတ်သွာတ်အာ ဗဗွဲသၞောဝ်ပၠန်ဏောၚ်။ လၟုဟ်ဂှ် အယာံမာတ် ချိၚ်လဝ် တ္ၚဲဂွံက္လေၚ်ဆဵု ညးသ္ကအ်ပၠန်ဟေၚ်ရ” သာ်ဝွံ ဥုညဵုအုၚ်မျေအ် နူ MPC ဟီုရ။
ရန်ကဵု သ္ဂောံချိၚ်ဖါတ်တ္ၚဲဂှ်ရ သွက်ဂွံပ္ညဳညးသ္ကအ် ဗွဲပဏာမ ပ္ဍဲတ္ၚဲသေပ်တေမ်ဗာ ၂၀ ဂှ် နူအလဵုအသဳ ဘိက်လဝ် ဂကောံရပ်လွဟ် ၁၅ ဂကောံတုဲ အပ္ဍဲဂှ် ညးစၞးဂမၠိုၚ် နူဂကောံ ရပ်လွဟ် (၈) ဂကောံ မတွံဂး ဂကောံဗၠးၜး ကောန်ဂကူပအိုအ် PNLO၊ဗော်ဗၠးၜး ရးရခေၚ် ALP၊ဒပ်ကရေၚ် ပတုဲဖဵုကဵု ဒဳမဝ်ကရေဇြဳ DKBA၊ ဗော်ပရေၚ်တောတက် ရးသေံ SSPP၊ ဗော်ကောန်ဂကူကရေၚ် KNU၊ ဂကောံမာၚ်ဠာ NDAA၊ ကံၚ်ဇြဳပရေၚ်ၜိုဟ်လလံကရေၚ် KNU/KNLA-PA၊ မုက်ဒပ် ဒဳမဝ်ကရေတ်တေတ် ကွးဘာဂမၠိုၚ် အလုံဍုၚ်ဗၟာ ABSDF တံ တိုန်စိုပ်လဝ်ရ။
မုက်ဒပ်ကောန်ဂကူချေၚ် CNF ၊ ကံၚ်ဇြဳက္လေၚ်ပ္တန်ရးသေံ RCSS၊ ကာပ်ပၠာန် ကံၚ်ဇြဳသဵုယှေဝ်ဠေတ် ကောန်ဂကူနာဂ NSCN-K ဂကောံရပ်လွဟ် ၃ ဂကောံဏံ ကၠောန်မံၚ်ကောံဓရီု ကမ္မတဳဗဟဵု ညးတံတုဲ တိုန်စိုပ် ပေါဲသဳကၠဳဂှ်ဟွံမာန်ရ။ ၜိုန်ဂှ်လေဝ် ပေါဲထ္ပက်စၟတ်တဲ NCA ဂှ် ညးတံတိုန်တွဵုရ က္လေၚ်လဝ်ပရိုၚ်နွံ ဥုညဵုအုၚ်မျေအ် နူ MPC ဂှ်ဟီုရ။
စပ်ကဵုကိစ္စ သွက်ဂွံပါလုပ် ပ္ဍဲပေါဲထ္ပက်စၟတ်တဲ NCA ဂှ်တုဲ က္ဍိုပ်သ္ကိုပ်ဂမၠိုၚ် နူဂကောံရပ်လွဟ် ကောန်ဍုၚ်အရၚ်တံလေဝ် နူသေပ်တေမ်ဗာ ၂၈ ဒဵုစိုပ် ၃၀ ဂှ် ညးတံဆဵုဂဗ သဳကၠဳ ပ္ဍဲဍုၚ်ဇၚ်မာဲ ရးသေံထာဲဂှ်ဏောၚ် ဂွံတီလဝ်ရ။
ပေါဲသဳကၠဳ ဇၚ်မာဲတုဲဒှ်အာမ္ဂး အာတိုန်စိုပ် ပေါဲသဳကၠဳ အံက်တဝ်ဗာ ၃ မံက် သွက်ဂွံဖျေံသ္ဂုတ်သွာတ် တ္ၚဲဂွံထ္ပက်စၟတ်တဲ NCA ဂှ်ဏောၚ်တုဲ တ္ၚဲဂှ်မ္ဂး ညးစၞး အလဵုအသဳ ကဵု ညးစၞး ဂကောံ ရပ်လွဟ် ကောန်ဍုၚ်အရၚ်တံ ဆဵုဂဗသဳကၠဳ အိုတ်ပၠန်ဏောၚ် ဂွံတီရ။
0 Comments