အိုက်သာၚ် – သွက်ဂွံထ္ပက်စၟတ်တဲ လိက်ကသုက် ဒိုအ်ပန်ပှော် အလုံမွဲဍုၚ် NCA ပ္ဍဲဂိတုအံက်တဝ်ဗာ ပထမသတ္တဟဂှ် အလဵုအသဳကဵု ဂကောံရပ်လွဟ် ကောန်ဍုၚ်အရၚ်တံ ဆဵုဂဗသဳကၠဳကၠုၚ်မံၚ် ညးသ္ကအ်ကီုရလေဝ် လ္ပာ်တွဵုရးသေံဇၞော်တေံဂှ် ဒှ်မံၚ်ပေါဲဗ္တိုက်ဖိုဟ် ဂွံလဝ်ပရိုၚ်ရ။

“ဒပ်အလဵုအသဳဂှ် ထ္ၜးဟိုတ်ပသောၚ်တိဍာ်တုဲ ချဳဒရာၚ်မံၚ်ရ။ အခါဒပ်အလဵုအသဳ ချဳဒရာၚ်ဂှ် ဂွံကဵုသမ္တီ ဂွံကဵုပရိုၚ်ဂှ် ဟွံမွဲကၠုၚ်မွဲလှေ်၊ ဒၟါနူဂှ်ရ အထေၚ်ဗၠေတ်ကၠုၚ် ညးသ္ကအ်တုဲ ဒှ်ကၠုၚ်ပေါဲဗ္တိုက်ရ။ တုဲပၠန် ညောန်လုပ်ကဵု ကာလပေါဲရုဲမာဲယျတှေ် မၚ်မွဲ ညံၚ်ဟဂွံဒှ်ပေါဲဗ္တိုက်ဂှ် ခိုဟ်အိုတ်ရ။ ချဳဒရာၚ် အာကၠုၚ်မ္ဂး သွက်ဂွံစၠောံပရိုၚ်ညးသ္ကအ်ဂှ် ဒှ်အဓိက” သာ်ဝွံ သ္ကိုပ်ဗိုလ်ဇၞော်သာၚ်ဠ နွံကဵုအခေါၚ်ဟီုဂး နူ RCSS (ကံၚ်ဇြဳက္လေၚ်ပ္တန်ရးသေံ) ဟီုရ။

လ္ပာ်ဒေသ မပ္တံကဵု ကောန်ဟိၚ်၊မာဲပန်၊ ဃဝ်လာမ် သ္ကုတ်သမၠုၚ်ကျာ ရးသေံဇၞော်တေံဂှ်မ္ဂး ပပ္တံနူ ဂိတုအဝ်ဂါတ် ဒဵုကဵုစိုပ် သေပ်တေမ်ဗာ (၁၆) ဂှ် ဒပ်အလဵုအသဳကဵု ဒပ် RCSS တံ ဒှ်ဂွံပေါဲဗ္တိုက် ဇၞော်/ဍောတ် ဗၞတ် (၇) ဝါတုဲရ RCSS ဂးရ။

လ္ပာ်ဒေသ မပ္တံ ကတ်ခါဲ၊ဏာပ်ဇြာန်၊ကျံက်မေဝ် သ္ကုတ်တွဵုရးသေံဇၞော် သၟဝ်ကျာတေံဂှ်လေဝ် ပပ္တံနူဂိတုဂျုန်တုဲကၠုၚ်ဏံ ဒဵုစိုပ်သေပ်တေမ်ဗာ ၁၇ ဏံဂှ် ဒပ်အလဵုအသဳကဵု ဒပ်တအာၚ် (ပလံၚ်) PSLF/TLNA တံ ဒှ်မံၚ်ပေါဲဗ္တိုက် မဏှေံမဏှေံကီု နူဌာနလလောၚ်ပရိုၚ် PSLF/TLNA ဟီုရ။

