အပ္ဍဲတွဵုရးဍုၚ်မန် ကွာန်မၞုံဒၟံၚ်သကုတ်သၠုၚ်ကျာ ပွိုၚ်ဍုၚ်မုဟ်ဍုၚ်တံဂှ် ပရေၚ်ရုဲစှ်ညးအုပ်ဓုပ်ကွာန်တၟိ တုဲဒှ်အာ ကီုလေဝ် ကွာန်လ္ၚဵုလ္ၚဵုတံဂှ် ပရေၚ်ဟွံတုပ်စိုတ် လတူရုဲစှ်လဝ်ညးအုပ်ဓုပ်ကွာန်တံနွံဒၟံၚ်တုဲ ကိစ္စက္လေၚ်ပတိုန် လိက် ကုရုၚ်ဌာနအုပ်ဓုပ်ပွိုၚ်ဍုၚ်တံနွံမံၚ်ရောၚ် ဂွံတီကေတ်ရ။
ကွာန်လ္ၚဵုလ္ၚဵုတံဂှ် ဗွဲမၜိုတ်သြိုဟ်ဟေၚ် ဒုၚ်တၠုၚ်ညးအုပ်ဓုပ်တၟိကီု၊ လ္ၚဵုတြေံကီုတုဲ ကွာန်လ္ၚဵုတံဂှ် ညးဒုၚ်ရုဲတံ ဟိုတ်နူဟွံပေၚ်ကဵုသၞောဝ်ဒဒှ်အုပ်ဓုပ်ကွာန်တုဲ ကလေၚ်ပတိုန်လဝ်လိက်လေဝ်နွံရ။
“တၚ်နၚ်ချိုတ်တ်ပၠိုတ်တ် ဟွံမွဲမ္ဂးတှေ် ပတိုန်မံၚ်လိက်လေဝ် ဆၜိုတ်ဒှ်သၞဝဲ၊ ဂၠာဲသၞရဏောၚ်၊ ဟိုတ်ဂှ်ရ ဂၠာဲတၚ် နၚ်ချိုတ်တ်ပၠိုတ်တ်တုဲမှ ပတိုန်လိက်ညိဂှ် မိက်ဂွံဟီုသာ်ဏံရ၊ ပရေၚ်ပတိုန်လိက်ဏံဂှ် အခိၚ်ဟွံရုဲ ပတိုန်ဂွံ မံၚ်တွဵုရ” သာ်ဝွံ ညးမကောပ်ကာဲ ပ္ဍဲအရာရုဲပတိုန်ညးအုပ်ဓုပ်ကွာန် ပွိုၚ်ဍုၚ်မုဟ်ဍုၚ် သကုတ်သၠုၚ်ကျာ မွဲတၠ ဟီုရ။
ကွာန်လ္ၚဵုဂှ်မ္ဂး ကောန်ကွာန်တံဟွံမွဲပၟိက်ကဵု ညးအုပ်ဓုပ်တြေံဂှ်ကီုလေဝ် ညးအုပ်ဓုပ်တြေံဂှ်ဟေၚ် ကလေၚ်ဇၞး အာပၠန်ဂှ်ရ ပတိုန်လဝ်လိက်ရောၚ် ကောန်ကွာန်ဒဵုမာဲမွဲတၠ ဟီုရ။
“ပိုဲကောန်ကွာန်တံဂှ် ဟွံမွဲပၟိက်ကဵု ညးအုပ်ဓုပ်တြေံဏံပုဟ်၊ မွဲဒမြိပ် ညးအုပ်ဓုပ်မံၚ်အပ္ဍဲကွာန်ဂှ် အမှုကောန် ကွာန်တံ ဍောတ်တ်ဂှ် ညံၚ်ဂွံဇၞော်ဂှ်လေဝ် ဖန်ဖက်ကၠုၚ်၊ ကောန်ကွာန်တံဟွံပေၚ်စိုတ်၊ ဟွံမွဲပၟိက်ကဵု ညးအုပ်ဓုပ် တြေံဏီပုဟ်၊ ဟိုတ်ဂှ်ရ ပိုဲတံပတိုန်လိက်” သာ်ဝွံ ကောန်ကွာန်ဒဵုမာဲမွဲတၠဂှ် ဟီုရ။
