ကလောန်ရုဲပ္တိုန် ညးဇၞော်ကွာန် (သ္ကိုပ်အုပ်ဓုပ်ကွာန်) /အရာပ် ပ္ဍဲပွိုၚ်ဍုၚ်ကျာ်မြဟ် တွဵုရးမန်ဂှ် ကာလလၟုဟ် ရုဲစှ် ကြပ်တုဲဒှ်အိုတ်ရဂှ် ဂွံတီကေတ် နူရုၚ် ညးတာလျိုၚ် ရုၚ်သ္ကိုပ်ပရေၚ်အုပ်ဓုပ် ပွိုၚ်ဍုၚ် ရ။
ပါၚ်လုပ်ဍုၚ်ကျာ်မြဟ်(Internet)
ပ္ဍဲပွိုၚ်ဍုၚ်ကျာ်မြဟ်ဝွံ အရာပ်လ္တူဍုၚ်ဂှ် နွံၜါအရာပ်၊ ဂကောံကွာန်ဂှ် နွံ(၄၃) က္ဍိုပ်တုဲ လၟုဟ်ရုဲစှ်တုဲအာ (၄၄) ဒၞါဲရ။ ဂကောံကွာန် ကအ်ခနေအ် မွဲက္ဍိုပ်ရ သှေ်မံၚ်ဏီ ဥုအံၚ်ထာ် သ္ကိုပ်ပရေၚ်အုပ်ဓုပ် ပွိုၚ်ဍုၚ် ဟီုရ။
“ ဗီုပြၚ်ကလောန်ဂှ် အတိုၚ်သၞောဝ်တှေ် ဗွဲကိုပ်ကၠာ နူပွိုၚ်ဍုၚ် ဒးပံက်ကဵု ဂကောံကောပ်ကာဲ ကၠာ။ ကာလရုဲစှ်ရမ္ဂး ဂကောံကောပ်ကာဲဏံရ ဒးသ္ပကဵုက္ဍိုပ်။ ရုဲစှ်တုဲအာမ္ဂး ဒးပ္တိုန်ထ္ၜးကဵုအဲ။ ကွာန်လ္ၚဵု မွဲၜါကွာန် ဟွံပေၚ်စိုတ်ဂှ် တေၚ်ဗ္စိုပ် (Complain) လဝ်နွံကီု” သာ်ဝွံ ပ္ဍဲဂိတုဇာန္နဝါရဳ ၁၉ ဂှ် ဥုအံၚ်ထာ် လဴကဵုဌာန်ပရိုၚ်မန်ရ။
ပ္ဍဲတၞးလိက် တေၚ်ဗ္စိုပ်ဂှ် ပ္ဍဲအခန်ရုဲစှ်ဂှ် မုဟွံဒှ်မွဲသာ်ရ။ ပ္ဍဲကဵု စရာဲဍာ်ဒ္ကေဝ် သ္ကိုပ်အုပ်ဓုပ်ကွာန် ဟွံဍိုက်ပေၚ်ဂှ်ရ ဟွံပေၚ်စိုတ်တုဲ ပ္ဍဲကဵုသၞောဝ် ဂးလဝ် ဒးဒှ်မၞိဟ် မက္တဵုဒှ်နူမိမ ကောန်ဍုၚ်အရၚ်ဍာံဍာံဏောၚ်ဂှ် ဍေံဂၠဟ်မံၚ်ကဵု ကွာန်ဂလာမဿလေမ်တံတုဲ ကွာန်ဂလာတံဂှ်ရ တေၚ်ဗ္စိုပ်လဝ်နွံ ညးဟီုရ။
