ကၟိုန်ဍာ်စဵုလဝ်ဍာ်ၜဳမွဲဒၞာဲ(နိရဥ္ဇရာ)
ကၟိုန်အလဵုအသဳကၠောန်လဝ်ကဵုလၟုဟ်ဝွံ တက်လဝ်ဗွဲအပြောံ သၞောတ်ဗ္ၜတ်ကဆံၚ်ဟွံစိုပ် ဒၞာဲကြဳဂှ်ကြဳ၊ ဒၞာဲဍောတ် သဝ်ဒၟံၚ်လေဝ်နွံမံၚ်တုဲ အခိၚ်ဍာ်ကတဵုမ္ဂး မၞိဟ်ကၠောန်တ္ၚဲ ၜိုတ် (၇) တၠကဵု ဇၟာပ်တ္ၚဲအောန်အိုတ် မၞိဟ်(၃) တၠ ဒးကဵု မၚ်မွဲမၚ်ရံၚ် ၜံက်ဗဝ်ဒၟံၚ်ရောၚ် သၟာဗ္ၚတံ ဟီုရ။
“ကၟိုန်ညးတံကၠောန်လဝ်လၟုဟ်ဂှ် အပြောံ (အကြမ်းထည်) ရ။ ပ္ဍဲကဵုကသီုဏံ ဒၞာဲကၟိုန်ပြိုဟ်လေဝ် နွံမံၚ်ကီုရ။ ရဲဗ္ၚတံ ရ ဒးကၠောန်စကေတ်တ်မံၚ်၊ စရိတ်ကၠောန်တ္ၚဲလေဝ် က္ဍၚ်မံၚ်လေဝ်။ အခိၚ်ဍာ်ကတဵုတှေ် ကိစ္စကၟိုန်ပိုတ်ဂှ် ဒးဒှ်ဓဝိၚ် ဂၠိုၚ်ကွေံ” သာ်ဝွံ ညးမကၠောန်မံၚ်ဝါဗ္ၚ ပ္ဍဲတကအ်ၜိုပ် ဥူတာန်ဝေန် ဟီုရ။
နကဵုညးဍုၚ်ကွာန်သၟာဗ္ၚတံ သွက်ဂွံတက်ကၟိုန်သၟာဗ္ၚ (ဒၞာဲအလဵုအသဳတံ ဟွံကေတ်လျိုၚ် – သွက် ၁၆၀၀ ပေ) ဂှ် တိ ဗ္ၚမွဲဨကမ္ဂး (၅၀၀၀) ဒ္ကေဝ် ကံက်ကေတ်လဝ်တုဲ တက်လဝ်ကၟိုန်သၟာဗ္ၚကီု လၟုဟ်မ္ဂးနကဵုသြန်သှေ်ဂှ် လိၚ်မၞိဟ်တ္ၚဲတုဲ ကဵုမံၚ်ၜံက်ဗဝ်မံၚ်ကၟိုန်ဂှ်ရောၚ်။
ညးစၞးကၠတ်ထဝ်တွဵုရး နာဲအံၚ်နာၚ်ဥူဂှ် “ဟိုတ်နူကဵုဘဲဒဏ်သဘာဝကဵုဒှ် ဟိုတ်နူကဵုဟိုတ်နာနာသာ် ယဝ်ရဝါဗ္ၚလီု လာ်အာဏောၚ်တှေ် နူကဵုအလဵုအသဳဂှ် ဒးကၠောန်ကဵုဖအိုတ်ရ။ ဒးကေတ်တာလျိုၚ်သီုဖအိုတ်ရ၊ ဍေံချူလဝ် ပ္ဍဲကဵု လိက်အခေါၚ်အရာသၟာဗ္ၚ နွံမံၚ်ပေၚ်ၚ်ဏောၚ်” သာ်ဝွံ ညးဟီုရ။
ကမၠောန်တက်ကၟိုန်ဍာ် ပ္ဍဲကဵုတကအ်ၜိုပ်ဂှ် နကဵုအလဵုအသဳတံ ဖျေံကဵုလဝ်ဘဏ္ဍာဂှ် သွက်ဂွံတက်ကၟိုန် ဇမၠိၚ် (၅၀၀၀) ပေ၊ ဂတာဇိုၚ်ကၟိုန် (၃၂) ပေ၊ သမၠုၚ် (၉) ပေ ကေုာံ ဗလးစးကၟိုန် (၆) ပေရောၚ်။
ဆေၚ်စပ်ကဵုကၟိန်ကၠောန်လဝ် ပ္ဍဲကဵုတကအ်ၜိုပ်ဂှ် “ၜိုတ်တီလဝ်ဂှ်တှေ် ကၠောန်ဂွံလဝ် ညိညညိကွေံ၊ ကၠောန်ဂွံလဝ် ကၟိုန်တိသၟးရ။ ဒးဒၞာမံၚ်ကဵု ဆုဒုန်တံဏီ။ ၜိုတ် (၂) ဂိတုပၠန်တှေ် ဍေံတအ် ဆက်ကၠောန်ပၠန်ဏောၚ်” သာ်ဝွံ ဝန်ဇၞော်ပရေၚ်တဵုလွဳ တွဵုရးဍုၚ်မန် ဥူမျဵုညောအ် ဟီုရ။
သၞာံတုဲကၠုၚ်ဝွံ ဟိုတ်နူကဵုက္ၜၚ်ဇြောတ်ဗ္တဳတံဂှ် ဗီုပြၚ်ဇၟောဝ်ဍာ် ဗၠေတ်ဗၠေၚ်အာတုဲ ဝါဗ္ၚပ္ဍဲကဵုတကအ်ၜိုပ် ၜိုတ် (၁၀၀) ဨက လာ်စှေ်အာပ္ဍဲၜဳတုဲ ဝါဗ္ၚ ဗၞတ် (၆၀၀) ဨက ဟိုတ်နူကဵုကၟိုန်ပိုတ် ဍာ်ဖ္ဍုၚ်လုပ် ဒးလီုလာ်အာလဝ်နွံရောၚ်။
ပ္ဍဲကဵုကအ်ၜိုပ်သ္ကုတ်လပါ်သၟဝ်ဂှ် တိဗ္ၚနွံမံၚ် ၜိုတ် (၆၀၀) ဨကတုဲ ပ္ဍဲသၞာံဏံ ၜိုတ် (၁၀၀) ဨကဂှ် ဟိုတ်နူကဵုဍာ်ဖ္ဍုၚ် တက်ကီု တိဗဗေၚ်တိပၠေတ်တံတိုန်ကၠုၚ်ကီု ဟိုတ်နူကဵုဒှ်အာဗီုပြၚ်ၜဳလီု ကၟာလီုတံကီု ဒၞာဲလ္ၚဵုဒှ်အာဗီုပြၚ်ကြုၚ်တံတုဲ တဵုသြောံဟွံဂွံရောၚ် အတိုၚ်ညးဒေသတံ ဟီုထ္ၜးလဝ်ဂှ် ဂွံတီကေတ်ရ။
0 Comments