ဌာန်ပရိုၚ်ဗၠးၜးမန် – ပ္ဍဲသေပ်တေမ်ဗာ ၃ မံက်ဂှ် ဒပ်ပၞာန်ဗၟာ သၞေဟ်ကၚ် ဒဒန်ဇၞော်ရေဝ် ရပ်ဂွံမၞိဟ်ၜါတလ နူကဵုဂကောံဒမၠ နာဲမန်ဆာန် မက္ဍိုက်ပ် ချဳဒရာၚ်မံၚ် သ္ကုတ်ရေဝ်သမၠုၚ်ကျာ၊တွဵုရးမန် ဂှ်တုဲ ပ္ဍဲဍုၚ်ရေဝ်ဂှ် ဂၠိုက်ဂၠာဲ သီဂွံဒၟံၚ် လွဟ်တံဆက်က် သာ်ဝွံ ဂွံတီကေတ် နူညး မညောန်ကဵု ဗွိုၚ်မဆေၚ်စပ်တံရ။

ကုမၞိဟ်ရပ်ဂွံလဝ် ၜါတလဂှ် ဒပ်ကဵု ဒပ်ဗၠာဲသၟိၚ်တံ စၟဳတ်သၟာန်သၟုက်တုဲ လွဟ်အေကေ(၄၇) မွဲဇကိုအ်ကီု၊ ပ္ဍဲကဵုဆေၚ်စသုၚ် နွံကရပ် ဒၞါဲဝဳစသတ် (မွေးမြူရေးဇုံ) ကွာန်အၜဝ် ပွိုၚ်ဍုၚ်ရေဝ်ဂှ် လွဟ်ဂၠေံ (၃) ဇကိုအ်ကဵု မကံညိညကီု၊ ပ္ဍဲဍုၚ်ခေါဇာဂှ် လွဟ်၊ မကၠဟ်(မခတိုဟ်) ကဵု မာၚ်တံကီု၊ပ္ဍဲအရာပ်သဳရိမာလာ ဍုၚ်ရေဝ် ကဵု ပ္ဍဲကွာန်အရုတ္တံၚ် ရေဝ်သၟဝ်ကျာဂှ်လေဝ် လွဟ်ဂၠေံဂၠေံတံကီု ဂၠိုက်ဂၠာဲသီဂွံဏာတုဲ သီုဂၠိုက်ဂၠာဲ ရပ်ဂွံ ဂဥုဲၜူမာဲတံကီု သာ်ဝွံ မၞိဟ်မွဲတလ မကြပ်ကဵု ဒပ်ဗၠာဲသၟိၚ်ဂှ် ဟီုထ္ၜးရ။

ညးတေံလဴထ္ၜးဂှ် “ပ္ဍဲသၞေဟ်ကၚ် ပါၚ်ဒဒန်ဇၞော်ရေဝ်ဂှ် နူဒပ် ရပ်ဂွံကောန်ရဲ နာဲမန်ဆာန် ၜါတလတုဲဗက် ဍေံတံစၟဳစၟတ် ဗက်ဒတောဝ်ဂှ် မွဲဒၞါဲတုဲမွဲဒၞါဲ သီဂွံ ဂဥုဲၜူမာဲ၊ လွဟ်ဂၠိၚ်၊ မကၠဟ်၊ မာၚ် တံရ။သီဂွံလွဟ်ဂၠေံ ၜိုတ် ၁၀ ဇကိုအ်ဒှ်မံၚ်” ဂးရ။

ပ္ဍဲ သေပ်တေမ်ဗာ ၁၀ ဖါသဝ်တ္ၚဲဂှ်လေဝ် ရဲဒပ်ကဵု ဒပ်ဗၠာဲသၟိၚ်တံ လုပ်ဂၠိုက်ဂၠာဲ ပ္ဍဲသ္ၚိနာဲမန်ဆာန် အရာပ်အံၚ်မေတ္တာ ဍုၚ်ရေဝ်တုဲ တၞးလိက် ဆက်စပ်ကဵု နာဲမန်ဆာန်ကီု၊ ထဝ်ကယဝ် မၞုံၚုဟ်မး ၜိုတ် ၁၂၀ ကိုဋ်ပြၚ် နူသမ္ဘာ နာဲမန်ဆာန်ဂှ်ကီု သီဂွံဏာ ဂးရ။

ညးမွဲတလ ဟွံမိက်ဓမံက်ယၟု နူအရာပ်အံၚ်မေတ္တာဂှ် “ဘဲ ဂကောံဒမၠ တံဏံဂှ် အလုံဒေသဏံ ဒးဒုၚ်ကၠုၚ် တၟာလံရ၊ ပ္ဍဲအတူဍုၚ် လွဟ်လက်နက် နွံမံၚ်ဗီုဏံဂှ် ဒးဂွိၚ်ကွေံကွေံ၊ လၟုဟ် သီဂွံဏာ ယျတှေ် တၚ်ဂုန်ကွေံကွေံ” ဂးရ။

ရန်ကဵု မိက်ဂွံဗ္တိုက်ဖၟိုတ်ထောံ ဂကောံဒမၠ မချဳဒရာၚ်မံၚ် သ္ကုတ်ရေဝ် သမၠုၚ်ကျာတေံဂှ်တုဲ ပ္ဍဲသၞာံ ၂၀၁၄ ဂှ် နကဵုအစဳဇန်ဒပ်ပၞာန်(ဗၟာ) နာဲမန်ဆာန် စိုပ်အာ ပ္ဍဲဂကောံဒပ်စဵုဒၞါ ပရေၚ်ၜိုဟ်လလံမန် (ဂကောံနာဲဗေန်က္ဍိုက်ပ်) နဒဒှ် အဆံၚ် ဒုညးက္ဍိုပ်ကီုလေဝ် ဗွဲကြဴဏံ ပါ်တိတ် နူဂကောံ အဗေန်တုဲ ဗက်ကံက်မံၚ်လှုဲ၊ တံၚ်မၞိဟ် မိက်သြန်၊ဗက်ဗ္တိုက်ပၠံၚ်စမံၚ် ပ္ဍဲဒေသဂှ်ရ။

ပ္ဍဲဂိတုအဝ်ဂါတ် ၂၅ ဂှ် ဂကောံနာဲမန်ဆာန် လုပ်ပန် ဂကောံဒပ်စဵုဒၞါ ပရေၚ်ၜိုဟ်လလံမန် (ဂကောံ နာဲဗေန်ကဵု ပၞာန်ဗၟာ နာၚ်လေန်ဥု က္ဍိုက်ပ်) ပ္ဍဲအကြာ ခေါဇာ ကဵု သ္ၚိကျာဂှ်တုဲ နူဒပ်နာဲဗေန် ဒးဝပ် ၂ တလရ။

အတိုၚ်ဂွံလဝ်ပရိုၚ် လက္ကရဴအိုတ်ဏံဂှ် အပ္ဍဲပွိုၚ်ဂိတုဏံ နာဲမန်ဆာန် ညံၚ်ဂွံလုပ်ပအပ်လွဟ် ဟွံသေၚ်သာ်ဂှ် ညံၚ်ဂွံဒုၚ်ရပ်ဂှ် နူဂကောံဂြောဝ်ဂတာ နာဲမန်ဆာန်တံ လုပ်ဒုၚ်လဝ်ကအ်ပါၚ် ပ္ဍဲ စကခ ၁၉ ဍုၚ်ရေဝ် ဂှ် တုဲရ ဂွံတီကေတ်။