“ဂကောံကောပ်ကာဲ (၅) တလ သွက်ဂွံက္ဍိုက်ပ် ပ္ဍဲအရာရုဲစှ် သ္ကိုပ်အုပ်ဓုပ်ကွာန် နွံကၠာလေဝ် ညးတံဂှ် ဒးကၠိုဟ်လဝ် နဲကၠောန် နဲဖန်ကီုဏောၚ်၊ဣဏံဂှ်ကိစ္စဇၞော်မံၚ်။ အတိုၚ်နဲကဲ ဒးကၠောန်ဂှ် ယဝ်ဟွံကၠိုဟ် ဟွံကၠးလဝ်တှေ် ဒှ်ကၠုၚ်ပြသနာမာန်မံၚ်။ မၞိဟ်ကောပ်ကာဲ (၅) တလ ညံၚ်ဂွံကၠိုဟ် နဲကဲကလောန်ဂှ် ဒးကဵု တန်ဗ္တောန်ကၠာဏောၚ်။ အ္ခိၚ်ဂှ်လေဝ်အောန်၊ကလောန်ဂှ်လေဝ် ဒးဃရေက်ကၠောန်တှေ် ပ္ဍဲသၟဝ်တေံ ယှုက်တွဵုရ” သာ်ဝွံ ဒံက်တာ အံၚ်နာၚ်ဥု အမာတ်ကၠတ်ထဝ် တွဵုရးမန် ဟီုရ။
ပ္ဍဲဇာန္နဝါရဳ ၁၆ ဂှ် က္လေၚ်ပဠေဝ်ပဠေတ် သ္ပဒ္တန် သၞောဝ်ဥပဒေ ပရေၚ်အုပ်ဓုပ်ကွာန်/အရာပ်တုဲ အယုက်အထက် (သက်တမ်း) သ္ကိုပ်အုပ်ဓုပ်ကွာန်/အရာပ် ဂှ် ဒးတုပ်ကဵု အယုက်အထက် သမ္မတဏောၚ် ဂးလဝ်ပ္ဍဲဥပဒေဂှ်ရ။
ဥပဒေရုဲစှ်မံၚ်လၟုဟ်ဏံဂှ် ဒှ်ဥပဒေ မသ္ပလဝ်ဒ္တန် ပ္ဍဲလက်ထက်တုဲတုဲကၠုၚ်တေံ ဏောၚ်တုဲ ကလောန် ရုဲစှ် သ္ကိုပ်အုပ်ဓုပ်ကွာန်/အရာပ်ဏံဂှ် ကၠာအယုက်အထက် ကၠတ်ထဝ်ညးဍုၚ် ဟွံအိုတ်က္ဍ္ဍၚ် ဇာန္နဝါရဳ (၃၁) စွံလက္ကရဴအိုတ်တုဲ အလုံဍုၚ် ညံၚ်ဂွံတုဲဒှ်ဂှ် ဂစာန်မံၚ်အိုတ်ရ။ အတိုၚ်ဥပဒေ သ္ပလဝ်ဒ္တန်လၟုဟ်ဏံဂှ်မ္ဂး မုလေဝ် ပိုဲဟွံဂွံစၞောန်လဝ်ဏီ သ္ကိုပ်ပရေၚ်အုပ်ဓုပ် ပွိုၚ်ဍုၚ် ဂးရ။
ပ္ဍဲပွိုၚ်ဍုၚ်ကျာ်မြဟ်ဏံ ပ္ဍဲကဵုရုဲပ္တိုန်လဝ် သ္ကိုပ်ပရေၚ်အုပ်ဓုပ်ကွာန်ဂှ် မၞိဟ်တြေံ က္လေၚ်ဒှ် နွံ (၂၀) တလတုဲ မၞိဟ်တိုန်ဒှ်တၟိဂှ် နွံ (၂၄) တလရ။ အပ္ဍဲ ၂၄ တလဂှ် ပ္ဍဲကွာန်ကြေဝ်ဏာ မၞိဟ်ဗြဴဏောၚ် တိုန်ဒှ် သ္ကိုပ်အုပ်ဓုပ် (ညးဇၞော်) ကွာန်တုဲ ပ္ဍဲတွဵုရးမန်ဏံမ္ဂး မၞိဟ်ဗြဴ ဂွံဒုၚ်ရုဲပ္တိုန် နဒဒှ် သ္ကိုပ်အုပ်ဓုပ်ကွာန်ဂှ် ဣဏံ ဒှ်ကိုပ်ကၠာအိုတ်ရ။
0 Comments