ဒပ်ပၞာန် RCSS/SSA(internet)
သ္ကိုပ်ဗိုလ်ဇၞော်သာၚ်ဠ နွံကဵုအခေါၚ်ဟီုဂး နူ RCSS/SSA ဂှ် “ပ္ဍဲကာလပေါဲရုဲမာဲ ဟွံဒှ်ပေါဲဗ္တိုက်ဂှ် ခိုဟ်အိုတ်ရ။ ပေါဲဗ္တိုက် ဒှ်မံၚ်မ္ဂး ဂွံဒှ်ပေါဲရုဲမာဲ ဗၠးဗၠးၜးၜး နွံကဵုဗဗွဲဓဝ်ဂှ် ဟွံလောဲသွာရ၊ ဒၟါနူဂှ်ရ ပရေၚ်ချဳဒရာၚ် ဒပ်ၜါလ္ပာ်တံဂှ် ဒးချိၚ်ဆ ဗ္စာရဏာဏောၚ်၊ ဗွဲတၟေၚ် မိက်ဂွံဖ္တိုက်ဖၟောဝ်ဂှ် မွဲလ္ပာ်ကဵုမွဲလ္ပာ် အာကၠုၚ် စၠောံပရိုၚ် ညးသ္ကအ်ညိ၊ ဒၞါဲညးမွဲလ္ပာ်နွံဂှ် ဂၠံၚ်ဗၠေတ်တုဲ စိုပ်ကၠုၚ်ကီုဒှ်၊ ကၠုၚ်ကေတ်တ်ရ ကီုဒှ် ဟဂွံကဵုလဝ် ပရိုၚ်ညးသ္ကအ်မ္ဂး ဒှ်အထေၚ်ဗၠေတ်တုဲ ပန်ညးသ္ကအ်ပၠန်ဏောၚ်၊ ဒှ်သာ်ဂှ်ရ ကိစ္စစၠောံပရိုၚ်ဂှ် ပၟိက်ဇၞော်မံၚ်” သာ်ဝွံ ပ္ဍဲကဏ္ဍ သၟာန်သှ်ကဵု ဌာန်ပရိုၚ်ဗၠးၜးမန်ဂှ် ညးဂးတဴသာ်ဂှ်ရ။
သၟာၚ်နူဂှ် ဒပ်သီုၜါလ္ပာ်ရ မ္ၚးနူဌာန်ဒေသ ဒပ်ဇကုတုဲ လ္ပအာ ဌာန်ဒေသ ဒပ်ညးတၞဟ်ညိ၊ ဒ္ဂေတ်ဝတ်ပၞာန်ဂှ်လေဝ် မၚ်မွဲအိုတ်ညိ သ္ကိုပ်ဗိုလ်သာၚ်ဠ ဖ္တိုက်ဖၟောဝ်ဏာရ။
ပ္ဍဲလ္ပာ် ပွိုၚ်ဍုၚ်ဏာပ်ဇြာမ်၊ ကျံက်မေဝ်၊ကတ်ဃာဲ နွံခတှေ် တွဵုရးသေံ သၟဝ်ကျာတေံလေဝ် ဒပ်အလဵုအသဳကဵု ဒပ်တအၚ် TLNA တံ ဒှ်မံၚ်ပေါဲဗ္တိုက် မဏှေံ မဏှေံတုဲ လ္ပာ်ပွိုၚ်ဍုၚ်ကောန်ဟိၚ် ဂှ်လေဝ် ဒပ်အလဵုအသဳကဵု ဒပ် RCSS တံ ဒှ်မံၚ်ပေါဲဗ္တိုက်ကီုရ။
ဗီုဂှ်ကီုရ ပ္ဍဲတွဵုရးကချေၚ် လ္ပာ်ဒေသ ဇြမ်ပရာဗမ် ကဵု ဒေသပူတာအဝ် တေံလေဝ် ဒှ်မံၚ်ပေါဲဗ္တိုက်ကီုဂှ်ရ စရၚ် ညးနွံကဵု အခေါၚ်ကဵုမာဲဂှ်လေဝ် ဗက်ကေတ်ဟွံမာန်၊ ဒေသမာဲလ္ၚဵုလ္ၚဵုဂှ် ဒှ်ကၠောန် ဟွံဒှ်ကၠောန်ဟာ ဂှ်လေဝ် တီဟွံချိုတ်ပၠိုတ်ဏီဖိုဟ်- ဒံက်တာတူဂျာ ဥက္ကဌ ဗော်ဒဳမဝ်ကရေဇြဳ တွဵုရးကချေၚ် KSDP ဟီုရ။
ပေါဲရုဲမာဲ သၞာံ ၂၀၁၅ ဂှ် ကၠောန်ပ္ဍဲဂိတု နဝ်ဝေမ်ဗာ ၈ ဂှ်ဏောၚ် နူကမ္မယှေန် ပေါဲရုဲမာဲကၟိန်ဍုၚ် လလောၚ်လဝ်တုဲ အခါလၟုဟ်ဏံ အလုံဍုၚ်ဗၟာ ဗော်ပရေၚ်ဍုၚ်ကွာန် ဂမၠိုၚ်တံ ချဳဒရာၚ်မံၚ် ပရေၚ်စန်ဒက်မာဲ ဗီုညးကဵုညး အိုတ်ရ။
အလဵုအသဳကဵု ဂကောံရပ်လွဟ် ကောန်ဍုၚ်အရၚ် တံလေဝ် သွက်ဂွံ ထ္ပက်စၟတ်တဲ လိက်ကသုက် ဒိုအ်ပန်ပှော် အလုံဍုၚ် (NCA) ဂှ် ဆဵုဂဗ သဳကၠုၚ်ညးသ္ကအ်တုဲ ဂိတုအံက်တဝ်ဗာ ပထမသတ္တဟဏံမ္ဂး ထ္ပက်စၟတ်တဲအိုတ်ဏောၚ် ဟီုဂးတုပ်စိုတ် နွံကီုလေဝ် တ္ၚဲလဵု ဒှ်ဍာံဂှ် ချိၚ်ဖါတ်လဝ် ချိုတ်တ်ပၠိုတ်တ် ဟွံမွဲဏီရ။
