ပ္ဍဲကဵုသ္ဘၚ်သဳကၠဳ ပရေၚ်ၜိုဟ်လလံဍုၚ် မကၠောန်ကၠုၚ်လဝ် နူစၟတ်တ္ၚဲ ဇာန္နဝါရဳ ၁၂-ဒဵုကဵု ၁၆ ဂှ် ညးစၞးဂမၠိုၚ် နူဗော်ပရေၚ်ဍုၚ်ကွာန်မန်၊ နူဂကောံ မချဳဒရာၚ် ပရေၚ်ဝေါဟာမၞိဟ်မန် တံ တိုန်စိုပ်ကီုတုဲ ညးတံ ပ္တိုန်ထ္ၜး သဳကၠဳဏာ ကိစ္စဒက်ပ္တန်ဍုၚ်ဖေတ်ဒရာ ကဵု ပရေၚ်ဂီုကၠီုဍုၚ်ရ ဂွံတီရ။
ဆဂှ်သၟးဟွံသေၚ် အဝဵုကၟိန်ဍုၚ်ကဵု အဝဵုတွဵုရး တံဂှ်လေဝ် ပါ်ထောံကၠးကၠးတုဲ အတိုၚ်မပါ်လဝ်ဂှ်ဟေၚ် ပြာပြာကတ်တ် ဒးက္လေၚ်ချူဓမံက်လဝ် ပ္ဍဲသၞောဝ်ဥပဒေဍုၚ် ဒုၚ်သဇိုၚ် သၞောတ်ဖေတ်ဒရာပၠန်ဏောၚ် သာ်ဝွံ ညးအုပ်ကာ ဗော်ကောန်ဂကူမန် နာဲလျးတၟး ပ္တိုန်ထ္ၜးသဳကၠဳဏာ ပရူဒက်ပ္တန်ကၟိန်ဍုၚ်ဝှိဒ္ဒရာလ်ဂှ် ဟီုလဴထ္ၜးရ။
“ ပ္ဍဲတွဵုရး ကောန်ဂကူတံဂှ်တှေ် အခေါၚ်အဆံၚ်တုပ်ကီု၊ အခေါၚ်အဝဵု ကံကုသိုလ်ဂကူဇကု ဇကုဖန်ကေတ်တ်ကီု ဒးနွံပေၚ်ၚ်ဏောၚ်။ အခေါၚ်ချူခၞံသၞောဝ် သွက်တွဵုရးဇကုဂှ်လေဝ် ဒးနွံဏောၚ်။ ဒုၚ်သဇိုၚ်ကဵု ကောန်ဍုၚ်အရၚ်တုဲ ဒးပံက်တွဵုရးဏောၚ်။ ပ္ဍဲတွဵုရး ကောန်ဍုၚ်အရၚ် ဂှ်လေဝ် ဒးနွံကဵု အဝဵုပိတန်ဏောၚ်” နာဲလျးတၟး ဂးရ။
ဗီုက္ဍိုပ်သ္ကိုပ်ဂမၠိုၚ် နူဗော်ပရေၚ်ဍုၚ်ကွာန်မန် တိုန်ဒၟံၚ်သ္ဘၚ်သဳကၠဳ ပရေၚ်ၜိုဟ်လလံဍုၚ် (Kyaw Zayra Oo)
“ပ္ဍဲသၟဝ်ပရေၚ်အုပ်ဓုပ် ဂအုပ်ဝန်ဇၞော်ဂှ် မုဒးနွံရောမ္ဂး ဒပ်ဗၠာဲသၟိၚ်နွံဏောၚ်၊ ဒပ်ဂီုကၠီု (ပၞာန်မၚ်မွဲဍုၚ်ကွာန် ညံၚ်ရဴပျဳဒုသေတ်)၊ ဒၞါဲလ္ၚဵု ယဝ်နွံပၟိက်ကီုတှေ် ဗီုကဵု ဒပ်မၚ်ပယဵုတံဏံ နွံဏောၚ်၊ သွက်ဂွံဖန်ကိစ္စဏံဂှ် ဒးကဵုလဝ် အဝဵုပေၚ်ၚ် ကုဂအုပ်ဝန်ဇၞော် တွဵုရးဏောၚ်ဂှ်လေဝ် သဳကၠဳလဝ်ကီုရ။ ကဏ္ဍပရေၚ်စဵုဒၞါဂှ် အဆံၚ်ကၟိန်ဍုၚ်တေံရ ဒးရပ်စပ်တုဲ ပ္ဍဲဒပ်ပၞာန်ကၟိန်ဍုၚ်ဂှ်မ္ဂး ဒပ်တိုက်၊ဒပ်ကျာ၊ဒပ်ဍာ် ကီု၊ ဒပ်ရပ်လွဟ် ကောန်ဍုၚ်အရၚ်တံကီု၊ တုဲပၠန် ဒပ်ပၞာန်တွဵုရးညးကဵုညး (ပ္ဍဲတွဵုရးမွဲမွဲ ဗက်ကဵုအလိုက်ဗ္ၜတ် လၟိဟ်မၞိဟ်တုဲ ပံက်စွံလဝ်ဒပ်ပၞာန်) ပိသာ်ဏံ ဒးနွံဏောၚ်။ ဆ္ဂး ဂအုပ်ဒပ် က္ဍိုက်ပ်ပရေၚ်စဵုဒၞါဂှ် ဒးဒှ်မွဲဟေၚ်ရ” သာ်ဝွံ အ္စာသဝ် မာံနဲသဵု ဟီုလဴကဵု ဌာန်ပရိုၚ်ဗၠးၜးမန်ရ။
ပ္ဍဲသ္ဘၚ်သဳကၠဳဂှ်ဝွံ သဳကၠဳကၠုၚ်လဝ် အတိုၚ်လၟေၚ် ပြေၚ်ရေၚ်လဝ် က္ဍိုပ်လိက် မပ္တံကဵု ကိစ္စ ပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ် ဝေါဟာမၞိဟ်၊ ပရေၚ်တိဗ္ၚကၠံသွဝ်၊ ပရေၚ်ဂီုကၠီုတံတုဲ ညးစၞးမန်ဂမၠိုၚ် နူဗော်ကောန်ဂကူမန်ဂှ် (၃) တလ၊ နူဗော်ဒဳမဝ်ကရေဇြီ အလုံရးမန်ဂှ် (၃) တလ၊ နူဗော်ညးဗြဴ (မန်) ဂှ် (၁) တလ၊ ပူဂိုလ် မသ္ပစၞးကဵု ကောန်ဂကူမန်ဂှ် (၃) တလ၊ နူဂကောံ ပရေၚ်ဝေါဟာမၞိဟ်တံဂှ်လေဝ် မၞိဟ်တိုန်ထေက်တံ ပါလုပ် မွဲမွဲတလကီုတုဲ တိုန်စိုပ်လဝ် သ္ဘၚ်သဳကၠဳ ဂွံတီကေတ်ရ။
ပ္ဍဲသ္ဘၚ်သဳကၠဳ ပရေၚ်ၜိုဟ်လလံဍုၚ် ညးစၞးတိုန်စိုပ် ရ၀၀ ပြၚ်ဂှ်ဝွံ ဂကောံအလဵုအသဳ၊ ဂကောံကၠတ်ထဝ်၊ ဒပ်ပၞာန်၊ ဂကောံရပ်လွဟ် ကောန်ဍုၚ်အရၚ် မထ္ပက်လဝ် စၟတ်တဲ NCA ၊ ဗော်ပရေၚ်ဍုၚ်ကွာန် ၉၀ ပြၚ် ကေုာံ ဂကောံဝေါဟာမၞိဟ်တံ တိုန်စိုပ်အိုတ်တုဲ တၚ်သဳကၠဳ ကေုာံ လိက်ကၞပ် ဂကောံညးကဵုညး ၊အခန်ဍေံကဵုဍေံ ပ္တိုန်ထ္ၜးသဳကၠဳကၠုၚ်လဝ်တံဂှ်လေဝ် ပကောံပကေဝ် ပ္တိုန်စွံလဝ်စၟတ်သမ္တီကီု ဂွံတီကေတ်ရ။