လဟီု ဗိုလ်ဇၞော်မာၚ်အာ်ကျဝ် လျိုၚ်ဌာနလလောၚ်ပရိုၚ် PSLF/TLNA ဂှ်မ္ဂး “ပ္ဍဲတိဍာ် ပိုဲပိုၚ်ပြဳအုပ်ဓုပ်မံၚ်ဂှ် နူအလဵုအသဳ ဂလိုၚ်သမၠဲပ္တိတ်ဒြဟတ်ဒပ်၊ ထ္ၜးဟိုတ်ကဵု ပသောၚ်တိဍာ်တုဲ မဏှေံမဏှေံ ထ္ပက်ကၠုၚ်ပၞာန်၊ ဒၟါနူဂှ်ရ ပါဲဟွံဗၠး ပိုဲလေဝ် ဒးက္လေၚ်တဝ်စၞေဟ် စဵုဒၞါတိဍာ်ပိုဲ၊ ဂုန်နူဂှ်ရ ဍေံဒှ်ကၠုၚ်ပေါဲဗ္တိုက်၊ လ္ပာ်ပိုဲ ထိၚ်ဒဝ် ဖအောန်ဖျေံ ပေါဲဗ္တိုက်ဏောၚ်ဂှ်လေဝ် လလောၚ်ပ္တိတ်လဝ်တုဲမံၚ်ကီုရ။ ဣဏံ နကဵုအလဵုအသဳ ထေက်ကဵု ဒးသ္ပသမ္တီဏောၚ်” သာ်ဝွံဂးတဴရ။

ပ္ဍဲဂိတု ဂျုန်တေံဂှ်မ္ဂး ဒပ်အလဵုအသဳ ကဵု ဒပ်တအာၚ် (ပလံၚ် ) TLNA တံ ဒှ်ဂွံပေါဲဗ္တိုက် ဗၞတ် (၁၈) ဝါတုဲ ပ္ဍဲဂိတု သေပ်တေမ်ဗာ ဏံလေဝ် လ္ပာ်တွဵုရးသေံ သၟဝ်ကျာတေံဂှ်မ္ဂး ဒှ်မံၚ်ပေါဲဗ္တိုက်ဆက်က် ဖိုဟ် နူဌာနလလောၚ်ပရိုၚ် PSLF/TLNA ဟီုရ။

လ္ပာ်ဒေသ ဇြမ်ပရာဗမ် ကဵု ပူတာအဝ် တွဵုရးကချေၚ် တေံဂှ်လေဝ် ပ္ဍဲဂိတုသေပ်တေမ်ဗာဏံ ဒပ်အလဵုအသဳကဵု ဒပ်ကချေၚ် KIA တံ ဆက်ဒှ်မံၚ် ပေါဲဗ္တိုက်ဖိုဟ်ကီုရ။
စပ်ကဵုကိစ္စ ထ္ပက်စၟတ်တဲ လိက်ကသုက် ဒိုအ်ပန်ပှော် အလုံမွဲဍုၚ် ကော်ဂးNCAဂှ်တုဲ သွက်ဂွံက္လေၚ်ပရိုၚ် ကုအလဵုအသဳဂှ် ပ္ဍဲဂိတုသေပ်တေမ်ဗာ ၂၄ ဏံမ္ဂး က္ဍိုပ်သ္ကိုပ် ဂကောံရပ်လွဟ် ကောန်ဍုၚ်အရၚ်တံ ကၠောန်သ္ပကောံဓရီု ပ္ဍဲဍုၚ်ဇၚ်မာဲ ကၟိန်ဍုၚ်သေံဂှ်ဏောၚ် ဂွံတီကေတ်ရ။

လောန်ကၠုၚ် သေပ်တေမ်ဗာ ၉ ဂှ် သမ္မတ ကဵု က္ဍိုပ်သ္ကိုပ် ကောန်ဍုၚ်အရၚ်တံ ဆဵုဂဗသဳကၠဳညးသ္ကအ် ပ္ဍဲနေပျဳတေံတုဲ သွက်ဂွံ ဒှ်ထ္ပက်စၟတ်တဲ NCA ပ္ဍဲသေပ်တေမ်ဗာ ၂၉ ဏံဂှ် နူသမ္မတ ပၠောပ်ဂလာန် အာတ်မိက်လဝ် ကုက္ဍိုပ်သ္ကိုပ်တံဂှ် ကီုရ။