အဃောကၠောန်သ္ပလဝ် ပေဲါရုဲစှ်အုပ်ဓုပ်ကွာန် အပ္ဍဲပွိုၚ်ဍုၚ်မုဟ်ဍုၚ်မွဲဒၞဲါ (ဗီုရုပ်-စၠန်ထဝ်)
ကွာန်လ္ၚဵုတံဂှ် ဂွံဇၞးအာမာဲညးအုပ်ဓုပ်ကွာန် သ္ဂောံဒှ်မၞိဟ်ဇကုတုဲ ကမ္မတဳ (၅) တၠ လ္ၚဵုတံဂှ် မၞိဟ်ညးကဵုညး ညံၚ် ဂွံဒှ်အာ ညးတာလျိုၚ်စှ်သ္ၚိမွဲတၠဂှ်လေဝ် ဓဇက်ကေတ်၊ မၞိဟ်ညးဂွံပါ ကၠောန်ကေတ်လဝ်လေဝ်နွံရ။ သ်အာၚ်နူဂှ်ပၠန် ပ္ဍဲကွာန်လ္ၚဵုတံဂှ် ကမ္မတဳ (၅) တၠ ရုဲစှ်လဝ် တာလျိုၚ်မၞိဟ်စှ်သ္ၚိမွဲတၠဂှ် ဗီုပြၚ်စှေ်စှေ်လေဝ် နွံတဴဗွဲမ ဂၠိုၚ်တုဲ ညးအုပ် ဓုပ်တြေံဒှ်ဒှ် တၟိဒှ်ဒှ် ဒုၚ်တၠုၚ်ကၠုၚ်လဝ်လေဝ် နွံဂၠိုၚ်ကီုရ။
“ကွာန်လဵုဒှ်ဒှ် ပိုဲမိက်ဂွံကဵုဒှ်ညးအုပ်ဓုပ်ကွာန်မွဲဂှ် သဇိုၚ်ဒးကၠောန်လဝ် အပ္ဍဲကွာန်ၜိုတ်ထေက်ကြက် ဒးနွံ၊ ညးလ္ၚဵု တံဂှ် ဒတုဲဖဵုသွက်ကွာန် ဟၟဲမွဲလှေ် မိက်ဂွံသ္ပအုပ်ဓုပ်ကွာန်ဂှ် ဒှ်ဟွံထေက်ရ။ အဲဒှ်အုပ်ဓုပ်ကွာန်တုဲမှ အဲကၠောန်ဂှ် ပိုဲကောန်ကွာန်တံ ဟွံမွဲပၟိက်ပုဟ်။ ပိုဲကောန်ကွာန်တံ နွံပၟိက်ကဵု မၞိဟ်ဂှ်ဂှ် ၜိုန်ရဟွံဒှ်အုပ်ဓုပ်ကွာန်ဏီလေဝ် သွက်ကွာန်ဂှ် ဒှ်ညးပတုဲဒၟံၚ်ဖဵုလၟိုန်ဏောၚ်၊ တုဲပၠန် ရံၚ်အာကဵု ပရေၚ်ဗဗွဲဓဝ် ပတုဲလဝ်ဖဵု အပ္ဍဲပွဳပွိုၚ် ဟွံပေၚ် (၁၀) သၞာံ၊ သိုၚ်လဝ် ဓဝ်ပတှေ်လ္တူညးဍုၚ်ကွာန်ဂှ်လေဝ် အောန်၊ ဒ္ဂေတ်လၟေတ်စိုတ်စရိုတ် ဟွံယျဵုလ္ဂေါဝ် ဟွံ တပ်တးမ္ဂးတှေ် ကွာန်ဗွဲမဂၠိုၚ်တံ ဟွံပေၚ်စိုတ်တုဲ လိက်တိုန်စိုပ်ဒၟံၚ် ရုၚ်ဌာနပွိုၚ်ဍုၚ်နာနာတံအိုတ်ရ” သာ်ဝွံ ကောန်ကွာန်သၞေဟ်ဗ္ဒဝ်မွဲတၠ ဟီုလဴကဵုရ။
