ရုၚ်မာဲပ္ဍဲတွဵုရးမန် မွဲဒၞါဲ (IMNA)
ပ္ဍဲရုၚ်ဗၠာဲသၟိၚ်ကီု ဂွံတီကေတ်ရ။
ဟိုတ်နူကၠောန်သ္ပ ပွသာ်ဂှ်တုဲ တၠဆန္ဒမာဲ သွက်ဂွံစုတ်မာဲကဵုညးတအ် လၟိဟ်ကဵုလ္ၚီ ဒးဆောံအာ အခေါၚ်ကဵုမာဲတုဲ ညးစၞးမန်ပိတလ နာဲသိၚ်မျမိုၚ်၊နာဲကာန်လေန်၊နာဲအံၚ်ဌေ ဗော်ကောန်ဂကူမန် မလုပ်ပြိုၚ် သွက်ကၠတ်ထဝ် ပိအဆံၚ် တအ် ဒးကျအာမာဲဏောၚ် ဂးတုဲ တေၚ်လဝ် ဂဗုတ်ရ။
ကိစ္စဏံ ပ္ဍဲကာလပေါဲရုဲမာဲ တုဲအာတုဲဂှ် ညးတအ် တေၚ်ဗ္စိုပ်ကဵု ကမ္မယှေန် ပေါဲရုဲမာဲ ကၟိန်ဍုၚ်ကီုလေဝ် ကမ္မယှေန်ဟီု ကိစ္စဏံ ဍေံဒှ်အရာဗၠာဲသၟိၚ်ဏောၚ်တုဲ ဆေၚ်ကဵုရုၚ်ဗၠာဲသၟိၚ်ဟေၚ်ရ ဒှ်သာ်ဂှ်ရ ပ္ဍဲနဝ်ဝေမ်ဗာ ၂၂ ဂှ် အာတေၚ်လဝ် ဂဗုတ် ပ္ဍဲရုၚ်ဗၠာဲသၟိၚ်ရ သာ်ဝွံ နာဲယာန်လေန်အံၚ် ကောန်ဂကောံ ကေတ်ဇၞးပေါဲရုဲမာဲ ပွိုၚ်ဍုၚ်ရေဝ် ဗော်ကောန်ဂကူမန် ဟီုရ။
“ဗွဲကိုပ်ကၠာ ပိုဲတေၚ်ကဵု ကမ္မယှေန်ကၟိန်ဍုၚ်၊ နူကမ္မယှေန်တေံဟီု ဣဏံဂှ် ဒှ်အရာဗၠာဲသၟိၚ်ဏောၚ်၊ အာတေၚ်ကဵုဗၠာဲသၟိၚ်တအ်ညိ ဂးနၚ်တုဲ နဝ်ဝေမ်ဗာ ၂၂ ဂှ် ပိုဲအာပံက်ဂဗုတ် ပ္ဍဲရုၚ်ဗၠာဲသၟိၚ်ရ။ ဗၠာဲသၟိၚ်တအ်လေဝ် လဝါဲလဝါဲဂှ်ရ ညးတအ် ဂၠိုက်ဂၠာဲစၟဳတ်ကဵု” ယာန်လေန်အံၚ် ဂးရ။
ပ္ဍဲအလုံတွဵုရးမန်ဏံ ကာလ ကၠာဟွံစိုပ်ပေါဲရုဲမာဲက္ဍၚ်ကီု၊ ပ္ဍဲကာလပေါဲရုဲမာဲကီု၊ ကာလပေါဲရုဲမာဲတုဲအာဂှ်ကီု ပရေၚ်တေၚ်ဗ္စိုုပ် စပ်ကဵုပေါဲရုဲမာဲ နွံကၠုၚ်ကီုလေဝ် နူကမ္မတဳပ္ညဳပ္ညပ်တအ် ပရေပရံၚ်ကဵုတုဲ ပြေပြံၚ်ကၠုၚ်သၟးရ။ ပ္ဍဲဒဒှ်ပွိုၚ်ဍုၚ်ရေဝ်ဏံမွဲရ ဂွံဆဵုကေတ် အဆံၚ်ပံက်ဂဗုတ် သာ်ဝွံ ဥုဟိၚ်လေန်ထိတ် သၞာဲဒါ ပေါဲရုဲမာဲ နူရုၚ်ကမ္မယှေန်ပေါဲရုဲမာဲ တွဵုရးမန် ဟီုရ။
လဟီုညးမ္ဂး “ကိစ္စဒှ်ပ္ဍဲရေဝ်ဂှ် ဍေံတၟေၚ်မံၚ်ညိ။ မၞိဟ်ဇၞော်ပရေၚ်အုပ်ဓုပ်လေဝ် ဒုၚ်ဂုန်တုဲရ။ ကမ္မယှေန်လေဝ် ပြေစိုတ်သၠးမံၚ်အခေါၚ်ရ။ဆ္ဂး ဗော်ကောန်ဂကူမန်ဂှ် ထပ်တေၚ်ပၠန်။ ဣဏံဂှ် ဒှ်အရာဗၠာဲသၟိၚ်တုဲ ဒးအာတေၚ် ပ္ဍဲဗၠာဲသၟိၚ်ရ” ဥုဟိၚ်လေန်ထိတ် ဂးရ။
ယြဴပ္ဍဲဒေသမာဲမွဲ မၞိဟ်နွံကဵု အခေါၚ်ကဵုမာဲ မွဲမွဲတလဒှ်ဒှ်၊ လၟောဝ်ညးစၞးကၠတ်ထဝ် ဟွံသေၚ်သာ်ဂှ် ညးစၞးပေါဲရုဲမာဲ မွဲမွဲတလဒှ်ဒှ်၊ ကမ္မယှေန်ဒးတာလျိုၚ် ပ္ဍဲဒေသမာဲ မွဲမွဲဒှ်ဒှ်၊ မၞိဟ်မွဲမွဲ မပါမံၚ်ပ္ဍဲဂကောံ ရုၚ်မာဲ မွဲမွဲဒှ်ဒှ် သက်သဳ ခိုၚ်ကၠိုက်ဗိုန်ဗတ်မ္ဂး ကာလကၠာဟွံရုဲမာဲဂှ်ကီု၊ အဃောမကၠောန်မံၚ်ပေါဲရုဲမာဲကီု၊ ကြဴနူတ္ၚဲမသ္ပတုဲ အပ္ဍဲပွိုၚ် ၁၅ တ္ၚဲဂှ်ကီု အတိုၚ်ဗဗွဲသၞောဝ်ဂှ် တေၚ်ဗ္စိုပ်မာန်မံၚ် ဂးလဝ် ပ္ဍဲသၞောဝ်ပေါဲမာဲ နွံရ။
မၞိဟ်ဒးဒုၚ်စောဲဂဗုတ်ဂှ် ဒုဟ်နွံပြာကတ်မ္ဂး ဒဏ်ထံၚ် ဟွံၜက်နူမွဲသၞာံကီု၊ ဒဏ်သြန် ဟွံၜက်နူမွဲကိုဋ်ကီု၊ သီုဒဏ်ၜါသာ်ဂှ်ကီု စဳရေၚ် ဖျေံဒုဟ်ဂွံမံၚ်ဏောၚ်ဂှ်လေဝ် ဂးလဝ်ပ္ဍဲသၞောဝ်ပေါဲမာဲဂှ်ကီုရ။
