ပ္ဍဲသၞာံဗ္တောန်ပညာ (၂၀၁၆-၁၇) ဏံ သွက်ဂွံဗ္တောန်အာလိက်မန် ပ္ဍဲဘာသ္ဇိုၚ်တန်မူလအလဵုသဳ နဍာ်ဒ္ကေဝ် စိုပ်ပ်မာန် ရန်တၟံတုဲ နူကဵုကဝ်မတဳချူဓဇက် ဇုတ်ဓရံၚ်လိက်ဗွဟ်မန် (မွန်စာသၚ်ရိုးညွန်းတမ်း ပြုစုရေး ကော်မတီ) တအ် သ္ကိုပ်သ္ကကဵုမံၚ်တန်ဗ္တောန် နဲကဲဗ္တောန်လိက်မန် ကုအ္စာဗ္တောန်ဒၟံၚ်လိက်မန် အပ္ဍဲဘာ အလဵုအသဳ လၟိဟ် (၄၀၀) တၠရောၚ် ဂွံတီကေတ်ရ။

တန်ဗ္တောန်ဂှ် ပါ်သ္ကုတ်ၜါဝါတုဲ မွဲဝါမ္ဂး လၟိဟ် (၂၀၀) တၠရ။ သ္ကုတ်ပထမဂှ် စနူဂိတုဂျာန္နဝါရဳ (၂၃) ဒဵုစိုပ် (၂၆) ကီု၊ အလန်ဒုတိယဂှ် စနူစၟတ်တ္ၚဲ (၂၈) ဒဵုကဵုစၟတ်တ္ၚဲ (၃၁) ကီုဂှ် ပံက်ဗ္တောန်လဝ် ဒၞဲါၝောံခန် ဘာ တန်သၠုၚ် အ.ထ.က (၁)၊ လ္တူဍုၚ်မတ်မလီု တွဵုရးဍုၚ်မန်ရ။

အသေအဟာန်ပံက်တန်ဗ္တောန် နဲကဲဗ္တောန်လိက်မန်(MNA)

“အ္စာဘာ ပ္ဍဲကဵုအလဵုအသဳ ဗ္တောန်မံၚ်လိက်မန်တအ်ဂှ် ၜိုတ်ပိုဲတီတှေ် လိက်မန်ဍိုန်လျမံၚ် နဲကဲဂွံဗ္တောန်ကဵု ကောန်ၚာ်တအ် နဲလောဲလောဲ ညံၚ်ကဵုကောန်ၚာ်တအ် ဟွံဂွံလၞုဟ်အာကဵုလိက်မန်ဂှ် ပိုဲမိက်ဂွံစုတ်ဏာကဵု အ္စာ၊ အ္စာၝောံတအ် သွက်ဂွံဗ္တောန်အာ ပ္ဍဲသၞာံဂတဏံ” သာ်ဝွံ ညးက္ဍိုပ် ကဝ်မတီချူဓဇက် ဇုတ်ဓရံၚ်လိက် ဗွဟ်မန် နာဲရတ်ဂကူ ဟီုရ။

ပ္ဍဲတန်ဗ္တောန်ဂှ် မပ္တံကဵုနာဲအံၚ်ဇၞး၊ မိဇြဟာန် (ကထိကဋ္ဌာနလိက်ဗၟာ၊ တက္ကသဵုမတ်မလီု)၊ မိမျေအ်အ်တာန် (ကထိကကဝ်လိက်ပရေၚ်ပညာ)၊ မိမျေအ်အ်တိၚ် (ရုၚ်သ္ကိုပ်ပရေၚ်ပညာတွဵုရး)၊ မိမောဝ်ဆာဲ၊ နာဲဂံၚ်လွဳ၊ မိကျေန်တာန် ကေုာံ မိအာဲနန်၊ မိကျေဝ်ရတ် သီုဖၟိုတ် (၁၁) တၠ ပါလုပ်ဗ္တောန်ထ္ၜးကဵုရ။

“ပ္ဍဲဘာအလဵုသဳဂှ် Taxt Bookမန်ပိုဲ လၟုဟ်မှ ဂွံတိတ်ကၠုၚ်တှေ် သုၚ်စောဲ Taxt Bookဏံတုဲ နကဵုနဲဂတာပ် ခေတ်လၟုဟ် CCA ကလေးဗဟိုပြုသၚ်ကြားနည်းဏံ ညံၚ်ဂွံစိုပ်တရဴ ဗီုလဵုဂွံဗ္တောန်အာကဵုကောန်ၚာ် တအ် ဂှ်ကီု သဒ္ဒါမန်ကဵု သဒ္ဒါဗၟာဂှ် လ္ၚဵုဂှ် ဍေံဗၠေၚ်မံၚ်ညိညိနွံမံၚ်တှေ် အ္စာဗ္တောန်တအ်လေဝ် ညံၚ်ဂွံကၠးအာ ရန်တၟံ တုဲ ပိုဲကော်လဝ် တန်ဗ္တောန်ဏံ” သာ်ဝွံ အ္စာၝောံ မိမောဝ်ဝ်ဆာဲ ဟီုရ။

တန်ဗ္တောန်ဝွံ ကြဴနူဓမံက်လဝ်ရုပ်ရဴ ပရေၚ်ချူဓဇက်ဇုတ်ဓရံၚ်လိက်ဗွဟ်မန် သွက်ဂွံဗ္တောန် ပ္ဍဲဘာအလဵု အသဳတုဲဂှ် ဒှ်ကဵုဂွံလဝ်ပြာပြာကတ်တ်သာ်ဏံ အလန်ကိုပ်ကၠာအိုတ်ကီုရ။

တန်ဗ္တောန်အလန်ပထမဂှ် အ္စာ၊ အ္စာၝောံ မဗ္တောန်ဒၟံၚ်လိက်မန် ပ္ဍဲဘာအလဵုသဳ နူကဵုပွိုၚ်ဍုၚ်ပံၚ်၊ ပွိုၚ်ဍုၚ် တ္ကအ်ခၟိၚ်၊ ပွိုၚ်ဍုၚ်မတ်မလီု၊ ပွိုၚ်ဍုၚ်ဇြပ်ဗု၊ ပွိုၚ်ဍုၚ်မုဟ်ဍုၚ်၊ ပွိုၚ်ဍုၚ်ကျာ်မြဟ်တံ တိုန်စိုပ်တုဲ အလန် ဒုတိ ယဂှ် အ္စာ၊ အ္စာၝောံ နူပွိုၚ်ဍုၚ်ရေဝ်၊ ရးတနၚ်သဳ၊ တွဵုရးကရေၚ်တအ် တိုန်စိုပ်ဗ္တောန်ရောၚ် ဂွံတီကေတ်ရ။

အစဳဇန်ပွမဗ္တောန်လိက်မန် ပ္ဍဲဘာအလဵုသဳဂှ် ဓမံက်ကၠုၚ်လဝ်ရုပ်ရဴ စပ္တံသၞာံ (၂၀၁၄) တေံတုဲ အပ္ဍဲတွဵုရး ဍုၚ်မန်သၟးဂှ် ဗ္တောန်ဒၟံၚ်လိက်မန် ပ္ဍဲဘာအလဵုအသဳ သီုဖၟိုတ်နွံ (၃၈၂) ဘာရောၚ် ဂွံတီကေတ်ရ။