ပရေၚ်ဟွံမွဲပၟိက်တုဲ ပတိုန်လိက်ကဵု ဌာနအုပ်ဓုပ်ပွိုၚ်ဍုၚ်တံဂှ် ညးလဵုမွဲဟွံဒးစဵုဒၞာ အခေါၚ်ပတိုန်နွံမံၚ်တုဲ နူကဵု ဌာနအုပ်ဓုပ်တံလေဝ် ဒုၚ်တၠုၚ်မံၚ် လိက်ပတိုန်စိုပ်နူညးဍုၚ်ကွာန်တံရ။ လိက်ညးကောန်ကွာန်တံ ပတိုန်နၚ်ဂှ် ညးတံဆက်ပတိုန်ဏာကဵု ခရိုၚ်တွဵုရးတေံမွဲကဆံၚ်ပၠန်တုဲ နူကဵုဂှ်မွဲကဆံၚ် အတိုၚ်ကောန်ကွာန်တံ ပတိုန် လဝ်ဂှ် ဍာံ၊ ဟွံဍာံ ကလေၚ်စၟဳစၟတ်ချိုတ်တ်ပၠိုတ်တ် တုဲဒှ်အာမှ သ္ဂောံခါန်ကၞက် နဒဒှ်ညးအုပ်ဓုပ်ကွာန်ရောၚ်ဂှ် ညးမကောပ်ကာဲ ရုဲပတိုန်ညးအုပ်ဓုပ်ကွာန် မွဲတၠဟီုရ။
အကာဲအရာ ကတဵုဒှ်မံၚ်ပရေၚ်ပရောသ္ဂောံပတိုန်လိက်ဂှ်ဝွံ လ္ၚဵုတံဂှ် ဟိုတ်နူဟွံဍိုက်ပေၚ်ကဵု သၞောဝ်အုပ်ဓုပ် ကွာန် မပ္တံကဵု “ပတုဲလဝ်ဖဵု အပ္ဍဲပွဳပွိုၚ် ဟွံပေၚ် (၁၀) သၞာံ၊ ဒ္ဂေတ်လၟေတ်စိုတ်စရိုတ် ဟွံယျဵုလ္ဂေါဝ် ဟွံတပ်တး” ဟိုတ်သာ်ဏံဟေၚ် ပရေၚ်ပတိုန်လိက် ကုဌာနအုပ်ဓုပ်ပွိၚ်ဍုၚ်တံ ဒှ်ကၠုၚ်ရောၚ် ဂွံတီကေတ်ရ။
အပ္ဍဲကဵုသၞောဝ်ဥပဒေသဇိုၚ် ညးမဒုၚ်ရုဲ ညးအုပ်ဓုပ်အရာပ် ကေုာံ ညးအုပ်ဓုပ်ကွာန်တံ မဒးဍိုက်ပေၚ်တဴကဵု သၞောဝ်ဂှ်ဝွံ (က) ဒးဒှ်ကောန် မိမကၟိုန်ဍုၚ်ဏံဟေၚ်၊ (ခ) အယုက် ၂၅ သၞာံ ဒးပေၚ်လဝ်တုဲဟေၚ်၊ (ဂ) ပရေၚ် ပညာၜိုတ်ထေက်ကြက်ဒးနွံ၊ (ဃ) ပရေၚ်စသုၚ်မံၚ်စံၚ် ၜိုတ်ထေက်ကြက်ဒးနွံ၊ (ၚ) ပတုဲလဝ်ဖဵု အပ္ဍဲပွဳပွိုၚ် ဒေသဇကု ဒးပေၚ် (၁၀) သၞာံ၊ (စ) ဒးဒှ် ညးဍုၚ်ကွာန် သ္ဍိုက်မၠိုက် ရှေ်သှေ်တုဲ ဒးနွံကဵုသိက္ခာသမာဓိ၊ (ဆ) ပရေၚ်ထေက်ယုက်ဒးခိုဟ်တုဲ တာလျိုၚ်အပ်ဇိုန်လဝ်ဂှ် ဒးယိုက်ဂၠေၚ်မာန်၊ (ဇ) ဒဒှ်မၞိဟ် စိုတ်ဆန္ဒဒတုဲဖဵု လ္တူညး ဍုၚ်ကွာန်မာန်၊ (စျ) ကၟိန်အိန်ထံၚ်တံလေဝ် ဒ္ဂေတ်လၟေတ်စိုတ်စရိုတ် ဒးယျဵုလ္ဂေါဝ်တပ်တး၊ သာ်ဝွံ နကဵုသၞောဝ် သဇိုၚ် တၚ်နၚ် (၉) တၚ်ဖျေံလဝ်နွံရ။
