UNFC ဒုဥက္ကဌ နာဲဟံၚ်သာ (Photo: Internet)
ကောန်ဍုၚ်အရၚ်ညဳသွဟ် UNFC တံဟီုရ။
ဂိတု ဒဳဇြေန်ဗါ စၟတ်တ္ၚဲ ရ စဵုကဵုစိုပ် စၟတ်တ္ၚဲ ၁၀ ဂှ် နူကဵု ဂကောံကံၚ်ဇြဳ ဖေဝ်ဒရေဝ် ကောန်ဂကူ ကောန်ဍုၚ်အရၚ် ညဳသၟဟ်တအ်ဂှ် နကဵု ဂကောံရပ်လွဟ် ကောန်ဍုၚ်အရၚ် ဟွံဂွံထ္ပက်လဝ် စၟတ်တဲ NCA တအ် သ္ပကောံဓရီု ကၠံသၞာံ ပ္ဍဲဍုၚ်သေံ ဒၞာဲဍုၚ်ချေန်မိုၚ်ဂှ်ရ။
နူကဵု ဝိုၚ်ကောံဓရီုဂှ် မွဲကဆံၚ် ပ္ဍဲကဵုဂို ဒဳဇြေန်ဗာ စၟတ်တ္ၚဲ ၁၂ ဂှ် ဂကောံ UNFC တအ် ပ္တိတ်လိက် လလောၚ်တြး စပ်ကဵု လိက်ကသုက် တုပ်စိုတ် ဒေါံပန်ပှော် အလုံဍုၚ် NCA ထမံက်မံၚ်ရုပ်ရဴ ကမၠောန်ဂှ်တုဲ အလဵုုအသဳ၊ ပၞာန် တအ်ကီု၊ ခြာဟွံလအ် ဗော် NLD ဂွံအဝဵု ပံက်အလဵုအသဳတၟိမ္ဂး သွက်ဂွံ ဆဵုဂဗသဳကၠဳ ဂၠာဲအာသွဟ် နဇိုၚ်နတဲမာန်ဂှ် သဳကၠဳဏာလဝ်တုဲ ဂွံဆက်ထမံက်အာ ရုပ်ရဴ ရေၚ်တၠုၚ်အာ မာန်ဂှ် ဒက်ပတိုန်လဝ် ဂကောံ ညးစၞးသဳကၠဳဂၠာဲသွဟ် စပ်ကဵုပရေၚ်ဍုၚ်ကွာန် မွဲဂကောံရောၚ် ထမံက်ထ်ၜး လဝ်ရ။
လိက်ကသုက် NCA ဂှ် နူကဵုဂကောံကောန်ဍုၚ်အရၚ်တအ် သီုဖအိုတ် ၜိုန်ရဟွံဂွံ ထ္ပက်လဝ် စၟတ်တဲ ဏီလေဝ် သၞာံ ၂၀၁၅ ဂိတုဒဳဇြေန်ဗါ စၟတ်တ္ၚဲ ၈ဂှ် သ္ပဒတန်ဏာ ပ္ဍဲကၠတ်ထဝ်ဂှ်ရ။
“ဟွံဒှ်လိက်ကသုက် ကဆံၚ်ကၟိန်ဍုၚ်ဏီ သ္ပဒတန်ဏာ ပ္ဍဲကၠတ်ထဝ်ဂှ် ဒှ်ဟွံထေက််ပုဟ်၊ သ္ပဏာဗီုဏံဂှ် ပရေၚ်ၜိုဟ်လလံ သၞောတ်စှေ်စှေ် ဒက်ပတိုန် ဟွံမာန်ပုဟ်၊ မွဲပၠန်ဂှ်တှေ် သီုဖအိုတ် နွံပၟိက်မံၚ် သွဟ်တံဂှ်လေဝ် ဂွံဟွံမာန်ပုဟ်၊ နကဵုပိုဲလေဝ် ဒစဵုဒစးအာဏောၚ်” သာ်ဝွံ ဂကောံ ကံၚ်ဇြဳဖေဝ်ဒရေဝ် ကောန်ဂကူကောန်ဍုၚ်အရၚ်ညီဳသၟဟ် UNFC ဒုဥက္ကဌ နာဲဟံၚ်သာ ဟီုရ။
သွက်ဂွံထပက်စၟတ်တဲ လိက်ကသုက် ဒေါံပန်ပှော် အလုံဍုၚ် NCA ဂှ် နူကဵုဂကောံရပ်လွဟ် ကောန်ဍုၚ်အရၚ် (၁၅) ဂကောံတအ်ဟေၚ် ကော်ဘိက်ကၠုၚ် အလဵုအသဳရ။
ဂကောံရပ်လွဟ် ကောန်ဍုၚ်အရၚ် နွံမံၚ် (၂၁) ဂကောံတုဲ သီုဖအိုတ် ညံၚ်ဂွံဂွံအခေါၚ် ထ္ပက်စၟတ်တဲ မာန်ဂှ် နူကဵုဂကောံ UNFC တအ် အာတ်မိက်လဝ်ကီုလေဝ် ပ္ဍဲကဵုသၞာံ ၂၀၁၅ ဂိတုအံက်တိုဘာ စၟတ်တ္ၚဲ ၁၅ ဂှ် အလဵုအသဳ ကဵု ဂကောံရပ်လွဟ် ကောန်ဍုၚ်အရၚ် (၈) ဂကောံတအ်ဟေၚ် တုပ်စိုတ် ထ္ပက်ဏာ စၟတ်တဲရ။
မွဲလ္ပါ်ပၠန်ဂှ်လေဝ် ဂကောံ (KIO)၊ ဗော် (SSPP)၊ ဗော် (KNPP) ၊ ဗော်ဍုၚ်မန်တၟိ (NMSP)၊ ဂကောံ (NDAA)၊ ဗော် “ဝ” (UWSA)၊ ဂကောံ (NSCN-K)၊ ဂကောံတအာၚ်း (ပလောၚ်) (TNLA)၊ ဂကောံ (MNDAA)၊ ဒပ်ပၞာန် ရက္ခိုၚ့် (AA)၊ ကံၚ်ဇြဳကောန်ဂကူရခေၚ် (ANC)၊ ဂကောံကောန်ဂကူ “ဝ” (WNO)၊ ဂကောံ (LDU) တအ်ဂှ် ဟွံဂွံထ္ပက်လဝ် စၟတ်တဲ NCA ဏီရ။
0 Comments